母子關係最低點Chilam通水
袁詠儀操控症 魔童反抗要換媽咪

贊助商連結


■為教好兒子魔童,靚靚不介意做嚴母,但沒想到弄巧反拙。攝影:林德雄

【閃耀人生女人心袁詠儀系列之1 教仔方法】46歲的袁詠儀(靚靚)最近接受本報女人心系列連載式專訪,頭炮先談其11歲的寶貝仔張慕童(魔童)。靚靚和張智霖(Chilam)錫魔童錫到燶,不過二人教仔方法卻兩極,女要嚴,男很民主,夫妻常為此爭吵。有操控症的靚靚一直不覺得自己有錯,直到有一日兒子好認真向Chilam要求換新媽咪,靚靚才恍然大悟知道出事了!

袁詠儀身兼影后兼90年港姐冠軍,她一直自信心爆棚,又認為自己為家付出很多,常埋怨老公張智霖採取的放任教仔方法會寵壞魔童,所以經常強迫魔童跟其一套去做,終於魔童忍受不了,向爸爸投訴要換媽咪,Chilam告知靚靚,她大感晴天霹靂,明白要修補關係。


■靚靚聽從心理醫生方法與兒子相處後,關係大為改善。版權所有.嚴禁盜用


■魔童沒辦法集中上堂,令靚靚開始擔心。微博圖片


■靚靚夫婦間中會相約好友去禮佛。微博圖片

自我檢討

其實靚靚不知道自己教仔方法有問題,她以為有問題的是兒子,所以安排魔童去看心理醫生,直至學校老師對她有意見,她才開始檢討自己:「我初初嘅時候好主觀㗎!覺得自己嗰套先啱,直到幾年前魔童嘅學校send佢去見一啲醫生,要check吓佢係咪有一啲過度活躍症,或者睇吓佢係咪有嗰啲自閉症,因為佢冇辦法集中上堂,佢會做完晒自己嘢,好快就騷擾人,都係種學習障礙,send佢去check嘅時候,佢冇呢啲問題喎!但係點解佢會突然間咁angry嘅?咁就send佢去見心理醫生。」
靚靚指與魔童一起見完心理醫生才發現有問題的是自己,她說:「我太自我喇,真係唔合格㗎!我覺得有陣時都仲係對個仔好火爆,我唔係嚴呀,我有陣時都可能仲有少少嗰啲操控症呀!希望佢係聽我講坐喺嗰度、企喺嗰度,我覺得呢啲都係我嘅問題。」
自從靚靚聽從心理醫生方法與兒子相處後,關係有所改善,靚靚說:「嘩!如魚得水喎!我同我個仔關係好到不得了,咁我就發現原來我真係有錯,自己要去調校,有啲嘢我仍然係堅持,例如禮貌呀,或者食嘢唔好咁大聲呀!唔好印腳!我見到人印印腳,我頭痛㗎!呢啲我就會,但係我老公成日覺得我就係呢啲嘢,令到自己好緊張,其實做父母唔一定啱晒,你某時候都要聽仔女講佢嘅心裏面係點樣。」

 

拒絕溺愛

不過靚靚認對兒子也不能太放任,擔心魔童會變成一個好離譜的人,她說:「老公好鬼縱個仔,例如我個仔話『爹哋你幫我去買一樣嘢』,咁我老公明明自己做緊嘢㗎喎,佢都會諗盡辦法幫佢去做嗰樣嘢,但我角度就唔係㗎!我會話畀佢聽『唔得喎今日,因為我做緊嘢,但係我聽日會嘗試幫你去買』,太就佢,呢一刻你好開心,佢好開心,但係過多二十年後,佢出嚟呢個社會做事,唔會有人咁樣對佢㗎!唔會有個老闆畀你咁樣做,你一定要有啲嘢話畀佢聽,係要有程序,係要等嘅。」
採訪:陳月媚
化妝:Kerry Wong
髮型:Sam Pan of Muse Hair
場地提供:好酒好蔡

贊助商連結

踩媽咪爹哋紅啲


■在魔童心目中,爹哋比媽咪更紅。資料圖片

魔童雖然有一對明星父母,但袁詠儀指兒子從沒有因此感到自豪或虛榮感,她說:「例如啲同學仔話我見到你爹哋個廣告呀,咁佢回人一句OK。佢淨係有陣時係嗰啲『媽咪你唔夠爹哋紅』,我話係呀!」魔童不知是否想戲弄媽咪,所以說這些話來刺激她,但靚靚完全沒有生氣:「咁佢都係好真咁講事實,前排有人同佢講『你點可以咁樣話媽咪,你媽咪以前係好紅㗎!』,佢係嗰啲『係咩?幾時呀?』」


■靚靚將金像獎放家中,向兒子認叻。資料圖片

靚靚因為要照顧兒子,刻意減少工作,反而Chilam有老婆顧家,可以全力衝刺事業,只是魔童不明白媽咪苦心,不過靚靚笑言自己有虛榮感:「我將個金像獎放喺屋企,話畀佢聽嗰三個係我攞嘅獎嚟㗎!即係我幾叻呀,我係香港小姐!但係我講完呢啲嘢,佢冇乜感覺㗎!」

組家庭會議教仔


■魔童最近因玩滑板問題,打算和爸爸開家庭會議時聯成一線。

袁詠儀形容他們一家三口相處像朋友,遇上不能決定的事,會開三人會議,每人有一票投票權,問到Chilam父子感情好,會否經常聯成一線否決她的動議?靚靚說:「咁又未必,其實我個仔都唔係一個完全唔講道理嘅人,你要講解得好清楚畀佢聽係點樣,最近為咗佢踢唔踢波同玩滑板嘅問題有爭拗,佢就會搵佢老竇諗住用二比一呀!」


■Chilam以前最喜歡與靚靚唱反調,但現在已有共識。微博圖片

靚靚指魔童一度想去學鋼琴,學了幾堂又說不學,靚靚說:「佢最近揀踢波,上個月突然間又話想唔去練習,我好攰!我就話唔得,有啲嘢你揀咗就要堅持。」Chilam以前最喜歡與老婆唱反調,但現在夫妻有共識:「我同老公講唔可以同我唱反調,至少開緊會嗰一刻,你可以之後之前同我講,我哋應該點樣去傾,我老公話好。」

硬頸性格似靚靚


■靚靚希望魔童將來做一個有用的人。資料圖片

魔童在袁詠儀眼中不算叛逆,但好有自己意見,靚靚說:「我覺得佢硬頸係似我,我老公會冇咁堅持。」玩的時候,魔童和爸爸會親近些,靚靚笑說:「佢成日視我而不見,眼中只有佢老竇已經激到我紮紮跳。例如佢同老竇講緊嘢,咁佢老竇同我講嘢呢,佢就話『媽咪,我同爹哋講緊嘢㗎!』即係佢會覺得你唔好講嘢,等我講咗先,咁我就會嬲㗎啦!轉頭佢話『媽咪到你喇』,咁我就冇嘢㗎喇。」
靚靚指魔童好聰明,考試合格會給她看,不合格就只拿給爸爸簽名。問她對兒子有何期望?她說:「我想佢做一個有用嘅人,唔係一定要對世界有任何貢獻,我覺得最緊要對佢自己生命有貢獻,唔好渾渾噩噩嘥咗啲時間!」

 

創作者介紹
創作者 tvb4life 的頭像
tvb4life

明星八掛大分享★☆

tvb4life 發表在 痞客邦 留言(0) 人氣()