我們帶來白威阿 King給顏瑞麟看。顏說阿 King臉圓圓屬金,背夠直毛夠白腳夠力,屬健康長壽,聽話又唔為食。狗主黃太說阿 King平日無病痛亦好聽話,不過超級為食。顏回應:「佢食唔飽啫!」他說大部分主人最想知寵物是否旺自己:「為免動物被遺棄,我一定話旺。」

Voice

顏瑞麟 寵物算命法 響朵全靠 CNN 

2013年02月01日 ~~ 第914期 忽然1周

芝娃娃和松鼠在蛇年犯太歲,氣管腸胃唔多好;蛇年最旺是北京狗、西施、金毛,仲會旺埋主人。
我呢行,人人都話自己掂。你無綽頭,做唔到第一,好難搵到食。依家 CNN都搵我,證明我是國際級。


他說 20個客得 1個帶寵物批命,每隻收$900,平過算人。他幫過廖碧兒、楊思琦和郭秀雲的狗仔看相。

外公外婆阿媽都是算命師傅,自懂性我已經學時辰八字,鍾意算命多過讀書。中學畢業後做了幾年文員,發覺最愛都是術數,所以入行。
我單打獨鬥,無電視台撐,又無入玄學會埋堆擴闊人脈。為了響朵,港九新界的商場車仔檔都租勻,賣埋水晶,又學埋英文:“ You belong to Gold, too much Water”(你屬金,太多水)幫鬼佬算命,都幫唔到我上位。
早前有個客人隻狗成日病,去佢屋企睇風水發現,原來個狗竇放在病位。我靈機一觸,香港有 20多萬人養寵物,同人算未殺出血路,不如同狗算。
我依據寵物外形分金木水火土 5大類,再從出世年月日批命格,人哋出運程書,我出寵物算命書。除了狗,貓、兔仔、倉鼠、蜥蜴和龜我都睇過。
批寵物的壞處,是隻狗唔識講我批得準唔準,好難提升技術;但好處亦是唔識話我錯,而且跟人一樣,年年運程不同,呢條橋長做長有。
你有綽頭就有人吼,《美聯社》、《美國之音》紛紛找我做專訪。 CNN睇到《美聯社》報道,美國總統大選時都搵我分析奧巴馬面相,評論他會唔會當選。
啲人話寵物算命聞所未聞。麥玲玲都在海洋公園評過熊貓面相,又唔話佢?我無害人,大家都是為碗飯奮鬥啫。
呢個世界要贏就要識包裝。今日我有 CNN撐。 CNN都搵我就是勁! 

CNN叫他算誰在總統大選勝出。他說奧巴馬眼神夠,眉粗又代表意志堅定,應該會贏。「我係世界第一個發明寵物算命的玄學大師,以及第一個玄學大師幫 CNN批算美國總統大選。」此句話訪問中起碼講了十次。





顏瑞麟


已婚,自創寵物算命法, CNN都找他推算美國總統大選結果。 

撰文:阮淑賢
攝影:陳偉強

    tvb4life 發表在 痞客邦 留言(0) 人氣()