巡星舖

初戀嗱喳麵

嗱喳麵係香港地道嘢食,梗有一兩間係左近。今次媽咪姐就踩落佐敦廟街,試下「 903富婆」阮小儀開嘅車仔麵有幾掂。小儀嘅「麵麵店」,開業年多, sell平民價錢。而主打嘅嗱喳麵就玩多元化,除咗湯底有 4個選擇,連配料都成 50種。加上湯底味道清新,餐廳環境光鮮,總算食到初戀感覺。

 

約一千呎嘅舖頭,可容納 50多人。日式摩登風格設計嘅舖面,以木枱配襯,簡約舒服,不過高身吧枱就坐到好攰。


我經營得好辛苦㗎!(設計對白) 


早前小儀搵埋老死金剛落舖試食,影埋相擺微博宣傳。

 

兩餸嗱喳麵 $24
賣相︰★★
味道︰★★★★
價錢︰★★★★
魚蛋蘿蔔嗱喳麵配料 8蚊份,唔算特別平,不過好足料,魚蛋都有 5粒。粗麵彈牙,清湯底清甜帶魚味,感覺冇乜味精。

 

豬扒麻辣撈麵 $38
賣相︰★★★★
味道︰★★★★★
價錢︰★★★★
已經撈好嘅麻辣麵爽口入味,唔係得堆醬自己撈。即炸豬扒夠香口,又唔會好油,切件上夠細心。配埋青瓜絲、木耳同酸菜,清新醒胃。

 

麻辣豬腸頭 $25
賣相︰★★★★
味道︰★★★
價錢︰★★★★
豬腸頭除咗有頭尾,亦有中間部分,名不副實。味道偏濃,只有少少麻,唔算太辣,唔似食緊麻辣嘢。不過豬腸軟韌適中,口感唔錯。

 

手打蝦餅 $30
賣相︰★★
味道︰★★★
價錢︰★★★
蝦餅賣相同坊間一樣,冇乜驚喜。入口較油,不過勝在彈牙,蝦味濃郁,十足十手打。而醬汁就好失望,好似酸醋咁,媽咪姐覺得用青檸會 fresh得多。

 

菜脯任食
嗱喳麵舖唔似一般舖頭只有辣油供應,仲有自製菜脯任食。加上蒜茸、辣椒嘅菜脯,甚為惹味、有咬口,撈麵一流。

總結


柯打紙標價清晰,埋單唔會拗數。 

「麵麵店」位於佐敦廟街,價錢合理。食物款式多,有飯有麵,仲有埋 OL最愛嘅鮮果沙律。最吸引係有齊香港地道街頭小食,煎釀三寶仲係即炸嘅,唔似得平時炸定攤到凍晒。不過食物賣相仲有進步空間。

文章標籤

創作者介紹
創作者 tvb4life 的頭像
tvb4life

明星八掛大分享★☆

tvb4life 發表在 痞客邦 留言(0) 人氣()