氣管收縮停工養病

探熱針

重提李思捷委屈爆喊 春卷:捧到佢上天,最後忘記咗你

贊助商連結

春卷王寶葆(前名王寶寶)十八歲入行,未幾被大她十六年的李思捷私有化,拍拖四年,前度經常被拍到攬女夜蒲偷食,她都會配合出來拆彈力撐,拖拉多年,一三年二人終於分手,王寶葆淡出娛圈。今年初,決定給自己最後圓夢機會,簽約王晶復出幕前拍戲。
王寶葆日前接受訪問,哭訴多年委屈,原來三年前開始氣管收縮,甚至抖唔到氣,澳門男友建議她停工養病,反令她生活得更不開心,因開始醒覺一直為身邊人付出而失去自己,甚至為生活低聲下氣搲撈;就算她形容是好男人的李思捷,以為全力支持他追求夢想會有回報,原來都是一場空:「我捧到佢天咁高,最後佢忘記咗你。」

 


記得我叫王寶葆
王寶葆十四歲開始在英國兼職模特兒幫補生活費,來港在娛樂圈發展,被揀中做美味天使的「春卷」彈出,以為事業繼續發展可圓演員夢,但跟當時發力上位的李思捷拍拖後,幕前機會卻愈來愈少,慢慢變成背後女人。
「我識佢時,佢同我講希望有日有人會記得佢叫李思捷,我好支持,因為我都希望有日人哋記得我叫王寶葆,而唔係春卷,所以我好支持佢。我同佢咁多年,見證住由無人記得佢,到愈來愈紅,有自己嘅騷。但名氣令一個人改變,我好努力妥協,不過都係唔 work。其實名氣唔係一切,重要係用咩態度對待其他人,名氣只係一張通行證。
前度啟發我好多,佢係好男人,我聽過好多人講關於佢嘅嘢,但真心覺得佢係好,有才華,只係可能佢某啲諗法錯咗,但好多其他演員都會咁。」她說。

李思捷跟寶葆拍拖,男方一直唔肯正式承認,難得有張合照,她也放 Ig晒幸福。

拍拖初期,李思捷飲大兩杯,被拍到在生日 P拖女友手介紹朋友認識。

被錢國偉發掘,在《美女廚房》做美味天使,只有十八歲的春卷(左一)十分搶鏡。

正式回歸娛圈,寶葆狀態甚 fit,她自言會繼續接化妝品 job。

十四歲開始做 model,寶葆出道以來,也不吝嗇泳衣出鏡。
抑壓多年
每個經歷都是學習過程,就算上了一課,王寶葆也承認這些年有不少委屈,一直抑壓自己:「因為我永遠都支持愛嘅人,屋企人或者其他人,但掉轉頭,你支持佢,捧到佢哋天咁高,變咗佢哋忘記咗你,睇低你,佢哋忘記係因為你,佢哋先會有咁高、咁有自信。無人知我同佢(李思捷)分手原因。佢係好男人,啲人睇錯佢,淨係睇佢唔好一面,佢一直好多新聞,我唔會出聲。成名後確係有好多蜜蜂黐埋去,佢變係正常,只係視乎大家點去面對。我一直支持佢,因為希望有日,身邊人都會咁樣支持我,不過好不幸, I'm always alone。」

李思捷憑《玩嘢王》搞喊鍾嘉欣升呢,大台隨即開新節目給他孭重飛。

跟王祖藍、阮兆祥拍住阿姐合作《荃加福祿壽》,成為大台最受歡迎節目之一。

跟寶葆正式分手後,李思捷更肆無忌憚,成功融入「胡說八道」一班姊妹中,經常玩影相放上網晒命。

今年六月,李思捷被拍到又有新女,跟𡃁模彭湘淇在私竇撐枱腳。
放棄做手術
抑壓變出病,一三年,跟李思捷分手的前半年,她出現「鬼剃頭」大量脫髮,正式分手,她開始呼吸困難,醫生跟她說是因為壓力大,加上空氣污染,氣管不斷收縮要做手術。她說:「不過睇完網上關於手術片段,我好驚,放棄唔做,醫生建議我食藥控制,盡量唔好俾自己咁大壓力。我冇同屋企人講過呢件事,唔想佢哋唔開心,就好似屋企人嘅事,我寧願沉默面對,所以呢兩年,我冇乜見人。」
在單親家庭長大,一直是經濟支柱,跟李思捷拍拖後工作量大減,她做過化妝師,擔任翻譯,但仍不時擔心食藥影響手震,又或工作期間抖唔到氣。慣於報喜不報憂,面對欠缺安全感生活,每提到家人便痛哭的她,這樣形容跟他們的關係:「有啲複雜,屋企人好似拍拖,要一齊努力,屋企人冇得揀,所以好難。佢哋辛苦湊大我,而家開始老,我要負起呢個責任, love係無條件,不論幾辛苦,有幾憎佢哋,有時真係好憎佢哋……其實就係 love and hate關係,幾憎佢哋到最後都會關心,就算有幾困難都會盡量照顧佢哋,因為我係佢哋嘅全部。」

訪問中,寶葆幾乎全程喊住接受訪問,盡訴多年來委屈。

鬼剃頭
寶葆甩頭髮期間,經常戴帽戴頭巾示人。

在澳門定居一年多,她也經常返香港接 job。

寶葆兼職行婚紗騷,間唔中也有機會著傳統裙褂。

寶葆跟媽咪住在香港接近十年,由她一直照顧養家,好孝順,早前跟媽咪飲下午茶,她放 Ig分享。

重出娛圈,她打扮性感出席首映禮,大騷四十一吋長腿。

簽王晶後,她跟經理人公司一班藝人出席《追龍》慶功宴。
李思捷四年偷食三件 春卷死忍
09年,只有 19歲的春卷被李思捷私有化,可惜有嫩口女友仍未心足,四年情裡單是浮面的偷食緋聞已有三次,枕邊人春卷只有啞忍。


李思蓓
11年李思捷被發現密會「世界妹」李思蓓,兩人在佐敦私竇撐枱腳,再轉場銅鑼灣夜場共對到凌晨,之後輕攬李思蓓纖腰離開。其後二人關係破裂,因李思捷在酒吧向李思蓓好姊妹手多多而反目。


Naomi
食家李思捷 12年又被發現與𡃁模 Naomi密遊澳門,女方更在 facebook留言:「 I Love JL」, JL是 Johnson Lee,李思捷洋名縮寫,擺明向正印春卷挑機。


陳雅倫
13年初李思捷再一次背住春卷,與陳雅倫玩姊弟戀,二人孖住離開夜店跳上的士,在車廂又擒又啜,之後雙雙返回女方屋企繼續纏綿。一再偷食圈中人,令春卷心死,同年宣布分手。
撰文:娛樂組
攝影:何子洋、蕭敬漁
場地提供: Bora Seafood

文章標籤
創作者介紹

明星八掛大分享★☆

tvb4life 發表在 痞客邦 PIXNET 留言(0) 人氣()