翁靜晶追邵氏分紅:冇5,000萬都有500萬

上月因病離世的功夫導演劉家良昨晨出殯,眾多好友、徒弟及後輩前來送別,遺孀翁靜晶致悼詞表示將以師傅名義成立慈善基金,幫助武師及電影界人士,卻突然爆出多年前劉師傅與邵氏簽下分花紅合同,卅年來得不到分文,希望邵逸夫可「分紅」支持基金。



劉家良昨日舉殯,卻爆出翁靜晶在靈前向邵氏追分紅。

一代宗師劉家良昨晨在世界殯儀館出殯,遺孀翁靜晶、六女一子及大批徒弟到場最後送別,治喪委員會主席陳百祥(阿叻)與太太黃杏秀、徒弟鄭少秋與冼國林、好友唐佳、曾志偉、石天、麥嘉、王羽、陳寶珠、馮寶寶、倉田保昭、吳思遠、錢嘉樂、劉偉強及財爺曾俊華等亦有到場。

成立基金助同行

劉師傅從影數十年,1975年起在邵氏擔任導演,拍下多齣經典電影《神打》、《洪熙官》、《少林三十六房》及《十八般武藝》等,一直合作無間,遺孀翁靜晶昨日在二百多名親友前,爆出劉師傅沒有收過邵氏分紅,並在進行瞻仰遺容前致悼文,施軟功向邵氏追「分紅」!她說將成立劉家良導演慈善基金,幫助武師及電影界人士:「咁多年來,好多武師有病冇錢醫,殮葬費都可能冇,劉師傅希望幫到電影界嘅人,推廣中國武術,我率先捐出一百萬元畀基金。」


三隻白色孝獅在一代宗師劉家良靈前作三跪九叩儀式。

八位好友為劉家良扶靈。

其後指師傅與邵氏簽下不少合同,包括有國際花紅及香港花紅,但卅年來沒有收過分文,翁靜晶說:「相信邵逸夫好仁慈咁儲起呢筆錢同拎去投資,冇5,000萬都有500萬,希望邵氏支持基金,捐一筆錢!」她問現場人士「好唔好」時,全場拍手附和,她再激動地說:「今日講呢番說話好需要勇氣,好在得仔女支持,今日唔講冇機會講,希望邵逸夫聽到呢番說話,你唔會蝕0架!將師傅嘅戲重新包裝一次,可以再賣過錢0架!」全場即拍掌及嗌好。


劉家良長女萬儀(左)及兒子永強(右)分別拿着亡父的遺照及靈牌步出殯儀館。

放大圖片

之後翁靜晶與兩名女兒及冼國林出席解穢酒,問及追討花紅是否師傅遺願?她說:「呢件事師傅放喺心入面,係未了心願,希望今次機會還佢心願,錢唔係畀我,係畀基金,我咁窮、賺錢唔多嘅律師都出一百萬,邵逸夫一定可出更大嘅力。(有冇合同證明?)當然有,至於咩形式呢?王羽都有嚟,佢同合同有好好聽嘅故事,但我唔詳細講,師傅有好多呢種合同,有啲冇年期,佢當時法律常識唔好,成日以為永久性,對佢演藝發展都有顧慮,合同話有花紅分,畀到我哋好靚好憧憬嘅畫面,但原來得唔到。」

師傅豁達肯吃虧

多年來有否作追討行動?她指師傅為人豁達肯吃虧,並多次說相信是邵氏「睇漏咗」:「記得番咪好囉!(訴諸法律?)唔講呢啲,一定係睇漏咗,等佢哋睇清楚,會計計數都要時間。」期間她提及一樁監製戚其義(其實是幕後人員阮繼志)與師傅的事件,帶出娛樂圈的現實,希望可幫助同業。翁靜晶更自嘲追數失禮:「師傅有大男人胸襟,唔似我小女人咁小器,我都覺得失禮,希望大家包容。(搵阿叻做中間人?)唔需要,當我細路仔唔識世界,就算改名做邵逸夫基金都冇所謂,只要幫到人。」她表示六叔及六嬸方逸華多年來也沒有聯絡他們:「人窮思舊債,可能計完係冇嘅,都冇所謂,不過大家賓主一場,想佢哋參與基金。」而她在靈堂時又提及劉師傅於2007年息影,但其實早在1986年拍《南北少林》已差點「畫上句號」,幸得麥嘉幫忙。

而徒弟黃杏秀回憶往事,大讚師傅「好犀利」:「當年打到嘔,但佢從來唔鬧人,只係對招式要求好高。」劉偉強表示由1981年開始跟師傅合作,第一部戲自己只在邵氏做小工,覺得他似巨人,度招好快:「以前啲人拍戲要較快一格,但佢要較慢廿六格。」

文:影視組

黃家禧:公道自在人心

劉家良生前為邵氏拍過《洪熙官》、《少林三十六房》等賣座電影,翁靜晶昨於靈堂上向邵逸夫追溯卅年來劉師傅為邵氏拍戲的電影花紅,就此致電邵氏高層黃家禧,他回應說:「我講兩樣嘢,一、你哋信唔信呢?二、我冇嘢回應。」記者再三追問,最後他回答:「公道自在人心」,然後表示要去睇醫生而掛線。



陳百祥(右起)、李琳琳及姜大偉送劉師傅最後一程。

就劉師傅遺孀翁靜晶揚言多年來未有收到有關之花紅及手持所簽的合約,律師黃國桐說:「因為呢啲係屬於遺產一部分,家屬絕對有權追討。」但要釐清合約中「花紅」的定義,他說:「通常款項嘅追溯期係七年,如果喺有效期內未有追收過款項,對方有權指追索期已過而拒絕還錢。」


黃家禧

三孝獅叩別 旗隊開路 一代宗師上路

劉家良昨日舉殯,眾親友早上冒雨抵達靈堂,徒弟鄭少秋更提早到場幫手,他直言掛念師傅睡不到,大殮儀式進行時,先由另一徒弟冼國林帶領三隻孝師做三跪九叩儀式,並圍着靈柩行了一圈,瞻仰遺容後,遺孀翁靜晶與大女萬儀、細女幸儀站於靈柩旁,翁靜晶雙手合十、鞠躬,期間更撫屍痛哭,場面傷感!



鄭少秋一臉肅穆手持大旗。

儀式由僧徹大和尚主持,封棺辭靈後,由八位生前好友麥嘉、曾俊華、倉田保昭、姜大偉、陳百祥、戚冠軍、唐佳等扶靈,劉師傅兒子永強則捧着亡父靈牌、萬儀拿着遺照步出靈堂。靈柩移奉靈車後,三孝獅叩別,有徒弟徒孫傷心飲泣,之後冼國林拿着「一代宗師」大旗,帶領三獅,由鄭少秋、陳嘉桓等六男六女組成的「十二金仙」持大旗開路,在殯儀館門外行了約大半個圈後,靈車便駛往東華義莊停放靈柩,再擇日火化。


陳嘉桓持旗前進。

所有儀式完成後,翁靜晶於紅磡擺解穢酒,有出席的陳百祥被問到有關翁靜晶向邵氏追花紅一事,他說:「我都係第一次聽。(係咪劉師傅遺願?)冇聽過,呢啲咁親密嘅嘢,可能只係同佢(指翁靜晶)講,我冇意見,呢啲私人嘢。(做中間人?)唔會嘞,都唔係我做,師傅出殯我嚟幫手,今次喪禮咁圓滿,係師傅師母嘅福氣。」

 

文章標籤

創作者介紹
創作者 tvb4life 的頭像
tvb4life

明星八掛大分享★☆

tvb4life 發表在 痞客邦 留言(0) 人氣()