亞熱帶

松嶋菜菜子 夕陽女王

松嶋菜菜子主演的日劇平均收視超過 18%,前年一部《女管家三田》結局收視更達 40%,日劇女王當之無愧。
不過這位 39歲的女王連續兩套劇平均收視創近年新低,黑氣更蔓延至銀幕,最新電影《 10億懸賞追殺令》在康城影展反應麻麻,好在日本票房仍然有 18億 1千萬日元(港幣 1億 6千萬),都係靠菜菜子扮 cool食住《女管家三田》尾水,似乎女王風光不再。

 


菜菜子和反町隆史拍《 GTO》撻着,兩人拍拖 3年, 01年結婚,育有兩女,算是日本娛圈的模範夫婦。 

菜菜子是《救命病棟 24時》系列台柱,由於另一主角江口洋介今次冇份,剩低菜菜子一個配合其他奀星,首集收視只有 17.7%,之前四季首集收視過 20%的齋缽被打破。更大鑊的是,《救》劇平均收視 16%,僅比去年菜菜子主演的《神七探偵團》好少少,但相比《女管家三田》平均收視 25.2%,已經流失逾千萬觀眾。
菜菜子衰在俾《女管家三田》的成功沖昏頭腦,她拍《神七探偵團》時不但叫價 31萬港元劇酬拍一集,又成日臨場改劇本,搞到台前幕後冇人妥佢。菜菜子對《 10億懸賞追殺令》寄望甚殷,一來睇好導演三池崇史的暴力美學老外啱睇,二來影片有份角逐康城影展有 face。所以她除了「三田」上身繼續扮黑口黑面,又肯大熱天瞓馬路拍戲,拍攝時仲同傳媒話:「一邊做嘢,一邊嘆日光浴都幾好吖!」
菜菜子識撈,不過影評人就唔多識做。外國傳媒對《 10億懸賞追殺令》印象麻麻,唔 like片中眾多好警察為救殺人狂而死,認為欠說服力。菜菜子都知瀨嘢,諗住拍《救》劇挽回人氣,她更自動降價 7萬至 24萬一集接拍,希望食老本反彈,又肯剪短頭髮,奈何收視都係唔得。

新片照樣大收

新劇唔收得,《 10億懸賞追殺令》口碑又麻麻,不過《 10億懸賞追殺令》在日本大收 18億 1千萬日元(港幣 1億 6千萬元),反映菜菜子仍然有叫座力,加上她形象健康,廣告價企硬 237萬港元,穩站一線女星之列。
搵埋搵埋,菜菜子一得閒就會買鑽石獎勵自己。菜菜子早前獲日本國際珠寶展頒贈「最佳珠寶佩戴獎」時,她說:「我廿幾歲已經好鍾意儲珠寶,尤其一粒粒嘅鑽石就好似有魔法嘅石頭,希望我都好似鑽石咁,永遠發光發亮!」

差婆勇救殺人犯

菜菜子主演的《 10億懸賞追殺令》,由三池崇史執導,是今年康城影展競賽作品。故事中,富豪的 7歲孫女被殘殺,他懸紅 10億買起兇手,令全民展開瘋狂追殺行動。殺人犯藤原龍也自知身陷險境,於是到福岡警局自首。警方派出以大澤隆夫及菜菜子為首的五名精英保護他,但藤原的行蹤一次又一次外洩,使本來團結的 5個人,開始互相猜疑……


《 10億懸賞追殺令》 9月 5日抵港,想睇菜菜子扮 cool做差婆起飛腳踢壞人,到時可以睇真啲。 

大澤隆夫(左)是菜菜子劇中拍檔,代表作係翡翠台早排周日深夜熱播嘅《仁醫 2》。至於殺人犯藤原龍也(右),在前作《大逃殺》及《死亡筆記》都滿身血腥,殺人放火啱晒佢做。 

導演三池崇史(左)拍過《殺手阿一》同《惡之教典》,套套 sell暴力。不過今次老外唔 like,佢喺康城行紅地氈時笑得勉強,係菜菜子笑得自然啲。

 

 


單飛唔掂以往《救命病棟 24時》都是江口洋介拍住菜菜子,今年剩低菜菜子拍《救》第五季,收視即時打破該系列新低。 


黑面上癮10年在《女管家三田》,菜菜子飾演黑口黑面但又乜都搞得掂的女管家。《女》成為日本近年神劇,所以菜菜子在電影《 10億懸賞追殺令》繼續黑面。

成名後,菜菜子惜肉如金,只係偶然出席活動至賣大包益街坊。 

菜菜子入行前是潮流雜誌《 ViVi》御用 model, 92年參加水着比賽而正式入娛圈。 

撰文:娛樂組 

    全站熱搜

    tvb4life 發表在 痞客邦 留言(0) 人氣()