我無欠租㗎!(設計對白) 

中環人語

公司欠租 張震遠豪宅逍遙

啤梨張自從生意失敗要「裸辭」後,連返商交所打躉都少咗。數碼港已於六月中入稟法院,追討逾七百萬租金和利息兼收樓。啤梨張返工做「租霸」,收工後就返去淺水灣道豪宅繼續歎世界。佢自住及隔籬租俾阿媽住嘅兩間豪宅,月租加埋要三十四萬,月月都準時交租。

 

最近小宗聽聞呢座六層高嘅豪宅有盤放租,即刻 call經紀去睇盤。原來,個放盤喺正啤梨張樓上。呢座樓齡超過半世紀嘅豪宅,每層分 A、 B室,各三千餘呎,望正淺水灣沙灘。不過,啤梨張自住嘅 B室就有棵樹阻咗少少景。單位最正係個近百呎嘅大露台,聽講啤梨張最愛坐在露台,食住雪茄,望住個海「度橋」。夏日炎炎,小宗企喺露台,幻想自己係啤梨張,橋就諗唔到,只係望到遠處沙灘,有幾個三點式女郎喺度玩水,春光無限。
話說啤梨張嗰兩個單位今年十月就租約期滿,業主湯君明話未傾續租,所以未諗到會唔會加租。去年底啤梨丁母憂後, A室得佢家姐住,但聽聞姊弟關係麻麻,水緊嘅佢相信顧得自己,亦顧唔到家姐了。


啤梨屋企同圖中的間隔一模一樣,連個淺水灣景都一樣咁靚,只係多咗少少樹景。 

豪宅明明有洗衣房,但張家愛於露台晾曬衣物。 

最靚 CEO變「雙失」中女

有「鐘錶女王」之稱嘅胡敏珊,過去數月突然喺社交圈「消失」,最近更被踢爆盤生意好唔掂,欠租、人工達百幾萬。模特兒出身嘅胡敏珊,曾經同代理美國名錶 Philip Stein嘅鐘錶商人毛志輝拍拖,飛上枝頭後轉行賣錶,事業、愛情皆得意。分手後,胡敏珊繼續富貴,創辦平價錶品牌 Chouette,自己做生招牌。不過,拿過呢隻錶來賣嘅行家話:「呢隻錶嘅毛利雖然都有三成,同勞力士一樣,但後者一隻要十萬、八萬,佢一隻只係二千蚊,賺得嗰六百蚊,真係唔知要賣幾多隻先交到中環咁貴嘅租金。」
生意失敗,愛情亦得個「桔」。今年初,四十一歲嘅胡敏珊被影到搭上細佢十年嘅動作演員杜宇航,男方為呢段愛情,不惜犧牲事業。不過,小宗老友透露,佢哋已分手,並齊齊潛水。小宗都要慨嘆一句,花無百日紅,幾時都係留番條後路穩陣。


胡敏珊雖已四張嘢,但仲 keep得好好,同杜宇航甩拖後,相信亦不愁寂寞。 

湯君明大戰扶乩道士

講開炒家湯君明,呢期佢最「關心」嘅唔係租客或市道,而係一班道士。上星期,佢急 call小宗一齊去高院聽審。查實呢幾年,以佢為首嘅一班壇生(即道觀嘅信徒),一直同元朗金蘭觀嘅道士打緊官司,前後加埋起碼有八單官司仍在進行中。
自認食飽飯無事做嘅湯君明,話十年前跟老友去呢個道觀度聽道、學氣功,仲捐過唔少錢。當時,金蘭觀爭緊道觀佔用嘅三萬呎地皮,向新世界提出逆權侵佔,搵咗湯君明去同新世界嘅堅叔(梁志堅)講數。最後,不但被堅叔省到立立令,官司仲輸埋。呢件事亦點醒佢,覺得道觀嘅管理好有問題,終於搞到反晒面。湯君明入稟告幾個話事嘅壇主,乜都信扶乩,仲話「天職神委」,唔跟公司法選主席等,對方就反告其誹謗。告來告去,搞足兩年,但大把錢嘅湯君明誓要將呢班壇主拉落馬咁話。

Give me a break:最貴 VS最平公司治

早排灣仔東來居一碟餐蛋飯賣一百廿八蚊,天價平民餐,引起滿城風雨。小宗有個識飲識食嘅朋友即刻打來報料,話尖沙咀 Hullett House Hotel嘅西餐廳 The Parlour出咗份全城最貴嘅公司三文治,單賣價四百八十元,連埋加一,要五百廿八大元。咁離譜,小宗當然要去試吓。
酒店喺前水警總部,環境古色古香,確實心曠神怡。主角上枱,單計分量就略為失望,點解咁貴?餐廳公關強調,啲餡用咗頂級食材。最貴係中間嗰件,用咗一百克要千三蚊嘅 Balik三文魚,以及伊朗 Beluga魚子醬;右邊嗰件上面有塊日本近江 A5和牛,要成二千蚊一公斤,就連伴碟用嘅水耕菜,都係飛機貨。
小宗第一時間試食,但啲料太厚,一邊食一邊跌,好論盡,仲有啲乾口,可能小宗吃慣平民嘢,竟然覺得壹傳媒五樓 canteen嘅公司治仲好食。有相你睇,都幾靚仔㗎。最重要係,呢份「名副其實」嘅「公司」三文治,只係賣十三大元。心理影響味覺,小宗都唔敢再投訴壹仔五樓飯堂。


呢份就係全城最貴公司治,兩塊貴價三文魚(小圖)用 cold smoke嚟整,但太細嚿試唔真。 

餐廳戶外茶座氣氛悠閒,可遠眺對面海中環景色。 

十三蚊嘅公司治,賣相、味道都唔差。

金牙大狀講嘢


放走斯諾登即是錯過大好機會彰顯司法獨立。正一聰明笨伯。 

錯失良機
689政府以申請遞解斯諾登之文件唔齊為辭,俾洩露美國國家機密之中情局前外判王飛咗去莫斯科,此乃聰明笨伯之做法也。
試想想,若然 689由得遞解令進入司法程序,咁非但可以彰顯特區司法獨立,連第一霸權大國都唔慄。即使三、四年後經過所有司法程序,斯諾登卒之都係要解返花旗,咁呢個都係法官大老爺嘅決定,同 689無涉。
再者,由得遞解令進入司法程序,非但可以彰顯司法獨立,更加證明 689政府尊重司法獨立、不作干預。咁又豈非行政、司法雙贏之局?
689政府捨上上之策而不由,以文件不齊為借口放走斯諾登,此則不由不令人懷疑係唔係屈服於阿爺嘅淫威,有正路唔行而行歪路?《大公報》慌死大家唔知發生乜嘢事,讚揚 689話佢處理呢單嘢之手法,證明佢對《基本法》有高度透徹之了解云云!

中環人語迷你版

“人心不足。”
估中邊個中環人講呢句說話,送你 PNY「變形金剛碟」獨創 90度翻轉掛鉤 Transformer Attaché USB(4GB)一件
有意參加者,請於七月一日 24:00前將答案、姓名及聯絡電話
電郵 mailto:centralman@nextmedia.com
小宗只接受電郵,郵寄免問。

本刊員工及直系親屬不得參加。
為求公平及杜絕偷步搶答起見,請於星期三下午一時後來電郵競猜答案;在此之前發出之電郵作廢。
超過一位讀者估中,先到先得,恕不接受上訴。
答案及中獎者姓名將於一三年七月四日本欄揭曉。

上週人語揭曉

“我將命運交予港人。”
答案:斯諾登
得獎者: Wong Kam Tai
中獎時間: 1:00pm 19/6/13

廣告時間

你有某財團嘅黑幕想爆?你知邊間上市公司造假?
你仲想舉報地產霸權嘅不公?
歡迎你將財金界嘅寃屈或過癮八卦事,爆俾《壹仔》財經組知,一切報料,均會保密!
爆料熱線/whatsapp:6829 5929

tvb4life 發表在 痞客邦 留言(0) 人氣()