陳君宜執靚後,自信地向記者表示皮膚滑溜了不少,還即場指住面頰,示意當時打針位置。

名人潮
陳君宜名媛執靚新招 陳君宜打蛋白線變 V面
女人天生愛美,為扮靚不惜工本,勇氣特別驚人。
就連已經移民溫哥華的息影女星王祖賢,
亦被指特登來港執靚。醫學美容漸趨普遍,
不少女士口口聲聲話靠化妝變樣,原來背後又爭住試新招。
近年變靚風氣殺入社交界,時裝網站 zeuz.com老闆娘
陳君宜,為了突出五官輪廓,近日嘗試打蛋白線,
將過百條絲線埋臉頰內,令面形拉尖。
「依家見到啲妹妹都整得咁靚,唔通我要 keep住阿嬸樣咩。」
而羅霖、周美鳳等名人亦向本刊大爆變臉過程。
敢做又敢認,果然夠勇!

試過不少醫學美容方法的陳君宜,將擔任詩琳代言人。拍廣告當日,老公鄭躬明親身出動監場。

陳君宜出名夠潮,連扮靚都要最快最新。多年前已經食膠原蛋白補充劑保養皮膚的她,近年開始接觸醫學美容。她透露早於半年前,首次接觸打針變靚,將 PLLA聚左乳酸打入皮膚,促進肌膚再生骨膠原。「女人一過 30歲,啲皮膚就向下垂,初初都怕痛驚打針,不過要靚梗要犧牲少少。隆鼻、削骨呢種創傷性手術就一定唔會試。打 Sculptra(膠原漸生)呢個療程好滿意,皮膚滑咗,最明顯係眼。因為我對眼窩凹落去,黑眼圈跟咗我成廿年,打完之後真係冇咗。」女人追求美貌永無止境,擊退完黑眼圈,近日她再試新招,膽粗粗將蛋白線透過針筒由頸部向上打到額頭。一支針連一條蛋白線,足足打了過百針,成功將面形向上拉到變 V煞。「呢個療程係將蛋白線打入皮膚,將啲肉提起。依家我覺得對雙眼皮明顯咗,對眼都大啲。初初聽到醫生話埋過百條線都好驚,不過只係喺表面拮落去,唔係咁深入。加上搽咗麻醉藥唔係好大感覺,最痛係額頭位,所以我額頭都打多咗麻醉針。估唔到成個過程廿零分鐘搞掂。」
11年包包面

陳君宜一直被闊面困擾,前年她出席活動,因為包包面關係,輪廓未見突出。
針後有瘀痕

陳君宜上月去 ball,記者發現她頸部有明顯瘀傷,原來是打蛋白線針所造成,但唔夠一日就退瘀。
抗拒變膠面
醫學美容普遍,木無表情的硬膠面亦愈見愈多,原來陳君宜聽過不少失敗例子,親眼見過朋友變膠。「整還整一定要自然,唔可以冇表情。我唔夠膽打 botox(肉毒桿菌),見過朋友打得勁得滯,搞到塊面唔郁,個嘴 O住咗合唔埋,好唔自然,要過一段時間先回復正常。」女人愛靚天經地義,對於變靚,她有自己一套理論。「女人要喺靚嘅時候保養,到殘先去搞就返唔到轉頭。我又唔係整容,依家見到啲妹妹整得咁靚,唔通我要 keep住阿嬸樣咩!咁多人變靚,自己唔整咪好蝕底,又唔係去打劫,真係做咗咪講囉!」
蛋白線拉面

Ultra V(線雕拉提)屬拉皮手術。醫生將心臟手術用、亦即人體可吸收的 PDO( Polydioxanone)手術線,固定在臉部鬆弛的部位。
當線進入肌膚後,會被肌膚皮下組織包蓋,將皮膚的組織固定,產生提升效果。而針刺的傷口及線材本身會促使皮膚啟動修復程序,因而令膠原蛋白增生,產生皮膚更新效應,使肌膚恢復彈性緊緻。打蛋白線針的效果因人而異,有些女士需要打兩至三次才見效。
重生骨膠原
醫生會因應皮膚下垂或骨膠原流失較嚴重的部位注射聚左乳酸,刺激骨膜及皮下真皮層令骨膠原重生。整個療程大概每兩個月打一針,打兩至三針才會達提升皮膚效果。

陳煒早前亦試過打針增加骨膠原。

羅霖  70針防腐
今年 48歲,已是三子之母的羅霖,比真實年齡年輕。她試盡保骨、保眼產品,近年更用醫學美容 keep住靚樣。「去到我呢個年紀更加要學識保養,我想塊面尖啲上鏡啲,所以三個月前試咗打蛋白線針。醫生打咗 70幾條線喺我塊面同頸,打完一邊已經睇到收緊咗。條線好幼好短,蛋白溶線會被身體吸收,仲會刺激膠原蛋白增生,可以 keep到兩年。」羅霖近排是非多多,怕被外界批評的她,諗足成年先敢試。「起初都有掙扎過,因為唔係人人接受到,之後上網睇好多資料,先知呢種技術喺韓國同內地原來好普遍,加上今次有正式醫生做好放心, 10個人可能有 6個都做緊。不過,最緊要聽醫生意見,唔好貪心,唔好永遠覺得唔夠不停加,搞到唔似自己個樣。」

離婚後的羅霖,要自己顧自己兼養仔,所以她孤注一擲,打針變臉,增加工作機會。

羅霖婚後養尊處優,因此面頰亦圓潤不少。
名太整靚論
陳君宜和羅霖違反自然定律,不惜用新招補救。不過提到要大工程變靚,就未必個個靚太接受!
周美鳳 只係打幾針
公關公司老闆周美鳳,經常應酬見人,長期扮到行見人,她坦白承認有靠醫學美容變靚。「係人都想靚,但我唔會搞太多,只係打咗少少 botox,眉心 4針、眼尾 3針。我唔會定期去打,只係見啲紋深咗少少先去整,等個人精神啲。打 botox唔可以貪心,愈打愈多只會令塊面硬,連表情都冇埋,好奇怪囉!其實依家好多護膚品都落好重料,好似 Kiehl's隻抗衰老乳霜都好 work,用兩個禮拜啲紋都淡咗。仲有我建議每朝空肚飲檸檬水排毒,我飲咗 1年,皮膚滑咗又白咗。」

13年有神
相隔 9年,周美鳳的皮膚依然滑淨,對眼有神,輪廓亦較突出。

04年細眼
當年周美鳳眼比現時細,面亦比較鬆弛。
余思敏 唔想再去整

鄭中基太太余思敏,已開始教囡囡護膚扮靚,但講到醫學美容,她就唔多敢試。

「乾淨、防曬就係最好保養皮膚嘅方法,囡囡都已經開始自己搽 lotion。醫學美容咁普及,我覺得扮靚係唔見血為大前提。我試過用激光去斑,過程都幾痛,所以我依家防曬做得好足,唔想再去整。」
朱慧珊 搞到出白斑

朱慧珊的白斑於左面,顏色比較突出,即使搽上粉底仍清晰可見。
「要皮膚靚基本梗係飲食同休息,食少啲甜嘢對皮膚好,我 11點就瞓,每日瞓 8個鐘。我好耐之前都有試過 laser打走色斑,點知我皮膚好薄太敏感。打完之後,連自己黑色素都破壞埋,搞到出白斑,冇得返轉頭。我唔會再做機,只係平時防曬做足啲,盡量喺室內活動。」
顧紀筠 做 laser淡斑

顧紀筠有個專用的皮膚科醫生好友,定期替她整理皮膚保青春。

「女人一定要保養,唔係話要唔老,只希望唔好老得咁快。我皮膚科醫生建議我做 laser,只係兩個月做一次,皮膚滑咗,連斑都淡埋,唔痛又可以靚,我覺得 ok。」

全站熱搜

tvb4life 發表在 痞客邦 留言(0) 人氣()