探熱針

沈震軒短訊求救 周麗淇返香港幫拖

贊助商連結

合作過一套劇可以有幾 friend先? Friend到一個短訊即刻度期返香港幫手拍 MV,順便開金口唱埋 feathering,最緊要係斗零都唔收,所講的是沈震軒同周麗淇這對舊拍檔。一二年拍完《好心作怪》後,他們 friend過打 band,如果當年兩個開工期間攬頭攬頸或者管接管送,應該傳咗緋聞!

 


信星座好啱傾
近年主力大陸拍劇,早前被甄子丹邀請客串《追龍》的周麗淇,甚少在香港曝光。不過這日 Niki竟然在香港蒲頭,化行妝著到靚一靚,現身一間餐廳,全因約了沈震軒。咪以為兩個大纜都扯唔埋,實質兩人一二年曾經合作拍過電視劇《好心作怪》,雖然做上司同下屬,而且對手戲不算多,但係兩個偏偏好啱嘴型,全因大家有共同興趣。
「我處女座,佢金牛座,因為大家都好信星座,所以會傾得埋!」沈震軒說。
本週一(二十三日)沈震軒正式加盟太陽娛樂,主力做唱作歌手,早前操到爆肌晒身材的 Sammy,在第二首主打歌《我真的很好》,就走情歌路線,仲親自包辦曲詞創作,個 MV更希望搵個有 feel又有分量女星演出,結果他只是 send了一個口訊俾 Niki,「你快啲幫吓我,我爭一個 MV女主角!」 Niki隨即回覆說:「等我度吓個期。」然後話咁快就返香港交人進行拍攝。

周麗淇幫沈震軒諗埋大家點攬先至夠 sweet,細緻到連手指撐開定合埋都計算在內。

鏡頭後兩個勁忍唔到笑,尤其是 Niki,頻頻笑到喊,想點呀?


每拍完一個鏡頭,兩人埋位睇 playback之餘,又同導演研究鏡頭角度。

12年周麗淇同沈震軒合作電視劇《好心作怪》而成為好友。
再開金口

週一太陽娛樂為沈震軒舉行大型加盟記者會,大師兄許志安俾面撐場。

Sammy首新歌講初戀,導演為了配合內容,特別加插了中學讀書的情節,順勢有人提議搵女主角唱埋 feathering。據知 Niki無問內容,便一口答應,令 Sammy大為感動,「總之佢( Niki)有張『必用金牌』,佢要我做乜就做乜啦!」
這天 MV拍的畫面大部分都是情深款款的場面,但兩人太混熟的關係,一情深互望兩人例必爆笑收場,最誇張是 Niki往往笑到流眼水,收唔到聲,要勞動化妝姐姐幫佢補妝。
死 keep格仔餅
離開大台轉型拍電影、做歌手,沈震軒為咗表現出自己有「打不死」的拼搏精神,於是積極修身操人魚線同六嚿腹肌。即使爆肌宣傳相已經影完,但 Sammy依然無放軟手腳,每日 keep住飲八公升水排鹽,拍 MV當日仍然是雞胸當午餐,全因公司已經幫佢接咗幾套動作電影,一圓他做打仔的夢想!

爆肌 look靠節食、飲水加埋不停操練,足足兩年先有人魚線同格仔餅跟身。

公司承諾開戲做打仔,影完爆肌相的沈震軒惟有繼續食雞胸 keep身形。
撰文:娛樂組
攝影:何子洋、蕭敬漁

文章標籤
創作者介紹

明星八掛大分享★☆

tvb4life 發表在 痞客邦 PIXNET 留言(0) 人氣()