豪語錄

超額達標 周秀娜

贊助商連結

口靚模不似演員、歌手,身份模糊,好多時經理人公司傳媒會幫手起個朵,令觀眾容易留有印象。
初出道的周秀娜帶住「翻版樂基兒」行走江湖,要不是近日她跟正版的樂基兒一起拍電影,差點遺忘 Chrissie(周之洋名)有過這個「朵」。
有沒有想過(跟樂基兒拍電影)這一天?
「無諗過,所以最初感覺有啲怪,但自己某程度上係開心嘅,因為而家再同佢合作時已經唔係『翻版樂基兒』,大家已經係獨立個體。」周秀娜說。
八年間,由拋胸露肉出寫真的模變成電影女主角,談何容易,走到這一步的周秀娜也自覺超額達標。

 

 


○八年翻版、正版同場出席活動,樂基兒明顯笑容牽強。

 

同樂基兒孖住拍《女士復仇》,周秀娜坦言初開工時勁尷尬。

堅持到底
口靚模曾經盛極一時,一度成了社會現象。這個潮流來得快散得更快。同周秀娜唇槍舌劍過的競爭對手,或者跟住她排隊入行的師妹,不是結婚生仔就是消失得無影無蹤,即使留下來仍在圈中的 Jeana(何佩瑜)又不見得發展理想,站得住腳的周秀娜有一套見解。
「其實好似做生意,你用一個新嘅方法去做一盤生意,然後其他人覺得 OK跟住做,我覺得係會分薄咗,唔再新鮮,觀眾永遠追求新鮮感,當呢個方式對佢哋嚟講已經習以為常,個效果就未必有咁好!」
娛樂圈五光十色,紙醉金迷,有人不合適中途離場,有更多的是想留都無資格留低,個人認為周秀娜肯搏肯做是她屹立至今的主因,當事人不太認同,瞪大眼擰擰頭說:「我覺得唔係搏,而係我真係想做,一直堅持。我覺得呢個圈就係咁,甚至與唔同人合作嘅時候,你就會見到好多演員用咗好多心機同時間喺呢一行,喺每一部作品,默默耕耘去做佢哋認為應該要做嘅事,我望住佢哋嘅時候,覺得有更加多嘅人比我更加勤力、更搏、更堅持,當初決定想做一個演員,我覺得需要好多嘢去配合,一個團隊、一個劇本同埋時間,係需要時間,如果你肯堅持,先會有機會遇到一個啱嘅作品、一個有發揮的好角色。」


周秀娜人間胸器殺傷力驚人

 

加上抓緊時機出埋人形攬枕,當年贏到開巷,風頭一時無兩。


○八年周秀娜同未整容的雨僑(中),在阿嬌擔正的《出水芙蓉》跑龍套。

 

電影密密拍,連大台都出手邀請周秀娜拍電視劇《宮心計 2:深宮計》。

無法計算
堅持不可以當飯食,周秀娜無奈說:「都係!」
○九年的周秀娜晒 D奶出噴血寫真,可以說一炮而紅。外人覺得是機關算盡的成果,實質是天時、地利、人和所成就,回望過去,周秀娜堅定的說,沒有半點後悔,皆因她目標明確,亦有自知之明,只是事情發展太快,來不及反應。
「出寫真其實係想拍戲,但要點樣去俾人認識,點樣入行,俾人認識有好多唔同方法,一來我唔識唱歌,唔可以做歌手,同埋唔係一下子就可以有部戲俾你去試去做,我選擇咗出寫真呢個方式。真係咁啱,嗰個時候年紀我又覺得無乜嘢,都係一般 model拍攝工作,又可以出 trip,幾好呀!
「當初無諗過嚟得咁震撼,無諗過效果同回響去到""大到唔識形容,自己好呆,未識得去處理,因為無這個心理準備,如果有心理準備,應該會好 enjoy俾人認識嗰個過程。」
當日見步行步成就今天,自言甚少規劃人生的周秀娜繼續沒有計劃便是最好的計劃做下去。「其實我覺得好難去計劃,因為永遠唔會知道下一秒發生什麼,變化實在太多,更無人可以擔保『拍完呢部戲就可以攞獎,就可以紅』,我深信無一間經理人公司會同我講『你拍呢輯寫真啦,拍完會紅,全香港都識你,全世界都識你。』無人可以擔保!」



觀眾永遠追求新鮮感,當呢個方式對佢哋嚟講已經習以為常,個效果就未必有咁好!

唔夠性感
周秀娜自認是個心散的人,講到明要拍好一部戲一定要百分百投入先做得好,即是拍電影時只會埋位開工,不會接其他工作。拍《 29+1》的時候,長期維持沉重的狀態,辛苦到一個點,所以當導演火火搵上門,拍《女士復仇》做大癲大肺的女飛賊,周秀娜馬上應承,希望平衡心理。不過開工後發現戲服不及樂基兒般性感,先知中伏。
「你唔覺得著好多衫咩?導演直頭安排我著皮草,人造纖維嗰種,但拍攝喺夏天,好熱,你知拍戲時開好多燈,唔可以開風扇、冷氣,一 action roll機咩都要熄晒,我已經好醒目,喺一場戲度丟咗件 fake fur,因為每次除低(人造皮草)裡面都係濕嘅,生咗好多熱痱,熱到一唔 roll機,我同 Stephy兩個都呆晒。」


曾經同曼聯的李奧費迪南網交幾年的周秀娜,最終同對方關係不了了之。

 

同陳偉成甩拖四年,感情一直未有着落。



我深信無一間經理人公司會同我講『你拍呢輯寫真啦,拍完會紅,全香港都識你,全世界都識你。』

刺蝟一般
同陳偉成分手四年,前度女友氹氹轉,周秀娜呢?繼續一支公,有過不少飛來蜢埋身,但全部瞬間即逝。周秀娜不否認自己太酷、太揀擇所致。「我其實都幾驚同陌生人接觸,發覺自己有個自我保護程式,好似刺蝟,一有事啲刺就㓤晒出嚟。」
周秀娜承認成長環境使然,鬼馬地說自己有試過主動出擊,只是香港男生太怕醜,無下文。再講事業當頭起,與其為拍拖而拍拖,換來終日吵架,不如一個人更自在。「兩個人唔會第一次見就會百分百 match到,或者啱傾,需要放低身份,然後嘗試大家去俾時間,同埋互相遷就,如果可以遇到一個咁樣嘅人,我覺得會同佢一齊,會結婚,但係仲未遇到一個咁嘅人。」



一二年周秀娜封胸,北上同鄭嘉穎拍電視劇《葉問》,探班畫面唔夠精彩,膽粗粗問吓有什麼工餘活動。當時愛上淘寶的娜姐表示淘了滾軸溜冰鞋,閒時會「踩吓 roller,重拾兒時回憶」,打蛇隨棍問:「踩嚟影吓好喎!」周秀娜爽快答應。夾都無咁啱,影相當日天氣同近日香港一樣,持續寒冷,十度左右,要小背心、熱褲晒 D奶,問心勁唔人道,但周秀娜無扭擰,爽快搞掂,換轉其他人一句要走,呢啲唔叫搏,叫咩?

撰文:陳琳 
攝影:黃志明 
攝錄:葉志明
服裝提供: BEAMS@ I.T  High heels: Kurt Geiger
髮型: Amber Tse@ Queens Private I 
化妝: Circle Cheung@ndnco.co
場地:九龍灣國際展貿中心

文章標籤
創作者介紹

明星八掛大分享★☆

tvb4life 發表在 痞客邦 PIXNET 留言(0) 人氣()