探熱針

周美鳳興訴訟 告甄子丹助手違約

由幕前轉型從商多年的周美鳳( Lelia),在公關界頗為吃得開,鮮有與人交惡,近日她卻對兩名已離職的員工發律師信,指對方毀約。據知,其中一人已於今年六月,轉做甄子丹助手。
「我都係迫不得已先行呢一步,其實我好痛心,生意冇咗可以搵過,但共事多年嘅感情付諸流水,先真正 hurt到我。」周美鳳說。

子丹助手惹官非

甄子丹埋林建岳碼頭合作開公司做老闆,要大展拳腳,公司增聘人手配合,當中包括一名上月入職做助手的周美鳳前員工吳小姐。本刊向周美鳳求證,這位前員工是否違約,她直認不諱:「詩詩(甄子丹太太)一早知道吳小姐喺我公司做,只係唔知我哋有官司糾紛,同詩詩識咗好多年,我應該實話實說。」
據了解,周美鳳已於較早前分別向姓吳及姓王的前員工發出律師信,亦正跟律師商討,控告兩人毀約的細節。
「呢兩個同事跟咗我幾年,都係 senior,有個仲係經理級,公司運作好 open,我一直抱住用人勿疑、疑人勿用嘅心態,同員工感情好好,當佢哋係一家人,估唔到會搞到今日咁嘅局面。
「佢哋突然先後離職,仲要話走就走,都冇所謂,你出到去大公司有更好發展,我都戥佢哋高興;但合約講明離職後要過冷河九個月,點知佢哋出去打工唔夠半年,兩個人就合組開咗間 Grand PR Company Limited嘅公關公司,明知咁樣係違反合約,同舊公司有利益衝突都要做,係誠信出現問題。」聽從律師專業意見後,周美鳳決定出信,訴諸法律。


周美鳳與汪詩詩夫婦相識多年,甄子丹最近請了周美鳳前員工 Natalia做助手,想不到新助手竟然涉違約惹官非。 

周美鳳自言一向對員工情同手足,想不到 Natalia(右)離開公司之後會反轉豬肚,令她很痛心。 

甄子丹與林建岳拍檔組電影公司,遂請了有公關經驗的 Natalia做助手。

一年一度起飛腳

顧念一場賓主關係,周美鳳出律師信亦只要求二人將公關公司關閉便不再追究,對方需於發信後一星期回覆,結果隔了兩個月,也沒有聲氣,周美鳳於是再發律師信,要他們提交關閉公司的證明。
「吳小姐竟然以 Email通知我,話會將公司關閉,但就要我自己搵律師去攞證明;我個律師提議由他打電話俾吳小姐問清楚,點知佢一聽見律師打嚟,就借意收線。去到呢個地步,律師最終都勸我唔好感情用事,要用法律嚟攞番個公道。」周美鳳說。
周美鳳表示已不是第一次被員工起飛腳,去年初,亦有兩名員工相隔一個月先後離職,再自組公關公司 RED Interactive,又撬走她合作多年的客戶一田百貨。


2010年周美鳳請來當年緋聞男女羅仲謙及傅穎為一田百貨推廣活動做嘉賓;而日前一田的泳衣騷,已由叛將成立的 RED Interactive做搞手。 


周美鳳的前員工 Natalia與 Cory離開公司不到九個月的冷河期,即合組 Grand PR Company Limited,明顯違反合約規定。 

選美出身的周美鳳轉型搞公關公司已十多年,口碑不俗,贏得不少名人紅星的尊重。 

後患無窮

藝人同經理人、助手關係,隨時比家人更親密,但過分信任,招致後患無窮,最近期的例子,有中風失財的劉家輝。
2011年中風後,身為貼身助手的馮映華 Eva即使仍有照顧右邊身癱瘓的劉家輝,但態度明顯變差,又不時對他呼喝,明知對方急需現金醫病, Eva去年尾卻突然辭職,更被揭發私吞了劉家輝 200萬酬金,睇唔過眼的樊奕敏於是出手,入禀高院向 Eva追討,最終法庭頒令,要 Eva三日內交出 200萬款項由法庭保管,劉家輝每月可從中獲 15萬,作醫療及生活費。


撰文、攝影:娛樂組

    tvb4life 發表在 痞客邦 留言(0) 人氣()