日前,陳凱琳完成港姐訓練,陳爸爸開門迎接愛女,幫手攞袋。相信送凱琳返屋企嘅 20號陳偉琪一定好鬼羨慕! 

媽咪姐

港姐大熱 17號陳凱琳富貴大起底

近年選港姐,媽咪姐同大家一樣都係邊鬧邊睇啦!講真,今年一班港姐質素叫做好番少少,至少大部分身形勻稱,得一、兩個佳麗好好肉哋。不過,講到最苗條又有 noise嘞喎,梗係一出場已被封為大熱門、喺網上投票又以 60,464票成為「票王」嘅 17號陳凱琳!

 


有阿爸撐! Sure Win!(設計對白) 

呢位年僅 22歲嘅靚女,身高 5呎 4吋,但就得 87.2磅。嗱,大家千祈唔好以為陳爸爸無俾飽飯佢食喎!喺媽咪姐明查暗訪之下,發現陳凱琳出身原來非常富貴,家住九龍塘過億獨立屋,阿爸仲有大量現金同幾個物業揸手,係名副其實嘅千金大小姐。不過咁,之前有傳陳凱琳係俾養父湊大,媽咪姐就特登搵陳爸爸傾咗幾句。估唔到佢好 nice,有問必答。先講對阿女入決賽以平常心面對,但就未知當日可唔可以同太太入去電視城支持。
媽咪姐再問陳爸爸係咪有樓又有舖?在旁嘅陳媽媽想阻止佢答,但陳爸爸就大方承認:「獨立屋係我哋嘅祖屋,我係遺產執行人,而地舖係屬於公司。(傳聞凱琳係養父湊大喎?)之前報道話凱琳有養父,可能係囡囡試過喺荷里活廣場活動,話自己住嗰度附近而俾人誤會(有另一個家)。我絕對係佢親生爹哋!」
陳凱琳有個咁有米又咁緊張佢嘅爸爸,唔怪之得愈戰愈勇,人人都話佢喺周日( 9月 1日)決賽,坐亞望冠啦。

九龍塘過億大宅

陳凱琳家住九龍塘獨立屋,保守估計大宅連花園過 5千呎!不過佢 5歲就移居加拿大,係呢一年返嚟選港姐先開始入住。

旺角舖 2千萬

陳爸爸喺 97前賣咗手上唔少物業,成功避過金融風暴,套現咗 6千幾萬。依家手頭上仲有幾個單位同地舖收租,淨係圖中呢個旺角舖位市值已過 2千萬。

隱形富爸爸

周二( 27日)陳爸爸送陳媽媽去觀塘街市,媽咪姐上前同佢傾咗一陣。陳爸爸身家豐厚,對答有禮,明顯係有教養嘅人。

 

當日陳媽媽由陳爸爸接載,拎咗大袋衫去觀塘一間基督教服務站,捐俾有需要嘅人。佢仲同媽咪姐講,一家都係基督徒。


 

17號陳凱琳面長鼻高下巴尖,有啲鬼鬼哋,俾人話係「嫩版李嘉欣」。不過有傳佢喺加拿大讀大學( Simon Fraser University傳理系畢業)嗰時整容,佢就即刻 post張童年相上網反擊。咦,又真係 3歲定 80喎!




正版李嘉欣

愈食愈瘦

5呎 4吋嘅陳凱琳,天生瘦底,之前最重只係去到 95磅!依家得八十幾磅嘅佢,選港姐期間,不斷喪食,完全冇影響佢苗條嘅身材。


啱啱入咗十強,日前陳凱琳出席港姐活動一樣無避忌,猛咁擺嘢入口。你睇,唔敢多食嘅 16號徐韶蓓就睇到眼定定。 

準決賽時,離罩嘅 17號陳凱琳同巨躉 19號蕭穎詩同樣被指身材輸蝕。不過蕭慘啲,被指肥過陳 30磅,返到後台即時爆喊。但陳凱琳就話覺得自己身材幾好,「起碼夠瘦!」 

Well,點都好,觀眾眼光最雪亮!連日來,有唔少妹妹仔喺電視城門口等同陳凱琳合照,佢亦笑晒任影,狂儲 fans。

tvb4life 發表在 痞客邦 留言(0) 人氣()