早前兩公婆出席活動,阿靚鬧爆 Chilam陪阿仔玩滑板,唔做好安全措施。

探熱針

嚴媽突放寬阿靚陪魔童踩板零安全措施

贊助商連結

最近用 9,180萬買入大坑道大寶閣 2,465呎豪宅的張智霖,除要努力開工搵錢,仲要忙住處理家庭糾紛。
事關前排 Chilam同阿靚孖住出席活動,俾老婆詐晒型,鬧爆佢縱仔縱到「離晒譜」,兼責怪他陪仔玩滑板時,唔戴頭盔同護膝零安全措施,阿靚仲話:「跌親條腰骨你就後悔一世!」不過把口係咁講,轉個頭又見佢哋一家三口齊齊踩板,不知幾溫馨。

 


阿媽鬧完嗲老豆
上週一(廿三日), Chilam同阿靚湊埋囝囝魔童,及兩位老人家,齊齊去淺水灣開餐。一班人叫滿成枱餸,仲一人一支可樂送飯,邊食邊吹水。
食到尾聲,魔童掛住玩電話。阿靚見狀,即刻手指指起勢「哦」個仔。接收完阿媽「煩音」,魔童即刻搵老豆做救星。自稱「 Sugar daddy」嘅 Chilam,一手抱起個仔呵番。有老豆包庇嘅魔童,雖然已經十歲大,不過嗲起上嚟,照坐上老豆大髀,在「保護區」繼續篤電話。

十歲大的魔童坐上爸爸大髀,大個仔仲係好鬼嗲。

魔童食食吓都對住爸爸飛吻,冧死人!又難怪阿靚成日話呷醋。
阿媽監場玩花式
未埋單,魔童已經坐唔定,急不及待拎塊滑板出去大顯身手。一離開阿媽視線,魔童即變甩繩馬騮,跳上滑板表演高難度動作。見阿仔離開視線範圍,唔放心嘅阿靚即刻催老公埋單走人嵋實個仔。不過當日有阿媽監場下,魔童竟然可豁免戴頭盔!

雖然有阿媽實,不過魔童一樣無戴頭盔。

魔童練習花式動作,連跳幾次之後失平衡, pat pat落地。
男神凸腩
阿仔掛住玩, Chilam同阿靚就乘機拍拖,一時十指緊扣,一時又攬住行,好鬼恩愛!行到附近公園,魔童繼續 show time,不停練習花式動作,兩公婆實阿仔表演。魔童連跳幾次之後失手跌低,雖然 pat pat落地,不過好快自己企番起身。見阿仔玩得咁開心,安全至上的阿靚都竟然玩埋一份,叫 Chilam扶住試踩滑板,可惜唔夠三秒就失平衡投降,之後輪到 Chilam表演身手,估唔到四十六歲的他踩得似模似樣。不過,啱啱食飽的他著住件白色貼身衫,大肚腩凸晒出嚟,男神因為陪仔踩板,失策咗!

食飽飯,著白色貼身 tee的 Chilam凸晒腩,男神咁失策呀!

見阿仔玩得開心,靚靚都搵 Chilam做扶手玩埋一份。

兩公婆陪仔玩之餘,順便拍吓拖。
撰文:娛樂組
攝影:陳亦龍

文章標籤
創作者介紹

明星八掛大分享★☆

tvb4life 發表在 痞客邦 PIXNET 留言(0) 人氣()