太爛玩

怪獸大學佔領時代廣場

想睇電影要等到 7月中,不過要同一班戲中主角見面,就唔使再等喇。
《怪獸大學》驚現時代廣場,除咗仔細重現戲中場景,更加唔少得多隻毛毛同大眼仔嘅大型 3D公仔,勢必成為影相熱點。
大家預咗繼黃色鴨仔之後,會輪到俾藍色毛毛同綠色大眼仔喺 facebook洗版!

大閘聳立七彩校園

時代廣場地下露天廣場屹立「怪獸大學」大閘,氣勢逼人。行入校園,見到環境營造到好似真嘅大學校園一樣,鋪上人造草皮,三棵橙色、紫色同藍色大樹,立即令整個校園充滿怪獸大學嘅感覺。值得一讚嘅係花園內嘅建築物,包括大學教學大樓、噴泉等等,像真度甚高。而最引人注目就係一班實物原大嘅怪獸專員,包括最為人熟悉的毛毛、大眼仔及變色龍,令廣場變身為「怪獸學府」,成為大人細路嘅影相天堂。


充滿怪獸氣氛的校園,搞到銅鑼灣好似美國校園。 

合照時要有品,千祈唔好傷害到班怪獸呀。 


戶外毛毛是塑膠製,毛茸茸版本在二樓大堂。 

怪獸大學學生證,到此一遊必影照。 

19隻大眼仔上堂

商場二樓大堂則以宿舍及講堂場景為主題,分為四個部分。壁報板掛上多幅《怪獸大學》角色草圖,又有電視播放電影的幕後花絮等製作片段。再入內參觀大學嘅宿舍房間,擺設布置就好似套戲入面嘅睡房一樣,有床有書枱,仲可以見到大眼仔同毛毛苦練驚嚇絕技。
另一個展區布置成大學講學堂,上堂嘅係 19個大眼仔!不過個個造型不同,原來展覽特別邀請全球藝術家創作自己心目中嘅大眼仔,來自世界各地 20位藝術家嘅手筆,每隻各有特色,將大眼仔融入各國文化,十足扭蛋系列, Fans一定想捧返屋企呀!


找來藝術家為大眼仔改頭換面,但係點解部分會被改到咁邪惡? 

雖然今次主題係《怪獸大學》,不過《怪獸公司》點都會出現一下。驚嚇部可以俾你體驗喺怪獸公司工作嘅感受喇。 

企喺大眼仔後面同佢一齊對鏡練習嚇人再自拍,港女行為?

可以一窺毛毛睡房,已經好難得,想好似 model咁瞓上佢張床? Sorry,商場基於秩序理由,暫時唔開放,大家只係可以遠距離拍照留念。 

May、 Ray19隻大眼仔各有特色,特別喜歡日本風格的,好有驚喜。 

貝貝、 Terry因為好鍾意《怪獸公司》,尤其係毛毛,所以展覽開始第一日就嚟睇。

 

《怪獸大學》展覽盛會
展覽日期:即日至 7月 16日
時間: 10am-10pm
地點;時代廣場露天廣場及二樓大堂

直落迪士尼 做怪獸學生證

想體驗毛毛同大眼仔嘅校園生活,仲可以去到迪士尼樂園。樂園將動畫藝術廊變身「怪獸大學行政大樓」,利用手機應用程式更加可以將牆上嘅宣傳海報變成手機上的動畫,有得睇又有得玩。
要加入怪獸大學,點少得一張學生證?喺行政大樓就可以整一張獨一無二嘅怪獸大學學生證,影嘅時候唔使正正經經,扮吓鬼臉,或者同朋友一齊影都無任歡迎。樂園為咗歡迎新生,推出多款以毛毛同大眼仔為藍本嘅特飲同食物,藍藍綠綠都幾古怪,不過造型贏晒!


喺門口等到一身汗,一入到行政大樓內可以同毛毛大眼仔合照,小朋友特別興奮。 

喺行政大樓影張證件相,再過隔籬沖印店揀設計,就大功告成,盛惠$40。或者可以跟迎新套裝一齊買,$238有埋怪獸 Lunch Box,大眼仔漢堡幾得意。 


玩呢個 Apps要俾啲耐性,要對準個 QR code感應先有得睇,個人最喜歡呢段大眼仔唔夠高影證件相,夠寫實。 


大眼仔造型棉花糖$32,青蘋味算清新,不過溶得好快!

 

《怪獸大學行政大樓》
日期:即日至 9月 1日
地點:迪士尼樂園
時間: 10am-9pm


撰文:關錦雯
攝影:胡春輝
模特兒: Rachel Chan@Pure Models
mailto:hotpot@nextmedia.com

tvb4life 發表在 痞客邦 留言(0) 人氣()