亂市出擊揀靚股

財演舞台 我的心水股

香港人愛買股票,不少師奶每天都收看財經節目,向嘉賓問走勢拿「冧把」。這些嘉賓,就是大家口中的「財經演員」。早前,財演一姐——青姐(胡孟青)更撈過界,為快餐店拍廣告,人氣高漲。下半年股市波動,本刊決定「晒冷」,找來市場人氣最高的十個財經演員,點評大市,並選出一個心水股。各位粉絲,拿定紙筆。開 show﹗

陸叔(陳永陸)裕陸控股創立人

「五窮六絕,港股已經跌到好絕,估計七月跌到二萬點就會見底,下半年會好啲。依家市場已經反映晒美國退市、中國經濟差嘅憂慮,到佢哋發現美國無咁快退到市,而中國又推出政策推經濟,下半年恒指有機會上返去 23,000。我睇好復星國際( 656),阿里巴巴就嚟重新上市,佢哋合作投資搞物流,對股價有刺激。」

青姐(胡孟青)獨立股評人

「中國經濟軟着陸或硬着陸對下半年股市影響好大,十月底嘅『三中全會』會俾到方向,但恒指年底前應該上唔到好高位, 24,000好大阻力。揀股最好避開啲受 QE影響好大嘅股,老牌上市公司合興集團( 47)前排沽出唔賺錢嘅食用油業務,專注連鎖快餐『吉野家』同 DQ,又一路增設分店,相信都對股價有幫助。」

柏文 BB(孫柏文)獨立股評人

「股市下半年應該先跌後升,依家投資者心態係草木皆兵。估計捱過六月後,如果經濟仍然缺乏動力,九月、十月可能又嚟 QE,對於股市嚟講係一個利好因素。我睇好珠江鋼管( 1938),因為美國要大力發展天然氣及頁岩氣,管道供應一定唔少得,所以呢隻實升。」

郭 Sir(郭思治)耀才證券市務總監

「未來半年股市唔會好差,因為中國經濟放緩後,政府實出招放水,港股會被帶動。預計下半年港股可上到 23,521至 23,944點。城鎮化依然係內房股嘅動力,尤其是中國海外( 688),投到兩幅啟德地,前景會幾好。」

沈大師(沈振盈)匯訊證券行政總裁

「下半年股市恐怕會極度反覆,最終好可能都係低收,恒指最低可能去到 19,000,最高都唔會過 24,000。因為依家息口唔明朗,唔理美國退唔退市,全球經濟喺短期內都改善唔到。如果揀股,我鍾意銀河娛樂( 27),因為澳門賭業喺經濟低潮都係比較繁榮。」

Matthew(郭家耀)中國銀盛財富管理首席策略師

「下半年嘅股市應該幾波動,可能跌穿 19,000,但如果美國唔咁快退市,恒指較大機會回穩,仲有可能上到 24,000。我睇好蒙牛乳業( 2319),香港推行『限奶令』,加上內地奶源安全提升,國內奶粉市場銷售量有望提升。」

Kitty(陳蓓敏)鴻昇證券資產管理部董事總經理

「六月尾呢兩個禮拜好重要,如果恒指保得住 20,900都算理想,如果跌破 20,800就要小心。總括嚟講今年整體都係頹市, iBond對股市資金投入嘅影響都唔細,中國整體 GDP目標亦下調,會揀涉及化工原料嘅股票,中國石油化工( 386)比較穩陣。」

Michael(黃敏碩)康宏證券及資產管理董事

「下半年主要睇內地經濟政策,因為美國對香港股市影響愈來愈細,恒指未來好波動,上落可達 15%,高位可能到 24,500,低位 21,300。估計內地未來會谷內需,唔會好似○九年咁純放錢。所以,科網股同新能源等前景應該唔錯,我睇好做手機及電子零件嘅中國無線( 2369)。」

股壇師奶殺手(鄧聲興) AMTD證券及財富管理業務部總經理

「下半年習李新班子會有動作催谷經濟,美國聯儲局亦唔會咁快退市,股民唔使咁擔心,下半年的股市行情會唔錯,有望上到 24,000點。我比較睇好騰訊( 700),因為受外圍影響較細,而且下半年阿里巴巴可能重新上市,會帶動科網股。」

主播殺手(黃偉康)獨立股評人

「港股估值唔貴,我諗半年結基金拆完倉後,資金會回流港股,所以下半年高位會重上 23,000至 24,000點。依家美國經濟復甦,怕加息、怕美元升,所有資源股、地產股都無運行。另一邊又怕中國硬着陸,唔敢買中資股,唯有揀啲受惠美國復甦嘅股票。雖然利豐( 494)難再上番高位廿六蚊,但以現價十一蚊,上番十四蚊都好。」

    tvb4life 發表在 痞客邦 留言(0) 人氣()