滾熱辣

珍姐撐爭視帝 馬浚偉揀楊怡做陪襯

2013年02月15日 ~~ 第916期 忽然1周

去年寸爆話:「同無 綫經理人部門難以磨合!」並憤然離巢的馬浚偉,未夠一年,將於今年五月回歸無 綫。
呢次馬仔肯食回頭草,皆因北上掘金唔理想,而城電個牌又遲遲未搞掂,令以為大把路走的馬仔頓失預算。外面世界難撈,適逢無 綫鬧小生荒,一直是收視福將的馬仔,獲戲劇製作總監(珍姐)曾勵珍拉攏回巢,不但人工有得加,珍姐更任他揀女主角,造就他來年攞視帝。馬仔亦老實不客氣,揀了出爐雙料視后楊怡做陪襯。
雖然話:「好馬不吃回頭草」,不過有錢有獎,唔做好馬,有金馬做咪得囉!




馬仔去年 5月約滿無綫,但因無綫不准他拍攝大陸劇《建元風雲》,他不甘被剝削搵銀機會,憤然要求提前解約,離開効力 18年的無綫。臨走前馬仔仲明寸無綫制度有問題,怒插主演的劇集《紫禁驚雷》慳皮:「做御前侍衞,但竟然連騎馬場景都冇……公司俾多少少資源,效果已經好好多!」又話多年來加薪幅度低,聲言在大陸拍幾個劇已夠錢買樓。 






去年同大隻謙的「食麵」事件,令楊怡大受打擊。身為好友的馬仔,第一時間在微博安慰好友。難怪楊怡在新劇甘於陪襯馬仔啦。

出招避剃頭


馬仔一向有收視保證,最差係同陳法拉合演《誘情轉駁》( 10年),平均收視唔過 30點,算是馬仔近年少數失手之作。

不過,全心返大陸掘金的馬仔,一年以來在內地只拍過《建元風雲》及《鴛鴦佩》兩劇,並未引起注意,發展不如同離巢北上掘金的陳鍵鋒及劉愷威順利。加上盛傳找他過檔的王維基,電視牌照又到手無期。馬仔眼見出外闖多阻滯,早前亦開始轉口風,一時話︰「有好劇本返娘家唔成問題!」一時又打人情牌,話︰「無 綫對我嘅恩情永誌不忘」,賣口乖為回巢鋪路。
雖然馬仔當日高調離開無 綫,不過近年無 綫鬧小生荒,而馬仔主演的劇集一直有收視保證,有「福將」之稱的他更是珍姐愛將,要返無 綫自然唔難。
珍姐最初想搵馬仔頂鄭嘉穎拍新劇《寒山潛龍》。「無 綫五月開拍 嘅《寒山潛龍》,原本由鄭嘉穎做男主角,不過鄭嘉穎唔想剃頭而推劇。珍姐原本想搵馬仔頂替,但馬仔都唔想剃頭。不過佢好醒目,冇直接話唔肯,只係一味拖字訣。拖到咁上下,人 哋都要埋班,卒之搵 咗馬國明頂上,馬仔咪甩難囉。」知情者說。 

劇酬三級跳


馬仔回歸,無 綫亦俾足面,出到三萬一集劇酬俾馬仔,相比離巢時每集一萬蚊,馬仔身價三級跳。而新劇仲任馬仔揀拍檔。「馬仔套新劇係材叔(梁材遠)監製,係 30集 嘅時裝劇,講家族恩怨。珍姐知馬仔恨做視帝好耐,於是俾佢揀新劇拍檔。咁馬仔一揀就揀楊怡做女主角,一來兩人 friend底,二來楊怡係出爐視后,馬仔覺得拍住佢,爭視帝有着數。至於『男二』,馬仔就揀 咗同樣有收視保證 嘅歐陽震華同當紮 嘅黃浩然。」
對於馬仔重返娘家,珍姐大開綠燈:「一直有同馬仔傾,佢係福將,收視有保證!我一向都好想馬仔返嚟㗎!」監製梁材遠亦露口風:「我 喺五月開新劇,都想馬仔拍到㗎!」而將返無綫的馬浚偉則大賣關子:「未落實㗎,要睇劇本,都唔係冇機會嘅!」

大陸發展未見突出




解約源頭
馬仔因為無綫幫他推掉大陸劇《建元風雲》,嬲到提前同無綫解約。《建》劇群戲多,馬仔表現未算突出。


分飾兩角
《鴛鴦佩》是馬仔繼《建元風雲》後的另一個大陸劇,馬仔一人分飾酒樓伙計及富家子,女主角係當紮女星張檬,但收視平平。


豬肉獎都冇
除了拍劇,馬仔做主持都有一手。由他主持的《大廚出馬》,收視平均有二十點以上,比一般周六節目多三點收視。不過兩輯節目都只係為他帶來最佳節目主持提名,難怪馬仔不滿。


嬲爆離巢


11年,《紫禁驚雷》在欠缺宣傳的情況下出街,雖然最高收視有 40點,不過馬仔心知演得好都冇機會攞視帝,預先在微博暗示不會現身《台慶頒獎典禮》。

收視有保證


馬浚偉在 TVB有「福將」之稱,因他飾演的電視劇,不論是時裝或古裝,又或者卡士有幾弱,收視往往都唔差。

《鐵血保鏢》


最高收視 34點

06年播映,論卡士認真麻麻,女主角是姚子羚,監製李添勝亦坦言拍攝資源不多。不過收視最高卻達 34點,馬浚偉更憑此劇奪「我最喜愛的電視男角色」。 

《蒲松齡》


最高收視 41點

10年播映,女主角是鍾嘉欣及陳法拉,兩女與馬浚偉的三角關係拍得非常浪漫。全劇平均收視達 31點,結局收視最高達 41點( 267萬觀眾)。 

《當旺爸爸》


最高收視 35點

這套輕鬆小品劇在 12年播映,亦是暫時他在無 綫最後一套作品。馬浚偉飾演「發達仔」一角,抵死對白非常搞笑,首周收視已達 30點,結局更有 35點收視。 

撰文:娛樂組 
攝影:攝影組

tvb4life 發表在 痞客邦 留言(0) 人氣()