導演一嗌 action,飲咗能量飲品嘅青雲谷行衝入火海,李心潔同李馨巧開始大嗌,下方嘅工作人員負責俾指示,務求全部嘢一氣呵成!

媽咪姐
劉青雲飲完先救
由彭氏兄弟執導嘅《逃出生天 3D》 10月就會上畫,不過媽咪姐八卦,梗係晨早𥄫過套戲啦!特別推介就係劉青雲勇救片中老婆李心潔同小演員李馨巧呢一幕。唔講唔知,李小妹妹原來係馬來西亞最年輕嘅影后,仲喺依家上緊嗰套《激戰》同張家輝做對手戲㖭。

嗱,青雲要一次過救兩位影后,梗要做足準備啦!拍攝現場點晒火,氣溫高達四十幾度,所以試好位,希望零 NG。身為影帝嘅青雲好專業呀! Roll機前喪飲能量飲品,務求谷行自己,快啲搞掂。就算喺休息期間都無除嗰套厚到癲嘅消防員制服,慳番着衫時間,等大家都可以早啲收工。難怪李心潔都話:「青雲個人好定,俾到我好大安全感!」郭藹明真係好有福氣囉。

心潔有難
李心潔攬住 9歲嘅李馨巧望天做驚嚇表情,跟住唔夠 3秒就會冧天花。

工作人員先用大碌竹抹易燃液上喉管再點火,都幾牙煙!

休息時間,成面灰嘅李心潔同李馨巧同青雲傾到笑晒,但着住制服嘅青雲其實熱到大汗疊細汗囉,好辛苦!

後期加工
拍完後,經過加工,就出現呢個火光熊熊、「老公」青雲勇救「老婆」李心潔同路過小女孩嘅緊張畫面。

tvb4life 發表在 痞客邦 留言(0) 人氣()