插圖: Wendy

揞名爆

「好姊妹」機艙擺款

2013年02月22日 ~~ 第917期 忽然1周

港姐出身嘅「好姊妹」一直發展平平,最為人熟悉嘅係佢跟同屆港姐「咪神」好鬼 friend,成日孖公仔去 shopping嘆茶溝仔,就算「咪神」嫁咗,大家都一樣成日見面,仲叫人哋介紹筍盤俾佢㖭。


不過,最近媽咪姐聽到單料,就深深明白「好姊妹」點解上唔到位又嫁唔出囉!話說佢當時同個飛機師拍拖,有次男友要飛,身為女友嘅佢,就順勢攞咗航空公司提供俾員工嘅特惠機票上機,齊齊去外地拍拖啦。不過,坐經濟客位嘅「好姊妹」,由 check-in嗰刻已經覺得自己高人一等!戴住副黑超頭岳岳,上到機仲將個袋放喺通道邊,阻住大家出入㖭。
好嘞,飛機準備起飛,空姐叫佢攞起個袋,擺上行李架啦。不過「好姊妹」只係掃咗空姐一眼,就話:「好呀!你幫我攞吖!」嘩,啲語氣衰到呢,空姐不甘受辱,決定搵上司出馬!但呢位前港姐繼續發揮「港女」精神,同嗰位嚟好言相勸嘅高級空姐講同一番說話,撐到底呀!哦……咁無嘢嘅,最後人哋咪去機長室,「請」咗「好姊妹」位男友出嚟同佢擺好個袋囉。嗰時阿機師塊面𤓓到呢,直情唔敢望其他乘客呀。 Congratulation!「港女」贏咗!「港女」萬歲!但之後點呢,「好姊妹」無幾耐就同機師男友散咗啦。因果,咪咁解囉! 

tvb4life 發表在 痞客邦 留言(0) 人氣()