郭景承, 29歲,景驊園壹輝小廚老闆兼總廚

年輕有夢

窮家孩子有團火!

2013年02月15日 ~~ 第916期 飲食男女

郭景承。十八歲開茶餐廳當老闆,廿八歲升格開中菜館,廿九歲已想 着下一步要開更高級的餐廳。腦子裏思念的,永遠比同齡的人快幾步。
他中一便輟學。書,不見讀得比人多。
十二歲就離家,家,不見得比人溫暖。
在社會打滾,靠的,是對現實的不滿,和對貧窮的恐懼。
「細個住木屋,想買嘢玩就自己去執紙皮、汽水罐賣錢。我唔想永遠都係咁!」他說。
現實,磨練了他的志氣。貧窮,鑄造了他不怕捱苦的心智。
他心裏有團火,要靠一雙手,按部就班,擺脫貧窮,塑造自己的人生。


老闆還老闆,始終要親自入廚,弄傷難免。

土瓜灣景驊園壹輝小廚的廚房裏,一個火球「蓬」的一聲從鑊裏爆起!
操 着鐵鑊炒菜的郭景承,抿住嘴,瞇住眼,氣定神閒的把鑊拋兩拋,絲毫沒有半點畏縮。「驚火?我怕窮多?!」
對於窮,三十還未到的他,原來已有自家獨到的體會。
「十二歲讀書唔成,離家出走去做童工。那時對錢沒觀念,賺到攞晒去玩,結果屋企被截水截電三餐不繼,試過日日腐乳送飯當一餐,下一餐就飯焦加水煮成粥,又係送腐乳。」郭景承回憶道。
為了賺錢,他試過硬 着頭皮跟做紥鐵的父親去地盤開工,雖然日賺過千元,但個個錢都咬出血汗。他做一日已有要癱的感覺,手腳完全不聽令,收工時幾乎連筷箸也拿不起,他死頂才勉強捱到半個月,從此明白到珍惜金錢的道理,再也不敢亂使亂用。
「以為賺千零蚊一日好過癮,但原來辛苦到咁!」他從此不敢再胡亂花錢,而且勤力向上,一心搵錢。 

他得姐姐的男友介紹,到茶餐廳送外賣,雖是走走趯趯,但總比在地盤出死力好。到底還年輕,好奇心重,樣樣都想學。見水吧師傅有型,就去學做水吧,慢慢入埋廚房炒粉炒麵。炒得多,竟掌握到炒中式粉麵和小菜的竅門。
他知道,工字不出頭,十八歲時,得家人支持,在旺角開了一間茶餐廳,自己做老細。可老細不易為,由入貨到埋鑊到埋數到清理,天天朝五晚二(不是下午兩點,是凌晨兩點),每天只睡三個鐘,可他還是甘心的。
「想賺錢係要辛苦啲。我早起係因為要親自去買貨,買慣買熟了,自然可以同人擺平 啲,咁我就可以低價入貨,賺多 啲。」他說。
那時,全力賺錢是他的唯一目標,經營了十年茶餐廳,他嫌賺不到大錢,看中小菜館利錢深,於是轉到土瓜灣開景驊園壹輝小廚賣小菜。
「一杯檸茶收得人幾錢?我而家賣一隻手撕雞就可以收四百蚊!只要在手工同烹調方法上落功夫,加上有啲橋,廚師就可以好似魔術師咁,將一樣普通 嘢變成賣錢 嘅貴 嘢。」年輕人就是有點子,他廚藝功夫不算太高,卻憑創意闖出名堂。


以前不願花錢裝修茶餐廳,升格小菜館後盡量裝修得雅緻,一步一步往高級餐廳的目標進發。


景驊是太太的名字。那個離家出走的男孩,今天已變成愛家的男人。

人家普普通通土魷蒸肉餅,他就整色整水加墨魚汁去蒸,黑掹掹的,標奇立異,成功吸引人注意。見坊間雞煲大熱,又創石鍋雞來分一杯羮,讓客人有新鮮感。
「創新還創新,我唔會亂 嚟。你叫黃金蝦就食到金黃色 嘅蝦,唔會係『朱古力蝦』;食滑蛋蝦仁就食到滑蛋,唔係炒蛋。」
客人就是欣賞他創新和傳統兼備,景驊園壹輝小廚才開了年多,熟客已經一籮蘿,人人以為他正享受箇中風光,原來他心裏想 着更遠的地方。
「我諗住做多五年,五年後賺夠錢搬到海邊,開一間西沙茶座咁 嘅餐廳,只做晚市,賣 fusion菜。做大眾化生意利錢始終唔夠高,人工貴、食材貴,我話你知,我呢度一隻杯 嘅壽命平均只得兩日,茶匙要一箱箱咁買,損耗好勁。」他說。
他就是停不了,不斷向上攀,心底裏除了想賺更多錢,其實還源自那揮不去的自卑。
「我個樣細個, 啲客成日話:『老細,間餐廳係老竇開畀你 㗎?』冇人覺得間鋪係我努力得 嚟!我要再做好 啲,等大家知道我 嘅能力!」


鮑汁三層樓,$55。


手打墨汁蒸肉餅,$78。


石鍋雞,$148。


年紀本已輕,外表更年輕,卻令他更難爭取別人認同。

太太指他怕被人睇小,他也同意,畢竟細細個已在街頭打滾,常給人看扁,內心深處最大的渴望,是得到別人認同。加上有了女兒,對家人自覺多了一份責任,努力的背後,有更堅實的決心。
「我十二歲離家出走,十四歲已發覺做人孤零零好慘。所以我好緊張屋企,做咩都諗長遠 啲,成日想賺多 啲錢,就係要畀最好 嘅我個女。」
人在不同階段,心態會有不同變化。十二歲的郭景承,靠一道氣離家外闖。十八歲的他,憑一團火做老闆打拼。今年,他廿九歲,爐火雖未純青,卻是個身為人夫、已為人父的男兒漢。一道氣一團火,不足成大事。腳踏實地,認清目標,按部就班,才是圓夢的基石。 

景驊園壹輝小廚
地址:土瓜灣北帝街 28號地下 A舖
電話: 2768 8839/ 2768 8963 

撰文:藍家雄
攝影:陳榮輝

tvb4life 發表在 痞客邦 留言(0) 人氣()