即使當日報大數參選,今時今日的花姨亦離「奔七」不遠矣。

繞場壹週

認報大數,大姐明派《睇真 D》追訪,宮雪花嚇到漏夜走佬

贊助商連結

《香港小姐》向來都是選美界中焦點,唯獨九五年,《亞洲小姐》以不限年齡作賣點,招來只有十六歲的陶安仁同報稱四十九歲的宮雪花參選。由於花姨肯高度配合亞視同傳媒,幾乎日日見報,港姐的風頭完全被蓋過。二十二年後,宮雪花在《繞場壹週》承認報大數參選外,還自爆是大姐明(林建明)搭路參選。

 

 

飯局俾大姐明睇中
二十二年前宮雪花以四十九歲高齡選亞姐,成為一個選美經典,她充滿神秘感,當中有邊啲係真,邊啲係假,就等花姨自行解開多年的謎團。
葉:當年亞視諗到不限年齡都可以參加亞姐,係咪因為呢一點,覺得有機會?
宮:嗰時好多演藝界朋友嚟我屋企食飯,其中一個藝人就話亞洲電視不限年齡選美,問我有冇興趣去參選,我提名你。我覺得奇怪,你嚟我屋企,知道我嘅情況,點解你會叫我參選呢?當時我幾懵,我話我咁嘅情況都可以參加?佢話幫我問吓電視台,就去問咗電視台,之後覆番我話無問題,叫我去面試。
葉:係邊個,過咗咁多年,可唔可以講?
宮:呢位就係沙灘小姐,你應該知道係邊個?
葉:林建明。
宮:你好聰明,所以心入面到而家都好感激大姐明,因為我覺得佢嘅出發點係好善意,好多謝佢!


九五年不敵楊恭如、黎淑賢,宮雪花只得第五名,一臉不悅。

 

參選期間,宮雪花高度配合,低胸、事業線應有盡有。

醫院走佬
花姨同葉 Fun提到冇諗過面試要著泳衣,令她留下好差印象,所以通知她入圍出席記者會時,她決定借做手術避席。沒想到大姐明高招到出動《今日睇真 D》醫院直擊,嚇到花姨要漏夜走人。    
葉:除咗著泳衣見評判令你唔想去選亞姐出席記者會,仲有冇其他原因?
宮:擔心到時記者問我家庭情況我應該點答,大姐明係知道嘅,萬一記者問我時我唔知道點答,所以我打俾大姐明,話唔想去記者會,佢話應該唔可以。我跟住就同打電話叫我出席記者會嗰個人講,我而家病咗,所以聽日無辦法去記者會,佢問我咩病,跟住我話要開刀,佢又問我開刀住邊間醫院,我哋中午通電話嘅,下晝就去睇醫生,我問醫生可唔可以幫我開刀,佢問我想開咩刀,卒之我做咗個瘜肉小手術,處理咗一粒良性瘜肉。所以對方再打嚟時我就同佢講,我而家開咗刀,同埋全身麻醉,跟住佢話兩點鐘一定要嚟到記者會現場,如果唔係就會被除名,跟住大姐明打嚟同我講,你準備好聽日上晝《今日睇真 D》嚟港安醫院採訪你。你話幾慘,開完刀無化妝,咁殘嘅樣點可以俾《今日睇真 D》影到,於是就問隔籬床借咗一百元,我馬上搭落樓下搭的士返咗屋企,跟住快快手換衫,化完妝換好衫就去咗記者會,我真係被迫,太過靚,所以逼住你一定要去,所以就係咁樣去咗記者會。


大姐明(中)一手發掘宮雪花參選亞姐。

 

花姨極不喜歡三點式泳衣,而當年大會提供的泳衣全部都是一件頭,又會咁啱嘅?

認報大數
當年花姨站台,外間對她已是四十九歲大表懷疑,盛傳她應亞視要求報大數,當事人承認!
葉:講番記者會,當時情況如何?你肯定成為焦點啦! 
宮:非常之焦點,淨係影,我都覺得好正常,因為環顧四周我最靚,可能有啲自戀狂,但係事實,氣質各方面都係,記者不停影我,我完全唔知發生咩嘢事,到第二日報章報導時,大字標題關於年齡,呢件事對我嘅傷害好大,其實我嘅年齡係報大咗少少。
葉:我記得當時外間對你嘅年齡都有啲質疑,認為你應該細啲嘅,其實當時報大咗幾多,記唔記得?
宮:唔係幾記得。
估唔到花姨咁多年嘅「失憶症」都未好番。

撰文、攝影:娛樂組

文章標籤
創作者介紹

明星八掛大分享★☆

tvb4life 發表在 痞客邦 PIXNET 留言(0) 人氣()