早前 Kathy賣甩細仔,湊大仔 Jacques去山頂附近公園玩足一個下晝。

探熱針

唔怕做高齡產婦  43歲周汶錡繼續追女

贊助商連結

43歲名模周汶錡 12年嫁俾法籍老公 Julien,結婚三年終於懷孕,誕下混血 B仔 Jacques。一心想幫老公追番個女, Kathy唔介意做高齡產婦, 16年再度佗 B,點知第二胎都係仔!不過 Kathy冇打算放棄,一於繼續追。
講明家庭第一,早排 Kathy趁有時間,陪大仔 Jacques去公園玩,兩歲大的 Jacques跑來跑去,精力無限,追到阿媽索晒氣!

 


紅過阿媽
要數圈中靚 B, Kathy混血大仔 Jacques一定榜上有名。集齊爸爸媽媽優點的 Jacques,眼大鼻高,加埋紅卜卜嘅面珠,網友 like爆,人氣分分鐘高過阿媽。難怪 Kathy寧願減產,都要黐實個仔。
「 Kathy而家有兩個小朋友,更加分唔到身,細佬而家半歲,開始有反應,有互動,搞到哥哥有啲呷醋,所以 Kathy寧願做少啲嘢,俾多啲時間陪佢哋。」 Kathy身邊人透露。

Jacques起勢喪跑,追到阿媽索氣。

兩歲大的 Jacques已經識玩滑板車,身手仲好敏捷。

玩到身水身汗, Kathy幫阿仔抹汗。

Kathy出動餅乾,先氹到阿仔休息一陣。

對住混血小妹妹, Kathy主動撩人玩。

見到大大隻摩西犬, Jacques一啲都唔驚,仲走埋去摸。

玩到差唔多天黑, Jacques都唔捨得走,要阿媽捉上車。
冧混血 B女
講得出,做得到。早前 Kathy賣甩細仔,湊住 Jacques去公園放電,同行仲有工人姐姐同一個混血小妺妹。一到埗, Jacques即刻甩開媽咪隻手,跑去玩滑梯,擒高又擒低, Kathy冇咁好氣,企埋一邊離遠盯實。其間對住工人姐姐抱住嘅混血妹妹, kathy仲嗒晒糖,主動氹對方。冇耐又有位 Uncle嚟到,陪 Jacques玩滑板車, Kathy就更加放心,坐埋一邊篤電話。
玩到身水身汗, Kathy嗌停個仔抖抖,不過 Jacques愈叫愈走。最後 Kathy要出動餅乾,先成功引到個仔。幫個仔抹完汗, Jacques企定定食完包餅,繼續喪跑。阿仔精力無限, Kathy陪玩到差唔多天黑,終於叫得郁阿仔返歸。

法籍老公 Julien恨生女恨出口, Kathy為配合老公,唔怕做高齡產婦繼續追。


15年邱淑貞同沈嘉偉都有帶過二女沈日同細女沈晨,去山頂甘道兒童遊樂場玩。

唔會封肚

當日 Kathy仲同大台過氣「咪神」梁政珏擦身而過。

原本唔多願生小朋友嘅 Kathy,一五年誕下大仔 Jacques,俾得意仔融化,開始改變主意。據知細仔 Avner出世後, Kathy未有打算封肚,亦唔介意做高齡產婦,想追多個女為止。
「結婚前 Kathy唔係特別鍾意小朋友,相反佢老公就好鍾意,不過 Jacques出咗世之後,見到個仔咁得意,諗法就唔同晒啦,佢而家最想追個女,仲話生到嘅話生幾多個都冇所謂,反正佢老公鍾意大家庭,熱鬧啲。」 Kathy身邊人透露。
「咪神」變大媽
當日山頂公園除咗有周汶錡同阿仔,同場仲有大台過氣「咪神」梁政珏,湊住囝囝 Johnson玩足一個下晝。一五年嫁俾有米商人何思源( John),梁政珏封咪歸隱。做咗師奶仔兩年,就馬上跌晒 watt,當日見佢著住件肉色小背心,孭住大大個環保袋,仲拎住把扇,遠睇似足祖國大媽。
早排出玫瑰疹搞到入院的 Johnson,呢日鬼咁生猛,十足十甩繩馬騮四圍捐,梁政珏見到個仔玩到滿頭大汗,就追住幫佢抹汗。之後仲索性幫阿仔除埋件衫,齋著住件白底衫繼續玩。其間有一名外籍小妺妹主動撩 Johnson玩,不過 Johnson好怕醜不停閃避,之後仲要阿媽出手解圍。玩到冇電, Johnson要媽咪抱住上車返歸。

做咗師奶兩年,梁政珏無論衣著打扮都十足十祖國大媽。

梁政珏當年身材逼爆,經常以泳衣示人。

Johnson四圍跑,梁政珏追住幫個仔抹汗。

其間有外籍小妹妹上前撩 Johnson玩,不過 Johnson唔領情。

早排梁政珏同囝囝去 IFC shopping,掛住睇眼鏡,將阿仔連人帶車放喺門口,好危險喎!

混血靚 B
圈中有不少混血 BB,遺傳星爸星媽最靚基因,五官精緻可愛,一舉一動,受不少網民追捧。


官恩娜
15年下嫁混血醫生 Juan,同年 10月誕下兒子 Gabriel( BeBe G),官恩娜經常在 instagram上載兒子可愛照片及影片,囝囝眼仔碌碌,似足媽咪,早前官恩娜宣布再度佗 B,停工待產,三年抱兩。


梁詠琪
15年與西班牙籍老公 Sergio誕下囡囡 Sofia,遺傳媽咪手長腳長,眼大大肥嘟嘟,表情多多,混血 B樣就似足爸爸,早前中秋節, GiGi放兩條片上網,其中母女一齊扮貓星人「喵喵」叫聲,點擊極高, Sofia舉起招財貓手勢非常可愛。


吳彥祖
13年與中法猶太混血兒 Lisa S.誕下女兒 Raven,女兒樣貌一直低調,去年,吳彥祖在社交網貼上劇組大合照,網民亮點全放囡囡 Raven上,一頭鬈曲長髮,吃東西表情非常可愛,與爸爸成個餅印,被網友大讚得強大基因,是一個小美人。
撰文:娛樂組
攝影:瀚鍾、李玄

文章標籤
創作者介紹

明星八掛大分享★☆

tvb4life 發表在 痞客邦 PIXNET 留言(0) 人氣()