梁靖琪(Toby)與湯盈盈大家鬼妹性格,看似夾得來,其實二人早在2007年到溫哥華合作拍《歲月風雲》時,卻不肯同房,及至返港後再合作《兩妻時代》才成為好友。Toby曾戥姊妹盈盈不值,覺她與錢嘉樂拍拖之初,情侶關係未得男方公開而嬲爆家樂,如今眼見盈盈得到名份兼懷孕約5個月,Toby開心得喊了出來。

梁:梁靖琪

湯:湯盈盈

梁靖琪(Toby)與湯盈盈
Toby(右)與湯盈盈感情要好,盈盈更視Toby為好知己。

梁靖琪(Toby)與湯盈盈
Toby戥盈盈得到名份及有喜而開心。
梁靖琪(Toby)與湯盈盈
盈盈(左)鬼妹仔性格,同Toby「鬼」聲「鬼」氣。

梁:記得拍《歲月風雲》時,因為我有潔癖,唔肯同人同房,嗰時又安排我同湯盈盈同房喎!我唔慣咪自己補錢住單人房囉!

湯:其實我冇乜印象,唔怪得每次我掉嘢,你都會幫我執啦,哈哈,我都乾淨o架。

梁:我哋成為好朋友係拍《兩妻時代》,又加埋成日出外拍《獎門人》成班人好癲,你個人又好大膽,比我更爽!喺我班好朋友中係最爽、最真一個,盈盈你係我好朋友榜上排第一位!

湯:其實我唔係真係咁爽o架,我都有脾氣o架。

梁靖琪(Toby)與湯盈盈
盈盈與樂樂拍拖多年,終於修成正果。
梁靖琪(Toby)與湯盈盈
二人性格爽朗,故特別投契。

匿埋屋企拖手

湯:不過你對我好細心,雖然你年紀細過我,但比我多嘢諗,畀好多意見我,成日叫我鎮定啲,算係我軍師。

梁:其實我都呷過嘉樂醋!有次我哋去新加坡拍《獎門人》,嘉樂遲咗嚟,之前嗰幾日,我同你日日一齊,點知嘉樂到咗,你就黐住嘉樂,坐車都係得番我自己一個,有次拍嘢要介紹嘉賓出場,當時輪到我行出嚟,但我見到你係拍晒手,但雙眼就望住嘉樂囉!

湯:有咩……

梁:你哋拍拖初時,我係唔鍾意嘉樂!嘉樂係一個好慢熱嘅人,開頭你哋拍拖好低調,可能咁處理係啱,可以令段關係長久,不過,初頭我覺得嘉樂唔係對盈盈好好,我成日都好唔妥咁講:「想點呀你?」我都冇見過你哋拖手!

湯:我知個個都好錫我,冇見我哋拖手?咁我哋自己知咪得囉,你哋覺得我兩個拍拖唔正常,但喺屋企有拖手囉。

梁:你都影響咗嘉樂對感情open咗,嗰時見你哋兩個,開始喺後面拖手,我哋開始安心,唉……好似老人家咁,成日叫嘉樂對你好啲。

諗計玩盡新郎

湯:我記得第一次同你講我有咗,你都好大反應。

梁:係呀……嗰時我喺架車入面,當你同我講完話有咗、結婚,我想喊,隻眼已經紅晒,好亂,我不停行錯路,當時我呆咗,因為我當你係我屋企人,我個腦諗緊要點幫你安排。

湯:太多人畀advice我,嘉樂叫你幫我哋搞晒,全權由你負責,總知要White wedding,要傳統同斟茶,依家我就諗緊班姊妹點玩新郎。

梁:你諗?姊妹中最辣係你啦。

湯:我會叫班姊妹唔好玩得咁犀利,哈哈。

大肚後變小器

梁:你大咗肚之後,一時一樣,我覺得你超級無敵小器。

湯:係喎,唔知點解會咁,有次我睇演唱會,個女仔喺我前面搖螢光棒,我好嬲,同你哋都少咗出嚟,淨係chat,一有啲唔鍾意就離開個chat,依家好懶,成日想瞓,唔想出街。

梁:對嘉樂係咪咁?

湯:咁我又唔會喎!

梁:你淨係咁對我哋咋,嘉樂講一句,你就順晒o架啦。

湯:你哋自己覺得啫!哈哈……(一副幸福冧樣)

文:影視組

攝:司徒國榮

場地:香港迪士尼樂園

文章標籤
創作者介紹
創作者 tvb4life 的頭像
tvb4life

明星八掛大分享★☆

tvb4life 發表在 痞客邦 留言(0) 人氣()