Annie Liu
綠色喱士背心連黑色短褲$3,880
米色珍珠閃石領飾$780
淺啡併米白色皮手套$1,280
all MAX&Co.

cover face

劉心悠“為媽咪,唔結婚”

2012年09月14日 ~~ 第300期 ME!

生女好,黐媽咪,到老也不離棄,劉心悠正是活生生的例子。
在圈中,這位「女鑽石王老五」有事業、跑步快、識煲湯、緋聞少,基因應唔錯,偏偏獨生女講完又講唔恨嫁;女明星老生常談,我正奉命前來打爛沙盤起你底。
拍過無數次婚嫁廣告,熒幕上穿過無數次婚紗,戲中談過無數次戀愛,心悠的單身宣言,卻理性得近乎瘋狂。
「為保護媽咪,就算我呢一世唔結婚都 OK。」
她輕輕強調,媽咪之外,已無暇照顧多一個家庭云云……
咁絕?唔係啩!!!
我倒覺得,生女若此,擔心多過開心就真。

互動片段

劉心悠“為媽咪,唔結婚”


Profile
 


Annie Liu
原名:劉凡平
出生日期: 1981年 4月 1日(白羊座)
出生地:台北縣永和市
身高: 5呎 4吋
體重: 99磅
語言:廣東話、普通話及英語。
學歷:加拿大溫哥華 Emily Carr University of Art& Design產品設計系二年級
簡歷: 04年,接拍中華航空公司廣告。翌年,來港參加《阿嫂》試鏡,於過千名參加者中脫穎而出,正式入行。
主要作品:電影《阿嫂》( 05),《軍雞》( 06),《出埃及記》( 07),《浮城》、《天生愛情狂》( 12)。電視劇《幸福的味道》( 08),台劇《幸福的抉擇》( 08),內地劇《步步驚心》( 11),《唐宮燕之女人天下》( 12)。
微博: http://www.weibo.com/liuannie


爹哋自作自受
 


Annie Liu
米黃色孖襟中褸$5,880
粉綠色背心裙$2,880
粉綠併綠色皮手套$1,080
深藍色猄皮高 踭涼鞋$2,480
all MAX&Co.

看過心悠的《出埃及記》,印象猶深,戲中她為保護被虐母親(余安安),聲嘶力竭向父親咆哮,一張小嘴,幾乎噴出火來!現實中,她的童年也不快樂,也有一個不懂愛惜家庭的爸爸,傷害很大。
「媽咪係一個好慘嘅女人!
「當我仲喺佢個肚入面,佢同爹哋已協議離婚,只為咗我,夾硬復合,自細睇住佢哋嗌交,好 hurt,唔明白點解兩個人要咁樣對待對方?
「一直以來,爹哋有好多女朋友,我唔理解,一度仇視佢,媽咪就係『你一日係我丈夫,永遠係我丈夫。』傳統觀念,累死自己,個男人摑咗你咁多巴,點解仲唔醒?呢個年代嘅女人唔應該係咁,要拎得起、放得低。
「我好想保護媽咪,好想呈現一個形象俾佢知,我至係一家之主,你將自己交俾我,我會盡力令你感覺安全、安心;「就算呢一世我唔結婚都 OK,如果,媽咪認為我冇另一半係遺憾,冇咪冇囉!有你就夠。
「張智霖及葉念琛等男人都話我黐線,太冷靜、太理智,係需要咁冷靜咁理智,因為我要俾媽咪一個依靠,成長環境,令我不知不覺產生呢種想法,我都唔想。
「依家,唔再嬲爹哋,我覺得,你生我,我就欠你,其實,佢都只係想開心啫!佢自己犯錯,終有一日,自己受番。」
我相信,現實中任何一個女人,也會感到很無奈,女人最痛,身同感受。「我唔係話男人衰,只係講到談情說愛,你一就認認真真,一就唔好開始。」決絕有理!


另一半要好強壯
 


愛與被愛,若只為生理需要(或為面子),隨便找個人拍個散拖,沒結果也就罷了,但求開心;若論付託終身,難度高很多。女人是水造,愛情是烈火,一不小心,燒成灰就慘!心悠看得透,遠離火種,自求多福;真的看得那麼清楚嗎?
「咩叫拍散拖?即係我明明想食牛扒,冇得食,食住公仔麵先?我唔得囉!
「人生中,感情排名唔係最重要,失去機會都唔覺得可惜,我對感情睇法比較悲觀,呢個係天生。
「以前,我好傳統,覺得女人一定要先結婚、後生仔,入行耐咗,見得多,現實就係現實,女演員好難兼顧事業與家庭, Victoria Beckham咁成功,生仔時,一樣收埋自己,如果呢個時候佢要出一支香水,一定影響人氣及銷售,所以,我哋唔可以話呢一刻全情投入工作去拼搏,下一刻又要於設定時間內結婚生仔,我只可以一心一用;「呢幾年,我投資於工作上,好想有所得着,別人投資感情,咪開花結果囉!兩者同步好難,我連自己親人都照顧唔到,又點兼顧情人呢?
「依家,我接受未婚生子,即係單親,小朋友都要接受佢冇爹哋呢個事實,世界就係咁,好與唔好,撈埋一碟。」
好強的氣場,要仔唔要公,擇偶條件理應也夠辣,為孩子揀老豆喎!豈能兒嬉?!「睇電影見過男女主角一齊起屋,我嘅夢想就係有間自己一手一腳去起嘅屋,可能好醜樣,但好想入去住;「我嘅另一半,需要好強壯,好幫我完成呢個夢想。」乜咁浪漫!


唔知自己要乜?
 


Annie Liu
綴藍色蝴蝶結孔雀綠絲質恤衫$2,680
啡紅色格仔半截裙$1,980
啡杏色羊毛褸$17,280
啡併藍色馬毛高 踭鞋$3,280
all MAX&Co.

女兒身、男兒心,外表柔弱,個性硬淨,心悠坦言唔浪漫,即使初戀,接受學長追求,都只因抱住「人有我有」心態,查實冇 feel。多年來,感情世界一片空白(至少報載她一直單身),路係自己揀,當事人一路走來無怨亦無悔。
「拍緊拖一樣可以寂寞,唔一定有男朋友就能夠填補心靈空虛,相反,可能衍生更多問題;我明白,自己呢種性格好易錯過機會,但遇唔到就係遇唔到,唔到我揀。
「讀書時,個個同學拍拖,遇上一個人話鍾意我,咪拍囉!事實上,我對佢只有尊敬感覺。
「出社會後,試過有男友趁我生日製造驚喜,車我返屋企門口,一打開車尾廂,好多汽球飄出 嚟,嘩!隨即我又心諗『乜你架車裝住咁多汽球我都唔知?!』
「對愛情,講真,我都唔知自己想要 啲乜?」
話題至此,這位女強人隱隱透出一個訊息:怎麼我天生不是男人?如果係仔,大可以理直氣壯張開臂彎保護母親,甚至磨拳擦掌越級挑戰父親權力,女仔人家,豈不輸人又輸陣?「又唔係!保護屋企,唔關乎性別,最緊要心態。我自認女強人,有足夠意志力、經濟能力去保護媽媽。」宣言背後的辛酸,只有自己知!


Annie's tips
 


Annie Liu
白色釘珠片背心$2,380
粉紅色百摺裙$2,380
深藍色毛毛頸巾$1,080
all MAX&Co.

Q:進軍內地,還有時間養生嗎?
A:請咗一個妹妹仔照顧我,每日煲湯,青紅蘿蔔、番茄薯仔之類,藥材湯包我喺香港買,內地天氣乾燥,有啖湯飲,滋潤身體,皮膚自然好。

Q:點 keep fit?
A:冇時間跑步喇!早排拍劇,我日日食朱古力補充體力,其他演員又喺淘寶買各式零食……節食中!


後記
 


Annie Liu
粉紅色背心裙$3,480
黑色釘珠腰帶$880
啡併藍色馬毛高 踭鞋$3,280
all MAX&Co.

女人心,海底針。
心悠個心,幾矛盾,唔恨拍拖,又想有個大男人跟自己建屋成家,遺憾自己生於一個破碎家庭,又唔介意當個單親媽媽,對於未來,欲拒還迎。
「唔好問我如果媽咪同情人同時跌落水,我救邊個先?我唔識游水,我至最需要人救。」
是啊!最需要救的人,不是別人,正是自己。

MAX&Co.尖沙咀海港城港威商場 2122號鋪 2722 9617

撰文:伍淑嫻、黃鑑江
形象: Annie Hung
攝影: Eric Seto 
化妝: Jan Chan@Annie G.Chan
髮型: Eric Chow@Xenter-hair
鳴謝: MAX&Co.

文章標籤
創作者介紹
創作者 tvb4life 的頭像
tvb4life

明星八掛大分享★☆

tvb4life 發表在 痞客邦 留言(0) 人氣()