夏雨過檔香港電視後,私人時間大大增加,促使他心雄做老闆開戲。想同班朋友拍套戲有集體回憶!(真實對白) 

娛樂喧

效法《桃姐》博攞獎 夏雨投資千五萬開戲

今年 67歲的夏雨,近月可謂禍不單行。先是今年 3月,其西貢蠔涌的獨立屋「雨房」第三度被爆竊;兩個月後,他在荃灣又不慎撞車,半邊平治車身被貨車撞凹;剛回流香港在 now TV任主播的 24歲長子黃俊銘,日前更在 Instagram大數老竇污糟,搞到屋企有曱甴。
雖然接二連三發生事端,但已過檔王維基「香港電視」的夏雨一於少理,反而專心催谷自己的演藝專業。本刊收到消息,做過導演、曾在馬來西亞搞製作公司的夏雨,近日心雄重操故業,睇準電影《桃姐》揚威海外,遂投資千五萬拍一部同樣以老人院為題材的電影,自己還兼任監製及演員。據知好戲之人盧海鵬、馮淬帆,「影后」鮑起靜、羅蘭已落實演出。

 

08年幾經波折才憑《溏心風暴之家好月圓》拿了「視帝」的夏雨,最終都因不滿服務了 35年的無綫制度,心灰意冷離巢。去年他以 5萬一集高薪,過檔王維基的香港電視,夥「影后」鮑起靜、黃日華拍 25集重頭劇《歲月樓情》,每日開工唔過九粒鐘,輕易賺過百萬,比無綫下下直踩廿粒鐘又唔加人工,現時的生活自在得多。

曾蝕百幾萬

劇集埋尾在即,夏雨眼見目前香港電影巿道好轉,決定再做老闆投資開戲。知情人透露:「夏記(夏雨別稱)七幾年喺無綫做主角時,已同當時高層周梁淑怡自薦做過兩年幾導演,《民間傳奇》啲單元佢有份參與,連杜 sir(杜琪峰)都做過佢副導,不過後來佢太多劇拍冇時間兼顧。直至九二年夏記同老婆移民溫哥華,悶悶哋又喺大馬搞製作公司,不過一場金融風暴,蝕咗百幾萬執笠收場,所以二千年咪要復出無綫囉!」
事隔十多年,夏雨仍然心不死。知情人士續說:「自從佢簽咗王維基之後,個人冇咁辛苦又開心咗,嚟緊佢決定開呢套戲,自己投資、做監製兼演員,仲搵咗呢幾年幫無綫同邵氏拍賀歲片、票房都過千萬嘅鍾澍佳做導演。成班老友羅蘭、鵬哥、鮑姐、緊哥(馮淬帆)個個話收友情價幫手!」


夏雨去年被王維基高薪挖角,即夥拍黃日華、鮑起靜、唐寧等人拍劇集《歲月樓情》。上星期眾演員為該片拍攝一場派對踩波戲,戲裏戲外都笑個不停。 

夏雨新片的導演是資深製作人鍾澍佳,近年無綫的賀歲片如《 72家租客》、《我愛 HK開心萬歲》均由他執導。《蘋果日報》圖片 

夏雨的太太為前無綫藝員馬慧玲,兩人育有兩子一女,長居溫哥華,近年其大仔黃俊銘(右)返港與父同住。《蘋果日報》圖片

睇中陳豪楊怡

今次夏雨肯自掏腰包投資開戲的一大強心針,是眼見去年劉華有份投資的《桃姐》揚威海外,累積票房達三千萬,更造就葉德嫻成為七料影后。夏雨認為大打溫情煽情的劇情能吸引觀眾,故主動與大陸和新加坡的投資單位斟洽,他自己則至少投資近 500萬,預計總投資額千五萬。據知夏雨與導演鍾澍佳經過多次傾談後,決定拍一套以老人院為藍本的電影。大部分「老人家」角色已落實,而年輕主角的人選,夏雨有意邀曾合作《溏心風暴》的陳豪及楊怡演出,兩人屬同一經理人,傾價錢亦較為方便。此外,亦會考慮同樣已過檔王維基的香港電視一姐張可頤。

主角人選

 


雖說夏雨新片以老人院為題材,但仍有一線演員擔正。他初步曾與多次在無綫合作的陳豪和楊怡斟洽,不過由於兩人與無綫有經理人合約,當然要得到無綫「放人」才成事。 

此外,夏雨亦與同為香港電視旗下的張可頤傾過,但至今還未落實。 

落實甘草

 


人緣甚廣的夏雨吹雞開戲,不少老友都義無反顧幫忙,除了在劇集《歲月樓情》的鮑起靜外,老友馮淬帆、盧海鵬和羅蘭亦收友情價落實演出。 

71歲盧海鵬和 78歲羅蘭姐永不言休,本月初兩人還為容祖兒新歌〈七不思議〉拍 MV。問到羅蘭姐為夏雨拍戲,她說:「老友叫到梗係會拍,希望會有好成績。」 

《桃姐》成績驕人, 11年勇奪金馬獎最佳導演和男女主角三獎, 12年又囊括香港電影金像獎五獎,包括劉德華和葉德嫻的男女主角,難怪夏雨有意效法拍老人題材。

新片十月開拍

上周四( 22日)記者向夏雨求證,對於投資千五萬開戲,他不斷推說自己乃股東之一:「我出少少㗎啫,仲有大陸同新加坡投資者。戲名都諗好叫《 ATM》, 10月中會開拍,我想同自己班朋友拍一部可以有集體回憶嘅,大家開開心心,賺唔賺到錢係其次。(係咪想效法《桃姐》博攞獎?)攞獎呢啲嘢有邊個唔想,但我呢個年紀唔會強求,部戲好其他嘢自然會嚟。(係咪會搵陳豪、楊怡?)年輕嘅卡士就唔好講住喇,因為人哋未簽合約,我驚有變卦,但我會預個仔有個角色,佢剛剛返香港發展,俾佢玩下囉!」剛俾阿仔數臭完都當冇事,爸爸真偉大!

密做買磚頭

今年 67歲、原名黃成的夏雨, 74年加入無綫已是男主角,早年在《歡樂今宵》趣劇創造了說話勁快,能一秒說六個字的「阿煩」,深入民心。《溏心風暴》系列,更把夏雨推上事業高峰, 08年他終嘗「視帝」滋味。去年夏雨離巢過檔王維基的香港電視,收取 5萬元一集酬勞,現正埋首拍攝新劇《歲月樓情》。多年來夏雨在內地及星馬都吃得開,密密賺錢,他除了在加拿大購入物業讓老婆仔女居住外,在港手持的物業遍布沙田、西貢等地,市值近 3000萬。


夏雨 10年以 268萬購入西貢蠔涌村屋,惟 3年間三度遭賊人入內盜竊,而最後一次則由跆拳道 3段的大仔黃俊銘(小圖)擊退賊人。 

2010年,夏雨還與米雪合資連環購入兩個沙田第一城大單位作投資之用。 

賺錢唔益人

近年電影業市道好轉,眾星都肥水不流別人田,自己做埋老闆投資拍片,大部分更兼任演員。好似劉華有份投資的《桃姐》,單是香港票房已近三千萬,實行有錢搵唔益人。


吳君如做雞封后由陳可辛投資及監製、老婆吳君如做主角的《金雞》和《金雞 2》,當年票房都輕易過千萬,更令君如首奪台灣金馬獎影后。今年底君如將任監製兼有份投資開拍《金雞 3》。 

趙薇7億處女作趙薇有份投資兼執導的處女電影《致我們終將逝去的青春》,早前在內地勁收 7億票房,成功為趙薇轉型。 

甄子丹2億新作由內地財團投資達 2億嘅《 3D冰封俠》,有傳甄子丹有份投資,且兼任演員及動作導演,預計明年上映。

採訪、撰文:娛樂組
攝影:攝影組

    全站熱搜

    tvb4life 發表在 痞客邦 留言(0) 人氣()