小特搜

女星禦寒大法

2013年02月01日 ~~ 第914期 忽然1周

最近天氣時冷時熱,搞到媽咪姐都病咗幾次,激死!難為一班無綫藝人,日頭拍外景吹風,夜晚入廠就凍到抽筋。好彩大家保暖功夫做到足。好似陳茵媺( Amiee)就選擇用舊衣物料自製型爆迷彩雙面羽絨褸,既獨一無二又夠暖。唔知有冇整件俾 honey阿 Mo呢?

陳茵媺循環再用


睇唔出鬼妹仔 Amiee咁崇尚環保,佢呢件型爆迷彩羽絨褸,市面絕對無得買。咁矜貴?原來底面兩層係佢用舊絨布車成,再攞出去俾人做件獨一無二雙面羽絨褸。「因為出面 嘅羽絨好多都唔夠暖,自己整件又環保又慳錢!我專登叫人車雙面,面嗰層迷彩,底嗰層紅色,用嚟襯衫一流。」豪嫂咁知慳識儉,抵錫!


honey,我又要你啲溫暖!(設計對白)




長身羽絨輕身兼夠暖,衫袖可拆出做雞翼袖。女星最忌同人撞衫,但呢件保證唔會囉!

伍詠薇暖貼殺手


見伍姑娘衣衫單薄開工,以為佢唔怕凍,原來佢怕凍怕到死。所以佢每日開工都會帶定 30個暖包加暖貼,貼勻全身。「基本上貼得嘅地方已經貼滿晒,你知錄影廠幾凍,啲戲服通常又薄切切,所以一晚就可以 KO晒所有貼貼。千祈唔好問我借,睬你都傻,哈哈哈……」




可愛大口仔係暖包套套,估唔到伍姑娘都有童真一面。

樂瞳四大暖身法寶


樂瞳冬天 嘅開工裝備絕對唔嘢少。依家佢拍緊民初劇《師父明白了》,每日開工總會帶住四大法寶,包括 Hello Kitty暖水袋、手提暖手器、 cutie大笨象冷襪同暖胃生薑茶。「你知開民初劇成日喺古裝街外景,有時半夜三更真係好凍㗎!寧願辛苦少少帶多啲保暖物品都唔好凍親,又可以借俾人用,幾好。」大方過伍姑娘噃!




大笨象冷襪非常得意,「有時拍嘢影唔到腳,就可以着住佢開工。」


必備生薑茶,半夜拍劇最緊要暖住個胃。


呢個手提暖手器都幾型,「帶去開工勁方便,喺屋企叉足電,就可以帶返工用,持久力特強。」

    tvb4life 發表在 痞客邦 留言(0) 人氣()