豪語錄

有得揀張晉

贊助商連結

娛樂圈向來現實,你冇 say的時候, A、 B、 C餐放在前面,得個睇字。
食剩,唔啱口味先至俾你!
張晉,一四年憑《一代宗師》得到「第三十三屆香港電影金像獎」「最佳男配角」,打後三年半由配角一躍成為電影《狂獸》男一,再一口氣拍埋《悍戰太平洋 2:起義時空》,同史泰龍的《逃亡大計 3》兩套荷李活電影。
今時今日的張晉冇 say,呃鬼咩!當事人坦言這段日子有篩選過劇本,不怕被行內人話耍大牌嗎?
張晉:「有得選擇的時候一定要揀!」張晉這三年半算不算揀啱戲拍,言之尚早,只知道揀得最啱的叫蔡少芬!

 


出頭有閃失
○八年同蔡少芬拉埋天窗,曾經有一段時間,沒有人在意張晉的真正身份,大家只記得他是「蔡少芬老公」。直到一四年憑《一代宗師》奪得《香港電影金像獎》「最佳男配角」,外間才稍有印象張晉是武打演員。
時來運到,是禍是福,純粹個人造化。有人擺脫不了宿命一世當配角,也可以像張晉那樣視為踏腳石,配合《殺破狼 2》的搶戲助攻,令事業更上一層樓,在電影《狂獸》中擔正做男一,還接拍了兩部荷李活電影《悍戰太平洋 2:起義時空》和《逃亡大計 3》。張晉坦言這三年半的確受幸運之神的眷顧,但順風順水的背後卻有另一番景象。
「其實背後有好多事大家睇唔到,好多部戲搵我,但亦都好多部戲同時無晒,這幾年都經歷過,不了解的人會覺得大起大落,其實內心好多掙扎。」
「可能部戲開唔成,但你好鍾意部戲那個角色,我覺得人面對機會多一些的時候,可能會有點驕傲,也許是自己的一個經歷、考驗。」
演員多半是被動,飯來張口等運到,要扭轉局面,睇準時機是上策。張晉手上有「最佳男配角」做籌碼,這三年半也懶理閒言,開始為自己揀戲拍。
「有得選擇的時候一定會揀,因為希望拍出來大家都鍾意睇。老實講,無得揀的時候,你還揀什麼?這一行咁現實,你以為拍出來不好?可能好多人鍾意,所以其實不知道,但當你有得揀的時候,當然要用腦去諗一諗,應該接嗎?自己鍾意嗎?」

一四年憑《一代宗師》獲香港金像獎最佳男配角。

合作《一代宗師》同章子怡成為好友,一三年細女信兒出世,對方專程來港探望。

與荷李活巨星史泰龍合演《逃亡大計 3》,老友鬼鬼。

《悍》片中,飾演軍官的張晉,在預告片中有特寫鏡頭。
都有恐懼時
張晉首次擔正的《狂獸》,幾個月前已經開始劇透,結局重頭戲是水底激戰,低溫濕身無限拍,池水有幾污糟,日食五種抗生素防傷口發炎,這些對於拍戲不時周身傷的張晉來說,原來只是小事,反而始料不及的是心理狀況,張晉一度投降,同導演要求取消場口。
「睇劇本,唔知道自己會驚,是學過潛水堂之後,先發現自己驚水底、好深水的感覺。同樣我畏高,我知道(有威吔安全措施)唔會跌落去,但我都驚,那種恐懼是心理作用。上了幾堂,我仍然克服不了,真的走去同導演傾可否取消……當然被拒絕,惟有捱,真的捱嗰幾日拍到幾辛苦幾攰,都瞓唔到,驚自己完成不了就大鑊!」

在《狂獸》中飾演警察「西狗」,由頭打到尾。

硬淨過人的張晉抵受不了水底下的感覺,一度要求停拍。
已經磨合完
○八年同蔡少芬結婚的時候,女方已是視后當家花旦,而張晉只是個寂寂無聞的武打演員,能夠令對方答應做張太,不用說前期功夫一定比一般人還要多,連劉青雲、郭藹明那一套,婚後磨合生活細節去經營夫妻之道,在張氏伉儷身上也不合用。
「我結婚前已經磨合完,要不便不會結婚!當然不同階段,生活中總會有矛盾,畢竟有小朋友,生活瑣碎事自然多,我們又不是成世沒有嗌過交的夫妻,相對(矛盾)只是小事。」
張晉九歲習武,十一歲加入四川省武術隊,自小在刻苦的生活中成長。習武之人分外一板一眼,沒想到張晉教導兩個女兒時都有一緊一鬆兩個招式,緊的在於她們的行為、思想上。
「譬如對外傭姐姐無禮貌,我就會比較認真同佢哋去講,佢愈細你教佢,佢愈容易記得,大個便改不了,所以有些原則上的,譬如尊重別人是捉得特別緊的。」
張晉這短短三年半拍了七部電影,有幾多時間可以家庭樂,心照!除了靠蔡少芬幫手密密帶兩個囡囡探班外,張晉也有額外「做嘢」。
「小朋友好直接,你陪得佢少,感情會淡啲,所以食多杯雪糕、睇多陣電視,我比較放寬一點,要打好關係便靠這些,哈哈!」
中國人思想傳統,總會想子女繼承父業,但張晉卻沒有打算教兩個女習武。
「我覺得大、小囡也沒有興趣!況且她們無需為生計。我那時練武術是受動作電影影響,我最初鍾意,但往後是被迫的,沒法選擇,是一個出路,但好好彩而家拍戲都可以用到小時候被迫的東西,你見大學生選科,到出來工作,根本與本科無關,我而家所做的是我以前所學,我覺得好幸運!」

同蔡少芬結婚九年,如漆似膠,近日兩公婆頻頻拍住上拍廣告。

張晉是百分百住家男,不用開工,就會幫手湊女。

我最初鍾意,但往後是被迫的,沒法選擇,是一個出路。

九歲已經習武的張晉,無意要兩個女兒繼承衣鉢學功夫。
十年不變
第一次見張晉是十年前在山東,當年蔡少芬透過手寫稿,傳真到各大報館宣布婚訊,夾啱時間,從未曝過光的準新郎在當地為大哥大洪金寶的電影開工,我奉命追到當地訪問張晉如何抱得美人歸。當年零下一度,閃光燈閃個不停追住問準新郎哥兩人的一切,張晉害羞得避鏡頭,聲線細到近乎要貼近耳邊才聽到。
十年了,張晉的慢熱、怕生暴依然,拍照時,現場靜到不是相機的快門聲,便是冷氣機的聲音。當事人大抵也覺得靜到有點不好意思,打開話匣說:「我是比較慢熱點,通常慢熱的人,感情會比較深厚。」蔡少芬揀張晉,或多或少是這個原因吧!

07年,蔡少芬同張晉聯名親筆撰寫公開信,宣布結婚,哄動一時。
撰文:陳琳 
攝影:黃志明
形象:黃碧珊 
髮型: Eva Wong@Hair Corner
化妝:翁嘉齊 
場地提供: Studio King 
服裝: Burberry、 Dolce& Gabbana

文章標籤
創作者介紹

明星八掛大分享★☆

tvb4life 發表在 痞客邦 PIXNET 留言(0) 人氣()