條件好得過人哋先講!(設計對白)蔡少芬與鄧萃雯在無綫屬於有收視保證的花旦,如今兩人去意已決,對無綫極大打擊。

過去兩年,專注北上拍劇賺人仔的鄧萃雯,今個月將會重返無綫埋位拍《金枝慾孽2》,話晒當年憑劇中「如妃」響朵,或多或少有情意結,但最主要原因是想盡快還清劇債,與無綫搞清關係,回復自由身,方便接拍其他電視台劇集。至於同樣有份拍《金枝2》的蔡少芬,亦效法鄧萃雯,拍完即閃。眼見有叫座力的花旦不斷被掏空,無綫四出揀蟀救亡,甚至唔理好醜但求就手,連一班亞視過期熟女如陳煒、吳綺莉都唔放過。

冇回巢兩年
○四年《金枝慾孽》創下電視史上佳話,無綫翻炒開拍《金枝2》,原本希望搵齊原班人馬,可惜黎姿已嫁人退出,佘詩曼、張可頤同林保怡又相繼離巢,只得鄧萃雯同陳豪,再加入新角色蔡少芬,支撐大局。據知,鄧萃雯原本對接拍《金枝2》的興趣不大,一來班底面目全非,加上故事始終是上一集延續,吸引度大打折扣,加上知道鍾意創新的監製戚其義以及編審周旭明有意加入同性戀情節,身為虔誠基督徒嘅鄧萃雯怕會變相宣揚同性戀,所以一直有保留。「呢幾年雯女主力拍大陸劇,除咗人工高過無綫幾倍之外,最重要係劇組製作認真,制度好唔係工廠模式,拍無綫大家無得休息,公司又刻薄,唔拍唔可惜;加上大家都知雯女揀劇揀得好嚴,唔會輕易叫到佢接,所以自從前年拍完《義海豪情》之後,佢都冇再拍過無綫劇。」知情者說。

唔再續約
直至戚其義向鄧萃雯保證,不會刻意在同性戀情節落重筆,加上她想盡快清埋與無綫的劇集合約,最後落實接拍。「無論王維基抑或其他電視台,好早已經搵雯女,開出嘅條件都好吸引,有誠意又表現尊重,再者,無綫已經冇乜嘢值得佢留戀,好多合作開嘅監製同編劇都轉碼頭,戚其義同周旭明拍完《金枝2》會過去幫王維基,李添勝今年又退休,鍾意合作嘅走晒,雯女覺得留喺度冇意思,佢拍埋四十集《金枝2》就冇再欠無綫,更加唔會再簽約俾人綁死,回復自由身先再決定究竟過第二個台,定係全力拍大陸劇。」鄧萃雯身邊人說。除了鄧萃雯拍完《金枝2》放監,同劇的蔡少芬亦有同樣打算。自從去年誕下囡囡張楚兒後,湊女排第一位,就算返大陸拍劇,都會將女兒帶在身邊。現時,蔡少芬接戲的首要條件,是要有足夠時間休息同湊女,拍無綫劇每日起碼開工十八小時,莫講湊女,就連休息時間都唔夠;所以有指蔡少芬拍完《金枝2》還清劇債後,合約年期屆滿便會同其他電視台傾合作。

過期花旦
無綫重量級花旦逐個走,無綫於是四出招兵,但搵來搵去,只得一班亞視過期花旦有興趣,好似亞姐出身的吳綺莉同陳煒,前者回流香港為無綫收費台主持清談節目《女人有話兒》,收視口碑欠佳,仍獲無綫簽下經理人合約,更安排在新劇《雷霆掃毒》中同苗僑偉、林峯拍檔。至於嫁給台商顏志行的人妻陳煒,無綫一樣唔放過,今年四月安排她做新劇《法網追擊》女主角,亦同樣簽下經理人合約。小生花旦逃亡潮無改善,無綫唔理好醜,但求就手。

走得快好世界
廣管局公布於今年增發三個免費電視牌照後,無綫隨即爆發「逃亡潮」,加上內地製作公司出手闊綽,昔日無綫當家花旦如佘詩曼、張可頤、宣萱、郭可盈等相繼離巢,返內地搵真銀。

佘詩曼
同無綫經理人合約去年屆滿,改簽三年部頭約,拍完《4 in Love》後,阿佘主力在內地搵食,現正接拍中央台劇集《建元風雲》。

張可頤
去年12月尾與無綫約滿的張可頤,現正身在橫店拍攝劇集《女相》,今年5月,將正式以高出無綫七倍人工,過檔王維基的「城市電訊」做一姐。

宣萱
去年初拍完《飛虎》後,宣萱同無綫約滿,先後於內地和新加坡拍劇。早前她在上海拍攝劇集《祥子的故事之新都市人》,被同劇演員王兆祥力斥「扮大牌」、「黑面」兼「遲到」,事後宣萱反擊,指劇組拖欠酬金,更被要求出席飯局。

郭可盈
誕下女兒後,郭可盈明顯減產,只間中出席剪綵活動和接拍廣告,近月被王維基積極招攬,將大有機會復出幕前。 ####

 

 
我要湊女呀!(設計對白)


戚其義(左)及周旭明(右)在《金枝2》中大玩同性戀情節,在節目巡禮宣傳片中,已安排兩位女主角鄧萃雯及蔡少芬拍攝一場床上接吻戲,意識大膽。

 
○四年,樂易玲一手策劃視后頒給黎姿,事件令到鄧萃雯與無綫接近反面,事後兩人仍有芥蒂。


李添勝做埋今年就退休,連最佳拍檔都唔做,鄧萃雯對無綫已沒有任何留戀。


蔡少芬視女如命,連去橫店拍劇都帶住個女去開工。


鄧萃雯自從去年拍完《義海豪情》後,便再沒有接拍無綫劇集。


12年黎姿嫁人,阿佘、林保怡離巢,《金枝2》得番鄧萃雯同陳豪肯拍,再加埋戚其義愛將蔡少芬,卡士比第一集有距離。


04年


近年在大陸拍劇的鄧萃雯,在《新還珠格格》中做皇后,結果成功彈出。


早前吳綺莉主持的節目反應極差,但無綫唔介意,更簽約成為她經理人。


曾是亞視一姐,已嫁人的陳煒,大家以為她已退休,點知被無綫睇中,叫她復出拍劇。









    stacylife 發表在 痞客邦 留言(0) 人氣()