牛雜米$23

尋澄味

滷得出色 塘利牛什粉麵專家

2013年02月01日 ~~ 第914期 飲食男女

朋友相約食團年飯,地點在好耐無去的鯉魚門。
為免空肚飲酒,晚飯前總會搵些小食打底,致電家住油塘的「消防隊目」詢問為食詳情,可以一次過大食三包出前一丁的他,介紹我到油塘街市內的隱世食街食牛雜麵。

叫司機把車停在乾淨企理的油塘大本型,走到對面的油塘街市,離遠已經見到 fans眨燈招牌字的「美食廣場」。估唔到街市內的為食一條街,兩邊開滿各式各樣的小食檔,左邊雞蛋仔、右邊碗仔翅,還有燈籠掛住「粥粉麵飯」 4個大字,氣氛強勁,十足台北的士林新夜市。
循着飄香的滷水氣味,自然搵到了備受推崇的牛雜粉麵。開業 10年的塘利,由入廚超過 20年的標哥主理,牛雜牛腩炆得出色,全憑他在這些年來的經驗累積。必然出現的花椒八角和草果,還有不能缺少的大小茴香,這個滷水膽還加入藥材,並會因天氣時節而調校。




豉油王煎蛋豬扒飯$28(連熱飲)

牛雜香味撲鼻,一碗有齊我最喜愛的部位:勁爆肥膏的大腸、是挑戰膽固醇的底線;爽口的金錢肚和軟糯的牛膀,還有不易遇上的沙瓜,配爽滑的米粉無懈可擊。帶着小肥膏的牛腩,件件鬆軟,肉汁多,未食完已經要 encore,蘸辣到標眼淚的辣椒油,好食又過癮。地盤工友至 like的南乳豬手,皮爽肉滑的秘訣,在於熄火焗透身,好味到連骨都想啜。
牛腩牛雜和豬手之外,也有供應基本的小食和碟頭飯。脆到出奇的雞翼,肯定了即叫即炸的最佳效果,配撈飯最強的熒光咖喱,開胃程度嚇呆自己。每個月總會遇上一次的豉油王豬扒蛋飯,碎上的豬扒,啖啖鬆軟;撈飯的豉油汁,由生抽和老抽慢火精心煮過爆香了的乾葱、洋葱和紅葱頭;「剩飲唔會鹹,撈飯個個讚」,再加上 on top的燶邊荷包蛋,跟飯撈勻之後,效果逼近豬油撈飯,食到清碟連眼也不眨。


淨牛腩$60


咖喱雞翼飯$28(連熱飲)


南乳豬手飯$31




塘利牛什粉麵專家
地址:油塘鯉魚門廣場地下光亮街市 5號鋪
電話: 2349 9332 




少年食神林澄光( Michael)
致力用金錢換無限快樂。 TVB、 Now TV飲食及旅遊節目主持人 

攝影:崔百祥

    tvb4life 發表在 痞客邦 留言(0) 人氣()