龍小菌自揭肥菌童年樂 

■龍小菌(右)小時候係癡肥學童,可以孭起同學仔,同𠵱家嘅瘦look(小圖)差好遠。


蒙面歌手龍小菌除罩揭去神秘面紗,連真名都俾網友起底,原來佢叫蔡小茵,小茵變小菌都幾有趣!



小菌現真身後被讚靚女似苟芸慧,不過佢話自己細個係癡肥兒童:「我有四兄弟姐妹,家姐由細都好瘦,可能我最細媽咪特別錫我,畀好多嘢我食,好似金魚食唔飽,一日食兩公升雪糕,每餐食四碗飯,三年級開始暴脹重70磅,仲因為係癡肥學童接受過訪問。」

大腩傷腰

雖然小菌冇因為肥唔開心,但越大身體越差,佢話:「唔止有睡眠窒息,鼻鼾聲好大,仲因肚腩大令腰骨痛,膝頭關節亦好痛,做唔到運動,最重時有250磅成日俾人笑,同學叫我做豬嘜,老師都幫我改花名Fatty,最受傷害係參加比賽,評判話:『你都唱得幾好,但身形幾龐大。』」



■BB時肥白可愛嘅小菌,獲外婆痛錫有加。 

■由細到大龍小菌都係肥妹仔,但家姐竟然又高又瘦。 

■龍小菌被網友踢爆真名叫蔡小茵,曾經喺學校做老師。

由於健康響警號,小菌決定減肥:「一星期做四、五日gym,早餐食兩塊麥包、香蕉番茄生菜,午餐沙律或薯菜,夜晚食魚雞戒澱粉質。」對於被讚似苟姑娘,小菌話:「苟姑娘靚我好多,社會標準瘦等如靚,但我唔覺自己靚。」

撰文:馮仁昭

    tvb4life 發表在 痞客邦 留言(0) 人氣()