媽咪姐

雷頌德爆小方劈腿

雷頌德上周末( 22日)開騷,請來大班歌星好友撐場,鬼咁風騷,仲踢爆方力申同 Stephy(鄧麗欣)已經拍拖 7年,即係 06年開始啦。計落條數,小方同阿嬌 06年被影到去瑞士滑雪,之後 07年拍《出水芙蓉》又傳出兩人翻撻。雷頌德咁講,咪即係話小方當年曾經一腳踏兩船?

 

媽咪姐問番小方係咪同 Stephy拍拖 7年?小方就話:「唔講!( 07年傳你同阿嬌翻撻喎,咁你咪一腳踏兩船?)傳聞啫,咁都計嘅咩!(當時係咪已經同 Stephy一齊?) Um……唔講!(阿嬌近日失戀,有冇慰問佢呀?)唔講!」咦,小方盡得梁特首「十問十唔答」嘅真傳喎!但真相嘅嘢,一早在心中啦。


小方同 Stephy喺演唱會上唱佢哋嘅經典合唱歌,好 sweet㗎。 

媽咪姐同小方傾偈, Stephy特登擰返轉頭偷聽媽咪姐問乜。但當聽到「阿嬌」兩個字, Stephy就即刻彈開,實行明哲保身。 

Dry再次喺紅館獻唱,主人家雷頌德寸拍檔馮德倫冇 taste,馮德倫就話衫同褲都係問 Eason借嘅,認真搞笑。

tvb4life 發表在 痞客邦 留言(0) 人氣()