探熱針

余詠珊曾勵珍明爭  71歲李家鼎變磨心

贊助商連結

《阿爺廚房》不只令李家鼎坐穩廚神之位,還豬籠入水,活動及代言一個接一個,有份投資的「鼎爺私房菜」更高朋滿座,不少名人高官慕名而來, booking去到明年 3月,近日恒基兆業老闆李兆基帶埋兒子李家誠及媳婦徐子淇幫襯,認真巴閉。
人氣熱爆,剛與大台約滿的鼎爺成為兩位高層余詠珊同曾勵珍爭食的肥豬肉,爭相要他歸順其下,一張合約兩支筆,據悉搞到夾在中間變磨心鼎爺好頭痕!

 


續約爭邀功
李家鼎與譚玉瑛主持的《阿爺廚房》由去年爆到今年,煮餸煮到財源滾滾,搞到「余曾」兩派都想爭食這塊肥豬肉。據悉大台一直鬥到你死我活的兩黨,為鼎爺各自發功。「管經理人嘅樂易玲近年失勢,所以佢同珍姐(曾勵珍)一早已經聯成一線,同管綜藝嘅余詠珊對衡。鼎爺喺綜藝節目爆出,幫大台賺咗好多廣告費,余詠珊好自然搵佢傾續約條件,但樂易玲係管藝人,雖然以前當鼎爺係草,但紅咗就當寶,叫佢續約就唔同晒聲氣啦!
照道理,鼎爺應該騷余詠珊,但樂易玲搵珍姐出馬,話晒珍姐同鼎爺交情好深,珍姐咁多年都好尊重鼎爺,所以珍姐開到聲叫佢同樂小姐傾續約,雖然張約都係簽俾大台,但金蛋同邊個傾,嗰個就有功勞嘛!搞到鼎爺夾喺中間唔知點好。」一名無綫工作人員爆。

鼎爺有生意頭腦,節目受歡迎,食住個勢與朋友投資開私房菜, booking已去到明年三月。

除了出活動及代言產品,鼎爺還出書教煮餸!
靠煮食谷收視
據知,鼎爺煮餸煮出無限商機,搞到無綫明年除了推出的《阿爺廚房 2018》第三輯外,還重點大搞其他飲食節目。「無綫見劇集收視唔穩定,反而烹飪節目老少咸宜,出年唔只繼續食住鼎爺嘅餘威,仲會加入埋曹永廉、蕭定楠合作嘅兄弟廚房,另外有啲旅遊嘅飲食節目,總之就係想靠煮食搶灘谷收視。」無綫工作人員續說。
四叔古仔都幫襯
鼎爺有幾紅?紅到連出名低調的恒基兆業老闆李兆基拉隊,同兒媳及一班富豪老友去幫襯。「上星期二(十七日),四叔去咗幫襯鼎爺,唔只帶埋李家誠同徐子淇嚟,仲請咗班朋友一齊食,李國寶都喺度,四叔佢哋食到十一點幾就喺後門走咗,全程都好低調。」除了四叔一家低調幫襯,就連 cool爆的古天樂亦有私下去試鼎爺手勢,唔怪得鼎爺私房菜的 booking已去到明年三月啦!

上週二(十七日),四叔帶埋李家誠及媳婦徐子淇幫襯鼎爺,還設宴款待李國寶等好友。

古天樂上個月跟黃栢高秘密去試鼎爺手勢!

節目受歡迎,鼎爺幫大台進賬唔少,成為大台金蛋。另外,還有曹永廉與蕭正楠合作的《兄弟廚房》。

撰文、攝影、攝錄:娛樂組

文章標籤
創作者介紹

明星八掛大分享★☆

tvb4life 發表在 痞客邦 PIXNET 留言(0) 人氣()