教練專登加速,水泡隨即拋起,詩雅作最後努力希望唔好「反艇」! 

小報告

Amazing Summer

近期日日落雨唔想出街,不過暑假話咁快過咗一半,唔趁放假玩餐飽真係對唔住自己!
學生唞暑鍾意行街睇戲唱 K,明星放暑假又有乜做?外表柔弱的衞詩雅,原來放假最愛出海玩,唔只曬太陽咁小兒科,而係指定要玩極限水上活動;忙住拍戲的陳嘉桓,迷上近期大熱的半空瑜伽,寧願瞓少幾個鐘都要抽時間上堂!至於球迷恩物,梗係上週有 4隊英超球隊嚟香港友賽,買飛入大球場坐定定,睇住超級球星喺你面前踢波,好 amazing呀!

 

 


用快艇拖行嘅水泡左片右片,對眼被水花濺到擘唔大嘅詩雅,搏命捉實手柄。 

隻手攰到冇晒力,詩雅決定放手跌落海! 

衞詩雅玩轉高速水泡

完宣傳書展推出關於鑑證鑽石的新書《鑽研》,衞詩雅( Michelle)終於有得放假!弱質纖纖的詩雅,自細已經常出海,原來佢仲擁有潛水牌、救生員牌同船牌,都夠 amazing喎!

「我打咗幾個筋斗!」


喺泰國玩過香蕉船,但詩雅最初上蕉都有少少驚,更坐錯方向,要教練 John提佢調番轉。 

上週三( 24日),詩雅到西貢榕樹澳的漁排試玩「高速水泡」,第一次玩特別興奮,詩雅趴在水泡上笑晒舉 V,但玩完先知唔簡單,「初時以為個水泡好小兒科,原來滑行時可以好高速,尤其係掟彎嗰陣!同埋隻手要好用力捉住個手柄,最後會因為冇晒力而要被迫放手落水!我打咗幾個筋斗先落到水,雖然好似有少少整到條腰,不過超刺激好好玩!」
17歲已考獲救生員牌,詩雅話最愛的假日節目就係同全家人一齊出海,「我爸爸有隻艇,我哋一放假,爸爸就帶我同家姐細佬出海,佢會專登揸去一啲冇人嘅小島,我同細佬游水、家姐同媽咪釣魚,爸爸就打魚!」
熟水性,但詩雅亦曾經遇過驚險事,「兩年前我去菲律賓考潛水牌,咁啱當時印尼海嘯,好在我哋潛嗰邊冇受影響咋!」

估佢唔到有船牌

玩水上電單車要有船牌,好在詩雅 23歲已考獲船牌,單獨揸都冇問題,仲愈揸愈快,好大膽!

$600 1粒鐘

詩雅試玩的「高速水泡」,可以喺西貢榕樹澳的「魚樂會」玩,教練 John話水泡可控制速度,快慢都得,大人細路都可以玩,亦可兩個人攬住一齊玩,收費$600一小時(可玩滑水、香蕉船及水泡)。

Flyboard冇得玩


《忽然 1周》圖片 

早前由外國引入的 Flyboard,由於可以由水面彈高至十幾呎,略帶危險性,現時海事處正檢討係咪要攞牌,暫時唔畀玩!

追星熱點

圈中唔少藝人鍾意出海玩水減壓,成個夏天流流長,分分鐘有機會同巨星齊齊游水曬太陽!

張家輝乾曬 南灣


《蘋果日報》圖片 

44歲家輝練出一身結實肌肉,早前更約埋男性朋友去南灣曬足兩個鐘太陽。

余文樂滑水 大潭


網上圖片 

熱愛水上運動的樂仔,唔使開工即到大潭滑水,又帶埋海豚吹氣水泡,夠晒童真!

李璨琛船 P 赤柱


《壹週刊》圖片 

做了潮牌老闆的李璨琛(右),之前同大班朋友到赤柱船 P,更精力旺盛玩通宵!

潮去棕櫚灘

當大浪西灣、浪茄都 out晒,原來潮人𠵱家愛去位於大嶼山長沙中的一個新興泳灘棕櫚灘曬太陽。雖然屬新熱點,但棕櫚灘唔似大浪西咁隔涉,可以經東涌搭 11、 23或 A35巴士,或在梅窩碼頭乘 1、 2、 4或 A35巴士在長沙蝶崗下車。

陳嘉恒愛上倒吊


Rose唔使三兩下已可倒吊扮 Batman,而且 hold住成分鐘都冇嗌攰。 

詩雅超愛水上玩意,反而剛拍完新戲《販賣愛》的陳嘉桓( Rose),就寧願室內運動好過,好似佢近期愛上玩無重半空瑜伽。 07年開始在紐約興起的半空瑜伽,同一般瑜伽唔同,要透過彈力布做出唔同花式, Rose話少啲平衡力都唔掂。「我手長腳長,有啲花式係比較難做到,但有啲動作反而倒吊咗先做到,例如我練咗好耐都練唔到嘅倒立,喺呢度用條帶幫手就好易做到!」

玩完鬆晒

有多年教瑜伽經驗的導師 Ruby,認為 Rose夠後生又手腳靈活,好容易上手。有武術底的 Rose,學了兩堂已經可以做出高難度動作,凌空一字馬、倒吊扮 Batman都難佢唔到。「有時做嘢太長時間,條腰會好痠痛,咁啱媽咪呢排開始玩半空瑜伽,咪叫埋我一齊學囉!最初以為好簡單易做,點知原來要平衡唔跌都好難,而且某啲動作好複雜,平時用唔到嘅肌肉都會郁到,所以玩完後成身都鬆咗好多,嗰晚仲會好好瞓!」


呢下望落好易,其實單靠條帶承托全身係相當困難, Rose試咗三次先成功做到! 

有啲動作難度太高, Rose都要靠導師幫手。 

愈玩愈高?Rose話玩完會扯高 1cm左右,門後有一條條標記,係學員上堂前後的身高紀錄。

潮玩 CrossFit  non-stop喪操


香港有 5間 CrossFit訓練中心,中環、西環及鰂魚涌等都有得玩。 

除了半空瑜伽,香港近期還興起一種新運動 CrossFit。 70年代開始在美國興起, CrossFit以小組形式進行,由 10至 20人組成,並由兩名教練設計運動組合,每次的組合都會唔同,例如舉重加跳繩、跑步加吊環,主要是訓練體能、爆發力及柔韌度等,室內室外亦可進行,而學員要不間斷以最快速度完成動作。香港暫時只有 5間 CrossFit訓練中心,每堂價錢由$250至$700不等。

英超星閃爆大球場

明星有星級活動,至於一班本地波牛,今年暑假必做一件事,梗係英超球隊訪港,要去朝聖啦!先有曼城、熱刺、新特蘭參加英超挑戰盃,再有紅魔鬼曼聯同傑志啱啱於週一( 29日)踢友賽。波幾時都有得睇,最難得反而係可以近距離同球星接觸,合照攞簽名。 3隊英超隊事先張揚入住灣仔君悅酒店,而且出出入入都肯幫球迷簽名,反而曼聯貫徹神秘作風,抵港前一日(上週五)都未公布住邊,搞到粉絲唔知點追星!

23/7直擊 3大萬人迷

 


巴利唔睬盛傳過檔皇馬嘅熱刺球星巴利,全程 cool爆,上落隊巴例牌講電話,時運高睇球迷唔到! 

阿古路齋簽曼城前鋒阿古路肯幫球迷簽波衫,但合照免問,嗱嗱聲簽完即走! 

阿當莊臣任影新特蘭球員最親民,阿當莊臣、奧沙等極有耐性,簽完名仲同球迷逐一笑晒合照,抵讚!

推 job見粉絲

雖然貴為全球最受歡迎球會之一,但早前朗尼已經因傷退出亞洲之旅,日本國腳香川真司又甩底,加上另一焦點尹佩斯一度傳出有傷唔嚟,嚇死一班買晒飛嘅球迷,好在虛驚一場只係輕傷咋!
其實尹佩斯好鬼有 heart,為咗可以嚟亞洲踢波見粉絲,推晒其他商業活動,粗略估計唔見咗幾千萬港紙!有錢唔賺,香港球迷冧爆!

許志安即時撲飛


《蘋果日報》圖片 

前排 Big4喺英國開騷,我都抽時間去睇咗場歐霸!今次一知道曼聯嚟香港,第一時間托朋友買飛,不過未知嗰日使唔使開工,希望睇到啦!

星之 Summer

 


馬國明操肌「暑假主要拍劇,忙到連曼聯嚟香港都冇得睇,不過呢排興大隻,我都會抽時間做 gym!」 

鍾嘉欣練跑「暑假就梗係要睇我個演唱會啦!但我都會跑步同游水,同埋要開新劇!」 

吳尊野餐「會帶屋企人去海灘 picnic,享受一個充滿陽光嘅家庭日!最緊要有杯意大利雪糕畀我歎!」 

周秀娜推油「每年夏天一定要同心愛嘅人去泰國推油做 spa,今年冇男友,惟有帶媽咪去!」 

採訪、撰文:湯勵貞
攝影:娛樂組
場地提供:魚樂會、 Lithe Yoga 

    tvb4life 發表在 痞客邦 留言(0) 人氣()