忠於自己的女人最幸福 宣萱

贊助商連結

「先生,唔好意思,呢啲相唔影得o架!」

在電梯大堂拍攝這輯專訪照片時,宣萱忽然指着遠處一位用手機鏡頭對着自己的男士,有點忟憎地叫嚷起來。四周等(車立)的人無不愕然地看着她,她卻只顧叫助手上前跟那位男士交涉,奈何電梯到了,男士九秒九走進去,逃之夭夭……

宣萱就是個如此無畏無懼的人,所以,當談到她憑「Mall姐」角逐《萬千星輝頒獎典禮》的視后時,你絕不會聽到她說「冇信心」。「一定唔會冇信心,始終套劇出嚟嘅反應同收視都OK。如果攞唔到嘅,咁我都知佢哋TVB做嘢,係好有自己風格嘅——話晒我之前喺呢間公司十八年。」

她是一一年離開無綫的,雖然跟很多離巢的小生和花旦一樣,亦有往內地發展,但你又不會看到有傳媒以「頻頻北上」、「密密搵人仔」的字眼來形容她。「錢係搵唔晒嘅,夠使就OK啦。我到o依家都係咁:覺得唔開心、唔鍾意、唔想拍嘅工作,我就唔會做,你逼我唔到o架!我需要嘅係balance嘅生活,我想做嘢賺錢之餘,亦都想有時間見朋友、去旅行。」

或者、也許、可能,以她的條件,若做人「世界啲」又「積極啲」的話,應該不難早已身家過億,紅遍大中華;然而,她入行廿多年來,都沒有打算改變初衷,換來的,卻是她臉上那一抹了無牽掛的笑容。

「喂,我只係要每一日過得開心啫。」

是的,人生苦短,可以選擇令自己舒暢地過日子,已經很幸福。

 

 

有宗旨

贊助商連結

雖然《不懂撒嬌的女人》已播完了大半年,但宣萱飾演的「Mall姐」一角,卻仍然深入民心。「到今日,喺街度有人見到我,依然仲會講:『Mall姐呀!』」

「Mall姐」性格強悍,又是個control freak,宣萱坦言,最初很擔心角色太乞人憎。「until套劇出咗街,有好多feedback,我先知原來現實生活裏面,真係有咁嘅人!」不過角色對工作的那些執着,她又很有共鳴。「做嘢方面,我都係死咕咕o架!遲到、唔記得對白、冇帶劇本呢啲嘢,我真係好唔得!我個人唔掩飾、好直接,以前我後生時,冇諗咁多嘢,真係會出聲,擺晒喺塊面度,面口真係燶晒o架——喂,講緊嘅,唔係(遲到)十五分鐘、半小時,係幾個鐘!好嚴重喎!跟住啲人就會話我:『嘩!黑面呀!』」

她曾試過唔出聲,忍。 「啲人好得意,見你唔出聲,下次就又繼續又繼續又繼續,一路踩去你條底線。」改變不了人,惟有改變自己處理方式。「我都會諗:我咁直接好衰,會令到身邊嘅人好辛苦。」

前年無綫高層杜之克,親自跟她接洽下,她才回巢接拍《不懂撒嬌的女人》。「呢套劇係我最想演嘅女人劇,亦可以話係我嘅代表作。」

 

去年十一月底,宣萱(左二)於馬來西亞憑「Mall姐」當上視后。「如果一年可以攞到兩個大獎,我嘅演藝生涯,已經好完美!」

 

有底線

然後,她開始選擇放鬆一點。「人大咗,我o依家反而冇咁『Mall姐』,有啲位,咪等監製去處理囉!可能遇着有啲人遲到嘅,我咪柔和啲問吓佢:『喂,聽日你返幾點啫?單聲先啦,我可以瞓晏啲嘛。』哈哈哈!對住啲後生嘅新人,我咪拉埋佢哋一邊,好好同佢講囉。」

實情她對着自己的fans,一樣會直斥其非。「試過有fans㩒我門鐘,我真係落去鬧佢o架!『你知唔知自己喺度做緊乜呀?』可能佢哋會認為:『我係你嘅米飯班主,我咁支持你,你係唔可以咁對我嘅!你鬧我,咁我唔支持你,走囉!』唔緊要o架,因為我只係覺得,大家都要respect大家囉!」

她承認自己性格至今依然硬繃繃,多年來的確得罪過不少人。「人哋好自然會覺得,我令佢唔舒服而唔鍾意我,其實好多時,我自己都唔知得罪咗人。

「我啱啱入行時,有個青梅竹馬嘅朋友提醒我:『我哋鍾意你嘅性格夠直,唔好畀我有日見到你變咗!』我一直都記住。工作上,我可以多番啲灰色位,但我唔想將自己條底線,㩒低到冇咗自己!我喺呢行見過太多人,為咗唔同嘅目的,將自己嘅性格扭曲到好迷失。」

 

文章標籤
創作者介紹
創作者 tvb4life 的頭像
tvb4life

明星八掛大分享★☆

tvb4life 發表在 痞客邦 留言(0) 人氣()