靚景巨廳
客廳以 earth tone設計,購自美國的灰色大型梳化,中央鋪上手織羊毛地氈點綴。弧形落地玻璃窗,飽覽壯闊維港全景。窗外的藍天白雲,有如大型掛畫。

私家居
半空安樂窩 李月
香港樓價水平高,人人想有理想安樂窩,有人住蝸居望上車,有人更上一層接近藍天,享受半空中寧靜。模特兒公司星潮娛樂文化老闆李月, 6年前定居香港,為了讓囝囝在舒適安靜的環境成長,去年一家五口搬上半山,月租 12萬 5千進駐富匯豪庭,飽覽 270度壯闊維港全景,恍如置身半空。

靚景確實有股魔力,打開大門,視野開揚廣闊,弧形落地玻璃窗設計,環迴維多利亞港、九龍半島等大片無敵海景,令人目瞪口呆。「香港好繁榮,大廈起到好密好壓迫,搬嚟呢度喺高位望落去,又有另一個感覺。對住呢個景真係好 relax,可以望住雲、睇住海,咩煩惱都冇晒!」

簡約主人房
面積 300呎的主人房,一邊是落地大玻璃,景觀廣闊開揚。房內以米白牆身配深啡實木櫃,簡單舒服。

大肚特寫
李月與老公李本勝結咗婚兩年多,育有 1歲囝囝,家中不少角落都放有夫婦合照,主人房更擺放她懷胎 8個月的相片。

可愛囝囝
13個月大的囝囝李中舜,眼仔睩睩,他的大頭相滿布全屋。「我成日都拎住相機,每日都會幫佢影一張相,之後喺電腦再分唔同月份收藏。」

紅色地帶
李月將客廳旁邊的偏廳變為囝囝的玩具地帶,放有大堆紅色玩具。「囝囝特別鍾意紅色,有時佢見到着紅色衫嘅女仔就以為係媽咪。」

法拉利學行車
「架車會發聲、發光,囝囝好鍾意,佢 4個月嗰陣開始坐呢度陪我哋食飯。小朋友要自小習慣坐定食飯,唔可以俾佢走來走去。」
方便兼夠靜
李月與經營高爾夫球用品、紅酒生意的富豪李本勝結婚兩年多,不過因身份問題,暫時要捱貴租,未有置業打算。「老公係美國華僑,要交好重稅,等緊香港永久身份證。如果買我哋呢度,要俾成千萬稅。佢係生意人,時間好緊要,要求由屋企返公司唔可以超過 15分鐘,要舒服但又唔可以太遠。所以半山較靜嘅地方好適合,呢條街一落山好方便,唔使兜好遠。」面積 2600呎的海景單位,以 4房兩廳設計,寬敞實用。屋內擺設由李月話事,喜愛簡約設計的她,家居以黑、白、灰三色為主調,「老公主力做生意,屋企全部嘢由我搞,我鍾意簡單整齊光猛,唔太鍾意好 colourful。盡量有咁少嘢得咁少,不過有咗小朋友之後就冇辦法。」

Calvin Klein 15萬地櫃
李月鍾情簡潔款式,家中大部分家具由外地訂購。客廳一對木櫃盛惠 15萬,是出自時裝品牌 Calvin Klein。「佢哋嘅設計以黑白色為主,唔太多花巧嘢,好啱我。」

 

純銀長命鎖
來自吉林長春的李月,思想傳統,客廳木櫃上的枱燈掛有意頭銀鎖。「呢個係奶奶送俾 BB嘅百歲鎖,寓意長命百歲,身體健康。我哋唔送金,因為 BB戴銀最好。」

李月與朱璇識於微時,早前被拍得二人 shopping,她更落力做埋媒人,介紹富二代俾好姊妹認識。

金色 Daytona
李月與老公李本勝結婚兩年多,恩愛到極。「佢成日都俾驚喜我,呢隻錶係上年嘅聖誕禮物。」

拼色 Hermès
李月早前於夏威夷買到極罕的拼色 Hermès birkin手袋。「想去專門店買袋,唔可以一入去就問有冇袋,要好有誠意,如買衫、錶、手鐲咁,之後先問有冇袋。佢可能會話冇貨叫你留低卡片,聽朝返貨打俾你。呢個袋 7萬幾蚊,但嗰次總共買咗 30幾萬嘢先有!」
專收藏靚酒
模特兒出身的李月,跟老公學飲紅酒,最近還開設模特兒公司過老闆癮,名模 Mandy Lieu亦是合夥人兼旗下 model。「照顧囝囝當然係大前提,但我都想接觸多啲唔同嘅嘢,唔會 out。」家中收藏不少名貴紅酒的她,一副專家口吻。
「收藏紅酒係好好嘅投資,當然要有心得,要睇出產地、年份、葡萄,唔係亂咁買。要趁低吸納,當人人都要就唔到你要。收藏 ROMANEE-CONTI最珍貴,因為佢品質好、產量少,飲一支少一支。我哋收藏由 1952年開始至 2006年,每個年份儲一支,入咗 7百幾萬貨。」除了紅酒投資,李月平日亦習慣嘆番杯,屋企成為老友私竇。「飲紅酒好開心又健康,依家出去食飯都會自己帶酒去飲。好多朋友鍾意喺我屋企飲紅酒、傾偈談心,欣賞夜景。」靚酒加靚景,就是李月的 quility of life。

16萬極品 ROMANEE-CONTI
「產自 Burgundy酒莊嘅獨有田,產量好少,每年只有 4千幾支。每支都有自己編碼,好珍貴。佢有好強紫羅蘭花香,入口好易接受,回味仲有少少果香,呢支價值 16萬。」

女士恩物 PETRUS
紅酒當中,李月對產自法國波爾多的 PETRUS情有獨鍾。「呢支酒好有果香,好啱女仔飲,每年大概出產兩萬支,算係波爾多之中最貴嘅酒,千禧年嘅市價 4萬蚊。」

特色酒標 Chateau Mouton Rothschild
「呢支武當含有好多種果同皮革、土壤等味道,比較 strong,適合男士飲。佢每年都會搵唔同藝術家、設計師等去設計酒標,好似藝術品,價錢好經濟, 5萬蚊已買到。」

李月的富豪老公李本勝,經營高爾夫球用品和紅酒生意,家中收藏不少靚酒,她提到紅酒,一副專家口吻。

透光廚房
長形設計的廚房,配上整套木材廚櫃,兩旁設有工作枱,空間感十足。中間位置裝上落地大玻璃,將陽光引入室內,令煮食時更加舒適。

CUCKOO黃金飯煲
以為年輕媽媽李月是無飯主婦,原來她日日要湊米氣。「喺韓國食嘅白飯特別好味,老公特登喺當地運個電飯煲返嚟。話個內膽係黃金及銅,煮飯特別香軟有益。」

 

tvb4life 發表在 痞客邦 留言(0) 人氣()