梁先生過年前本想抵押保單,但英國保誠卻內亂,無人幫他處理保單,他已去信保聯會投訴。(王偉洪攝)

投訴

英國保誠保單無人理

2013年02月28日 ~~ 第1199期 香港《壹周刊》

有讀者為求輕鬆過年,本打算在過年前抵押保單,向保險公司套現流動資金,但卻撞正保險經紀被停職,向保險公司求助更被拒。結果保單無人跟進,讀者一肚氣之餘,惟有向朋友借錢過年。

梁先生○四年幫襯英國保誠的「更美好」儲蓄壽險計劃,兩年前試過抵押保單,從保險公司借得近萬元現金,「嗰次都係聯絡經紀,填份 form,幾日就收到支票。呢排啱啱生咗小朋友,加上過年要辦吓年貨,想手頭鬆動啲,所以想攞筆現金傍身。」
豈料當梁先生致電經紀時,經紀卻表示被停職,未能處理其保單,「佢話俾公司停咗職,入唔到公司系統, check唔到單,做唔到任何嘢,叫我有咩就打俾佢直屬上司。」梁先生遂致電區域總監黃先生,卻遭到無禮對待,「佢話唔識我,叫我自己搵番個經紀,跟住就 cut咗我線!」梁先生之後再向客戶服務求助及投訴,「佢竟然要我自己上公司交表格,又話唔知我可以借到幾多錢,要慢慢等佢批,我幫襯咗佢哋十幾年,而家少少嘢都冇人幫到我,有冇搞錯!」


香港保險業聯會保險總會主席潘榮輝批評,若英國保誠未能安排人手處理停職經紀的保單,做法有問題。


由於經紀未能替梁先生借錢,他須自行到英國保誠分別設於中環及尖沙咀的客戶服務中心辦理抵押保單手續,他怒謂:「乜都要自己搞,咁我使乜幫襯你?」(羅國輝攝)

專家話 應搵人接手


香港保險業聯會保險總會主席潘榮輝表示,英國保誠無人處理保單的情況罕見,如保險經紀離職或被停職,保險公司應該妥善處理該經紀的保單,「一般直屬上司或者客戶服務部會將啲單分俾其他經紀接手處理,一定唔會擺低啲單冇人理。萬一嗰個客要入院做手術 claim錢,你冇人幫佢搞,咁咪好大鑊?」

回應 拒不認錯


英國保誠回覆表示,該經紀未有遭停職,更指就算經紀未能協助他,他亦可向客戶服務部求助,惟事主拒絕。(馬梓皓)

抵押保單套現


抵押保單套現,即透過抵押保單,向保險公司貸款。不少保險公司都可為人壽保險提供此類服務,套現金額可高達保單現金價值九成。但此舉除要支付一定利息外,若投保人於貸款期內遇上意外或身故,保險公司在賠償前會先扣減受保人未還的金額,換言之保單保額其實會在貸款期間大打折扣,抵押保單前要諗清楚。

壹判官


英國保誠公司內亂,竟然無人理保單,累客人借錢不成,認真要檢討!
評分:劣劣劣
(五個劣為最嚴重) 

    tvb4life 發表在 痞客邦 留言(0) 人氣()