陳美齡曾遭排擠網上受辱

曾經紅極一時的歌手陳美齡(Agnes)嫁雞隨雞,早已定居日本多年,就中日緊張關係,她自覺無能為力,曾被日本極右分子在網上攻擊的她,未有太過擔心人身安全,Agnes又爆二仔遺傳了她的音樂細胞, 曾被美國唱片公司睇中邀他簽約。



定居日本陳美齡承認受排華事件影響,但她在當地仍有不少工作,未想過退出。

在七十年代紅遍香港、日本及東南亞的歌手陳美齡(Agnes),最近返港接拍了一個護膚、護髮產品廣告,昨日Agnes在媽媽家中接受訪問,90歲高齡的陳媽媽更即場寫了四字詞的詩句贈予本報「我愛東方 公正嚴明 勿畏強權 扶助弱小」。

早年已嫁給日籍經理人金子力、定居日本的她對近年中日關係因釣魚台事件,長期處於緊張狀態,她坦言希望兩國關係可以改善,她說:「如果對立對大家都冇好處,釣魚台呢方面問題我諗唔到方法,希望中日雙方領導人諗到雙方都滿意嘅解決方法。」她希望兩地人民的情緒都不要太高漲,在日本發生過多次排華事件,她承認對她有少少影響,她說:「曾經有日本極右分子喺網上抨擊我,亂寫嘢鬧我,但我自己冇所謂,啲朋友同我講只係好少數人,大部分人都仲係好鍾意我。」


陳美齡的90歲母親向本報題字,以示鼓勵。

陳美齡透露正讀大學的二子(後右)遺傳了她的音樂天分。

二子被唱片公司睇中

在港匆匆逗留四日的Agnes今日便返回日本,育有三個兒子的她,大仔已經廿六歲,在美國從事投資工作,而二仔及細仔則仍在求學階段,Agnes自爆正讀大學的二仔唱歌好好聽,她笑說:「佢識唱識寫歌,之前佢擺咗啲歌上youtube,有好多粉絲追隨,甚至有美國唱片公司想簽佢,但佢爸爸唔贊成,覺得唱歌好辛苦,想佢讀完書先,雖然我覺得好可惜,但我唔會逼佢簽,我係佢no.1粉絲。」

剛踏入58歲的Agnes在日本忙碌得很,既有做電視、電台、演講、出書,錄碟,每年也會做巡唱,她說:「我試過有年做咗一百場巡唱,今年都做咗十場,我冇諗過退落嚟,但會慢慢接少啲工作陪屋企人。」她自嘲年紀大了,醫生也叮囑她要抖吓。談到今次拍廣告,她笑言有段小插曲,在拍攝現場重遇中學的師妹,在廣告中她彈着結他唱歌,回憶起那些年,兩人都忍不住感動落淚。

文:音樂組

全站熱搜

tvb4life 發表在 痞客邦 留言(0) 人氣()