拍拖買餸上周,袁偉豪和女友馬沛詩着情侶拖鞋到街市買餸。由於有份主演的《好》劇熱播,刻意收埋戀情的袁偉豪,除了和女友齊齊戴 cap帽,有途人行過,袁都自動波耷低頭。 

娛聞樂

𡃁簽無綫儲老婆本 袁偉豪明年娶舞台劇女友

07年香港先生冠軍袁偉豪,捱足 6年,最近終於發圍。在新劇《好心作怪》與 42歲人妻萬綺雯車震加攬啜牀戲,話題性十足。
劇中本有妻子的他,抵受不住引誘搭上人妻,但在現實生活中,袁偉豪卻是個專一好仔。為讓拍拖 3年的女友馬沛詩( Cissy)有個名份,據知近日他成功與無綫簽了親生仔約,儲定老婆本,明年迎娶女友過門。

 


舞台劇撻着袁偉豪和女友馬沛詩三年前合演舞台劇《我不要被你記住》,劇中二人有連場激戰牀戲,結果「上牀」上出真愛。

32歲的袁偉豪,代表作冇乜,反而緋聞一籮籮。外表花弗的他,先後與林峯堂妹林夏薇及龔嘉欣傳出緋聞,但其實他早有正印女友。 3年前他參演舞合劇《我不要被你記住》時,與同齡的拍檔馬沛詩演超激牀戲撻着,之後他索性搬入女方的藍田鯉安苑居屋同居。

成功簽做親生仔

愛情得意的他,近日在事業上亦有大轉機。早前魔童王維基向無綫台前幕後挖角,專挖知名度高的二三線藝人,無綫為留人隨即力捧三線藝人上位。而 07年贏得港男冠軍的袁偉豪,亦睇準時機賣身無綫。
知情者透露:「早排王維基搵過阿 Ben(袁偉豪)傾過檔,嗰陣佢喺無綫只係普通藝員合約。阿 Ben見啲一、二線小生扭計唔同公司續約,咪膽粗粗同公司講話自己會留低,但就希望簽做親生仔囉,又俾佢傾得成喎。雖然佢計過每個騷價得一萬,比依家只係多二千,不過親生仔演出機會一定多啲,收入點都好過依家。」據知袁偉豪的包薪合約年期為 5年。



日前有報道指袁偉豪暗撻龔嘉欣,二人更被影到孖實學電單車,但袁早有拍拖三年的女友。 

袁偉豪入行 6年,代表作欠奉。但現正播出的《好》劇,與人妻萬綺雯有連場濕吻激戰,帶挈袁人氣攀升。 

袁偉豪除了與萬綺雯有咀戲,與劇中太太 JJ都有一場重口味情慾戲,艷福不淺。 

給女友名份

成功傾掂數賣身給無綫後,袁偉豪的演出機會明顯增多,包括近日拍攝的《 On Call 36小時 II》、《情逆三世緣》及《 My盛 Lady》等重頭劇。最近,他在新劇《好心作怪》的姦夫角色亦得到不少讚賞。事業露曙光,他即將戀情保持低調。
上周,本刊拍得他和女友在藍田鯉安苑出入。戴上 cap帽、一身街坊裝的袁偉豪,與女友落街市買餸時亦前後腳保持距離,明顯不想被街坊認得。不過,本刊得悉袁偉豪已定於明年中與女友結婚,而婚禮不會大搞,一切從簡。「阿 Ben同 Cissy拍拖兩個月已經見晒家長,佢上年求咗婚啦,暫時得幾個朋友知㗎咋!依家佢上緊位,都唔想俾人覺得佢掛住溝女。 Cissy亦唔想婚禮太鋪張,可能搞個結婚 party就算。」
對於𢱑做親生仔,日前本刊多次致電聯絡袁偉豪,但至截稿前仍未有回應。


狂執平價菜無綫薪水唔多,為儲錢結婚,袁偉豪與女友專登等六點過後,餸菜大平賣時段才到街市買餸,二人更專吼五蚊份的特價瓜菜,買了一大袋返家。 

居屋同居袁偉豪三年前與女友拍拖後,便一直在女方在藍田自置的居屋同居,慳得就慳。 


搭廠巴現時冇車冇樓揸手的袁偉豪,每次返電視城開工,例牌搭公司廠巴,極盡平民化。 

港男撈唔起

香港先生舉辦了七屆,為無綫造就不少新血。但歷屆得獎香港先生,都只做閒角大茄角色,冇乜發圍機會,部分心灰意冷的,更轉行投身商界發展。如今袁偉豪有得簽親生仔,發展比起其他香港先生,已勝一籌。

高鈞賢做校長


奪得 05年香港先生冠軍後,高鈞賢曾擔正劇集《幕後大老爺》,不過戲屎得個樣,後期已被燉落做大茄。去年,他成立兒童舞蹈學校,疊埋心水做校長。 

 

黃長發退出娛圈

黃長發在 06年香港先生獲勝,礙於廣東話麻麻,專做客串角色。年前他更因與鞋王鄧劍群三奶李姿霆拍拖,受盡壓力而決定退出娛樂圈。

羅天宇緋聞突出

08年奪得香港先生冠軍的羅天宇,曾被無綫力捧拍攝劇集《四葉草》,但無以為繼。最引人入勝的,始終是他與苟芸慧的過氣姊弟戀。

翟威廉做陪襯

贏得 10年香港先生冠軍的翟威廉,主力拍劇,但幾乎套套劇都做主角的陪襯,戲份唔算多,對白亦得幾句,難以發圍。


撰文:娛樂組 
攝影:攝影組

tvb4life 發表在 痞客邦 留言(0) 人氣()