豪語錄

跟「阿寶」說再見 Stephy

贊助商連結

鄧麗欣最近有三部電影推出,同時在各大小影展角逐參賽,繼《紀念日》阿寶後,大家都在說, Stephy的電影路可以走得更好更遠,明年更有望入圍香港電影金像獎最佳女主角。
二千年入行,磨劍接近二十年,結束一段十年關係,經過高低跌宕,人生有閱歷,演技步向成熟,眼前自信的 Stephy,應該是女演員最燦爛黄金年代。
是的,去年三月恢復單身,沒有方力申的日子,成為獨立個體的 Stephy過得很不錯,演技備受肯定,計劃做導演,出自家系列運動服,新生活躊躇滿志,成績單分數沒有 A也應該是 B+。
大家都戥她開心,終於可以放低「阿寶」了。
假設真實愛情故事與電影情節交替演變,今天的 Stephy由當日「阿寶」蛻變出來。
「好多人都話而家好好,可以擺脫以前影子。
我唔贊成咁講,無以前嘅我,就唔會有而家嘅我,以前所謂影子,其實都係曾經嘅我。」她說。
活得更好,是最好方式跟昔日的「阿寶」說再見

 


心最重要
Stephy在即將上映的電影《女士復仇》飾演正印大婆,再遇偷食老公,跟過去《十分愛》電影系列遇到同樣難纏的多角關係。不過這次沒有歇斯底里,也沒有黯然離去,是反高潮跟情敵周秀娜和樂基兒,三個女人拼死爭一個男人。
她說現實生活中要求的男女關係簡單,另一半有異心,還是會選擇離場,堅持不爭。
「性格由細到大都係咁,細個唔會同鄰居爭玩具,我覺得屬於你嘅嘢始終係你,唔屬於你就唔應該去搶,男朋友更加唔會,如果一段關係出現第三個人,本身已經有問題,有問題就應該先檢討,唔應該再一齊,就算爭到返嚟,只不過係想贏,心態就算贏咗,對方個心都唔係得你一個,我覺得無意思。我都係一個好勝嘅人,鍾意運動嘅人多數都好勝,因為要比賽,比賽梗係想贏,邊個想輸?但呢個唔係比賽,好老土講句「贏到個人贏唔到個心」,一段關係個心最重要。」她說。

去年情人節,方力申在微博登了兩人攀登喜馬拉雅山合照,並寫下:「曾經有人說『心如工畫師』。那些年我們一起走過五千多米高海拔,被譽為宇宙的中心點。我拉住妳的手,互相扶持,外面下着雪、落冰雹、刮大風,一起走過最艱難的時刻。彩虹來了!心中有無限的溫暖和感動,因與妳同在!這就是我心中最美麗的畫,將它掛在天上面!」一個月後,二人宣布分手。

電影《紀念日》, Stephy飾演的阿寶跟方力申飾演的阿強拍拖十年,當中有不忠、不信任、欺騙等,男方雖然極力挽留,但結局還是分手。


愛情無對錯、輸贏,只係講緣分。
終身學習
結束十年感情,一段時間沉澱後,她的愛情觀依然沒變,不分對錯、輸贏,只有緣分牽纏。不過她的不勉強也不爭,卻曾經換來另一半投訴。
「有男朋友曾經投訴唔關心佢,有啲男仔好想女朋友好需要佢,好似嗰種「無咗你唔得,唔好唔要我」,我唔係咁樣,個心可能都會咁諗,但唔會表現出嚟,呢個係我比較強勢一面,我覺得咁樣好無安全感,女性就算依靠一個男人,但都要撐得起自己,所以我表達出嚟,都係俾對方覺得我好獨立,唔係小鳥依人,有啲男朋友都會覺得我唔夠 sweet,或者希望女朋友比較弱勢少少。
「我知道呢個係缺點,感情係雙方面,有時都覺得咁樣好自私,我都會反省,因為兩個人有時都要配合,無得完全自我。如果兩個人都堅持自我,好難一齊,要有一個融合點,你唔去配合對方嘅時候,兩個人只會愈行愈遠,我覺得有時都要體諒對方作出配合,呢個係拍拖同婚後,終身學習嘅事。」她說。
知易行難,她說習慣並不是一時三刻可以改正,又或何妨向自己坦白,是否真有這個需要。因為如果相愛,你愛的是對方整體,包括優點和缺點。愛情既要融和,也存在着矛盾,她為此經常自我打倒。
「所以愛情好複雜,無話唔好改變,但又要配合對方,令一段關係更加好,呢個平衡位好難拿捏,我希望自己可以改。」她說。

06年《獨家試愛》,講述 Stephy跟方力申一對小夫妻面對的生活點滴,由好愛到同床異夢。

07年《十分愛》, Stephy在戲中重遇舊愛方力申,五年後二人再重新開始。

08年《我的最愛》, Stephy為報曾愷玹橫刀奪愛之仇,搵方力申幫忙。

16年《失戀日》,在 Stephy宣布分手後上映,戲中年過三十的她,對愛情生活十分迷惘。

16年《紀念日》, Stephy跟方力申再演夫妻,不過這次結局是分手收場。
擺脫以前
感情融入角色, Stephy承認拍戲時一個小小眼神,也可能不期然洩露那一刻心情,不同階段演繹同一個角色,可以帶出不一樣感覺。這一年,她終成功擺脫《紀念日》的乖乖女阿寶,演技不斷自我挑戰,既是《藍天白雲》的大肚女警,電影《空手道》打擂台的中日混血兒,也是 cult片《女士復仇》性感殺手。
「好多人都話而家好好,可以擺脫以前影子。我唔贊成咁樣講,因為我成日都話,無以前嘅我,係唔會有而家嘅我,以前嗰一個所謂影子,其實都係曾經嘅我。工作受到肯定,我心情反而好複雜,仲未消化到呢件事,最近仲上緊一部戲,跟住嚟緊呢部又要宣傳,我覺得成件事係進行中,未定落嚟去諗,究竟係咪俾人肯定咗?係咪成功咗?我覺得作為一個演員,反而會諗點解今次大家反應咁大,係咪以前實在太唔好?」她說。
事業不斷躍進, Stephy將人生圖表重新分配;家庭、愛情佔有比率愈來愈少。
拍了多部電影,她有意更上一層操刀做導演,拍一部關於排球的勵志故事,就算明知運動題材電影,從不易拍。
「我本身可以係一個故事,但嗰啲只係紀錄片故事,唔係一個戲劇,如果拍電影,需要有啲元素,或者特別嘅嘢,我認為唔係咁真實。如果我拍六個人點樣去奮鬥參加比賽,最後贏或輸,都係紀錄片。」她說電影以外,正準備將在內地生產的自家時裝品牌,滲入運動元素推出,有不少工作計劃在手。

Stephy說自己都好勝,不然就不會喜歡打排球,但在愛情路上,卻從不好勝。

她主演的《藍天白雲》,有份入選今年釜山國際電影節競賽單元。

Cult片《女士復仇》,她跟周秀娜同樣扮演殺手,造型誇張。

14年,她跟朋友合資在內地推出時裝品牌「 Loey」,近日她有計劃滲入運動元素。


你唔去配合對方嘅時候,兩個人只會愈行愈遠…"
點解一定要結婚
身邊好友 Kary和 Miki都各自組織家庭結婚生仔,曾經好想結婚的 Stephy,這幾年卻完全打消念頭,甚至認為結婚不是人生必需。
「無嘢係一定需要,再細啲,會覺得女人一定要生仔結婚,慢慢長大會諗,其實係邊個規定?點解一定要做呢件事?我身邊朋友好多都結婚生咗小朋友,我戥佢哋開心,佢哋亦都好享受做媽咪,但每個人有自己嘅路、自己嘅選擇,眼見好多女強人都好快樂,只係世俗眼光覺得,單身一定唔開心,但係唔係咁樣。」

16年 2月 Kary跟 Miki未傳不和,三姊妹為 Miki補祝生日, Kary在席間派利是。

電影《空手道》被導演杜汶澤指演技有突破,更入圍今年香港電影節,成為「隆重呈獻」環節作品。
撰文:歐陽慧芯 
攝影:黄志明
化妝: Cyrus Lee 
髮型: Euling Chow@IL COLPO TST
服裝: Bauhaus、 House of Holland 
鞋: Giuseppe Zanotti

文章標籤
創作者介紹

明星八掛大分享★☆

tvb4life 發表在 痞客邦 PIXNET 留言(0) 人氣()