媽咪姐

恭喜發財之藝人封多少?

2013年02月15日 ~~ 第916期 忽然1周

只要係有童年嘅人,都應該喺新年講過呢一句——恭喜發財,利是𢭃來!可見利是喺大家心目中,一開始已經佔據住一個幾咁崇高嘅地位。講真吖,媽咪姐依家收到老細呀奶奶呀其他長輩嘅利是,都一樣鬼死咁高興㗎!
所以呢,一眾人面廣嘅明星名人年年都大派利是,禮多人不怪吖嘛,而且個個有心思。出錢出力,咪就係呢種囉!

互動片段

明星賀忽然 1周


葉玉卿 利是派美金


嫁咗去美國做闊太嘅卿卿話:「我哋習慣年初一派利是,只派一日。仔女呢,我會俾一千蚊美金,因為想趁新年,俾多啲零用錢佢哋。其他通常俾一百蚊,最少就俾十蚊美金。」咦,想攞「金」,真係要校啱時間先得!

鄺美雲 大師出手


蜜運中嘅鄺美雲( Cally)年年豪派利是,佢笑住話:「因為好多朋友要派, 6位數都係 basic。」 Cally今年除咗用「寶貝仔」 Cash同 Euro嘅 cute爆利是封,仲多咗封由星雲大師題字嘅,好有意思㗎。





薛家燕 五色財神




家燕姐話 6年前印咗呢批女財神利是封,之後覺得事事順利,所以依家每年都俾幾百蚊印一千個入利是,「我派利是分 5級制, 5種顏色嘅紙幣都有㗎!」咦,咁點分呢?家燕姐話佢自有辦法喎!祝大家好運呀。 

麥玲玲 派「人仔磚」


密密返內地幫人算命睇風水嘅麥玲玲,工作不忘老公何德,年年幫另一半準備埋同系列唔同姓氏嘅利是封,而利是餡就「升呢」轉派「人仔」,封封一百!嘩,睇吓師傅面前嗰幾嚿「人仔磚」,俾佢哋揼中就發達咯。





徐子珊 靠晒阿媽




今年徐子珊有份拍賀歲片。未嫁嘅佢,亦大派印有自己個樣嘅電影精品利是封,「今年俾咗 5位數字阿媽幫我封利是,點派同派幾多,都係佢話事㗎。」聽阿媽話有運行呀,叻女! 

王梓軒 愛心童趣




同家燕姐大女傳緋聞嘅創作歌手王梓軒,一樣未婚派利是,佢啲利是封全部都係「紅十字會兒童利是封設計比賽」嘅得獎作品,「我最鍾意呢啲利是封充滿童真!」封利是之餘,仲可以做埋善事,難怪家燕姐對佢都好滿意! 

陳冠希 中指招財


做咗時裝舖老闆嘅陳冠希( Edison),今年同美國潮牌合作出利是封,整咗款不文招財貓,夠晒玩嘢!問 Edison會派幾多錢利是?佢話唔講喎。咁算囉!媽咪姐希望你生生性性做人,真正結婚派利是啦。





許紹雄 三級制




有「 Benz雄」之稱嘅許紹雄,當然夠晒資格大派利是!「派利是呢家嘢,我分大、中、細三種,最大封$500,之後係$100,再到$50!」佢連利是封都分埋大、中、細㗎,咁就包唔會搞錯,叻! 

tvb4life 發表在 痞客邦 留言(0) 人氣()