短篇小試

前驅終到著  INFINITI Q30 2.0t GT

贊助商連結

去年中到港嘅 INFINITI Q30,雖然講到明同 M-Benz GLA共用 MFA底盤同引擎,但其流麗嘅外形設計大獲好評,風頭竟然蓋過大廠嘅 GLA! Q30分別有三款型號選擇,由代理得知,最多人查詢嘅型號屬於 2.0t GT頭驅版,可惜呢個型號全球都好搶手,所以出現供不應求情況,要押後到最近先至抵港。車價$369,800嘅 Q30 2.0t GT,比頂級 2.0t SPORT AWD平接近 8萬,但引擎輸出一樣,而且擁有更低耗油數字,難怪會成為搶手貨。

 


遲咗一年先至抵港嘅 Q30 2.0t GT,屬於 2017年製造版本,但又唔算係 facelift版本,因為實際改動其實唔多,最主要加入咗 Engine Push Start免匙啟動按鈕。聽代理講其他 Q30型號亦都已經更新為 2017年製造版本,所以新 update唔係 2.0t GT版嘅專利!
Crossover味更濃厚
頂級嘅 Q30 2.0t SPORT AWD,廠方以高性能包裝,所以包圍都比較 attractive,懸掛亦都降低咗,以迎合運動化嘅主題!至於唔再 sell高性能嘅 2.0t GT,改用更收歛、更圓渾嘅包圍,但四邊鋼琴黑色輪拱仍然保留,配合比 2.0t SPORT AWD升高 20mm嘅懸掛, Q30 2.0t GT睇落更加高大,更貼合 Q30最初玩 crossover SUV嘅概念。相比一街都係並以高性能掛帥嘅歐洲小車, Q30 2.0t GT更具個人風格,有性格好多!

尾喉同尾泵把設計有 GLA facelift後嘅影子。

中控台按鈕擺位都有 GLA影子,不過車廂設計風格完全不同。

後座中央設有摺合式手枕連杯架,空間比其他歐洲 hatch back為佳。。

Spinal Support零重力脊椎承托結構前座,具有 3組調校記憶。
齊料設備走辣
車價比頂級版下降近 8萬蚊嘅 Q30 2.0t GT,除取消咗四驅系統,車廂亦都抽起一體化椅背前座以及金屬腳踏等運動化裝備,並改配包上 Nappa真皮嘅 Spinal Support零重力脊椎承托結構座椅,增強乘座舒適感覺。而 2.0t SPORT AWD既有嘅其餘設備, 2.0t GT都統統保留,唔少更屬 M-Benz GLA上嘅 option設備,例如雙區恆溫冷氣系統、 10聲道音響,音響仲要由 BOSE主理, GLA都冇得加!有趣嘅係, Q30 2.0t GT卻比同級 GLA 250嘅$439,000車價平多 7萬蚊,加埋 option隨時平近 10萬蚊,所以 Q30唔單只樣靚,而且更加抵玩!

追加嘅免匙啟動按鈕,位於軚盤右後方。

標準配備 BOSE 10聲道喇叭音響,車尾士啤胎位置更藏有 subwoofer。

安全系統包括防越線警示系統。
同樣 208匹馬力
Q30 2.0t GT配備與 GLA 250相同嘅 1,991c.c.直四 turbo引擎,馬力同扭力與 2.0t SPORT AWD版本一樣,維持 208匹馬力同 35.7kgm峰值扭力。配合 7前速 DCT雙離合器波箱,性能雖然同四驅版一樣,但因為改為更簡單嘅前驅佈局,以及升高車身後改用嘅長行程避震,駕駛感反而較四驅版輕鬆自在得多,唔會郁吓都想開快車嘅感覺。而且引擎喺 1,200rpm時已經釋放峰值扭力,車廂隔音亦都優良,車廂寧靜度更同 GLA等歐洲車睇齊,所以呢個版本比較適合以舒適為首要選擇條件嘅車迷。
除此之外,因為驅動簡化咗、車身亦都減少 100kg負擔,令 Q30 2.0t GT耗油比四驅型號下降 8%,即 6.3L/100km(四驅型號為 6.9L/100km),唔單只車價平咗,油錢都可以慳多啲啲,所以受歡迎唔難理解。

208匹馬力並冇想像中猛烈加速感,反而出力非常線性。

1,991c.c.直四 turbo引擎與 GLA 250共用,不過 GLA 250馬力輸出為 211匹,比 Q30 2.0t GT多 3匹,但扭力一樣。

7前速 DCT雙離合器波箱來自 M-Benz,波棍旁亦提供 E/S/M 3組駕駛模式按鈕,同樣由 M-Benz嘅 Dynamic Select移植過嚟。

波箱配合軚盤+/-轉波撥片,屬於標準配備。
請斯文地駕駛

車身升高,更加帶有 crossover車種味道。

車身升高後嘅 Q30 2.0t GT,雖然配備 Rebound Spring吸震筒嚟保持車身升高後嘅抗傾能力,不過因為車身重心高咗、坐姿都高咗,呢個先天因素令呢架前驅版 Q30駕駛感有如一架 SUV,欠缺咗 2.0t SPORT AWD嘅靈敏度,兩個版本完全性格相反!筆者試車時都有試過坐上乘客位,坐咗轉飛鵝山,喺連環彎路開快啲就會有「浪」嘅感覺,但將速度稍為減慢,就能重回舒適流暢嘅行車質感,所以此車不宜彎路快開,否則會完全浪費偏向舒適嘅設定。

雖然同 M-Benz GLA共用底盤,但軸距就比 GLA長咗 1mm。

INFINITI Q30 2.0t GT Spec.
引擎: 1,991c.c.直四 turbo
馬力: 208hp/5,500rpm
扭力: 35.7kgm/1,200-4,000rpm
傳動: 7前速自動、附+/-模式
車身: 4,4251,8051,495( mm)
軸距: 2,700mm
耗油: 6.3L/100km
車價:$369,800
查詢: INFINITI HK( 2756 9123)
撰文:黃德禹
攝影:林文樂

文章標籤
創作者介紹

明星八掛大分享★☆

tvb4life 發表在 痞客邦 PIXNET 留言(0) 人氣()