Dream Car

氣流專家  Lamborghini Huracá n Performante

贊助商連結

人類嘅爭勝之心永遠唔會停,正因為咁,啲新款車先會愈嚟愈大馬力!愈嚟愈快!不過單純加大馬力去追求速度都唔係辦法, Lamborghini Huracá n Performante年初時以 6分 52.01秒成為紐堡靈北環賽道當時最速量產車,靠嘅不單係加大馬力輸出,更重要係由車頭到車尾都用新型包圍組件,全車大玩高科技氣流力學!加速快過 Aventador!難怪一度稱王紐堡靈之餘,仲成為 Huracá n旗艦型號。

 


主動式玩氣流
或者有人會問:「 Huracá n呢個樣已經說明將氣流力學玩到盡,仲有咩好搞?」我夠知李生係有錢佬,咁點解佢仲要做?其實車廠見 Huracá n係一個好好平台,先會不斷為佢強化,一來可以挑戰新紀錄嚟鞏固品牌形象,二來可以收集更多數據為未來新車作基石。 Performante版本嘅升級主要分 3個部分, 1)用上專利 ALA( Aerodinamica Lamborghini Attiva)主動空氣動力學系統嘅車身包圍; 2)包圍及車廂大量應用鍛造碳纖維複合材料; 3)馬力輸出進一步加強。
「 ALA」喺英文中解作「翼」,正好解釋 Performante版本嘅新車身包圍就好似為 Huracá n加上一對翼一樣!可以利用包圍嘅微妙變化改變氣流,從而增加下壓力及減低風阻。頭泵把及車尾引擎艙上方嘅入風口內藏活門,可以 500毫秒內開啟或關閉,引擎艙嘅入風口更同中空尾翼連接,當活門關閉時可得出比普通 Huracá n多 750%嘅下壓力!活門更可以兩邊開啟唔同角度,空氣引入尾翼內部,再經尾翼底嘅氣槽排出時,可增加轉彎時嘅內側下壓力,自然轉彎都好似貼住路面咁,打破紐堡靈北環紀錄唔係冇道理。

尾翼前嘅入風口有活門,可由電腦控制 500毫秒開合。

尾翼底部有一串導風槽,可以將空氣由尾翼底排走。

表板仍然係彩 mon.,切換駕駛模式可以改變顯示資料。

冷氣出風都由鍛造碳纖製成,而且印上字樣,巴閉!

座位由 Alcantara物料製成,表面仲有雷射刻印圖案。
鍛造碳纖車廂

車內佈局其實冇改變,但中控台及多處地方都用鍛造碳纖,輕量化之餘亦靚仔。

Performante版本另一賣點係全車多處地方用上造價昂貴嘅鍛造碳纖維, ALA包圍大部分部件都係用呢種好似黑色雲石嘅碳纖維,配喺亮黑色漆面部件旁邊,完全融合。車身用鍛造碳纖之餘, Performante版嘅車廂都大量採用,中控台、冷氣出風口、門手把,甚至軚環背轉波撥片都用上,據了解鍛造碳纖為車重減磅 40kg,現時只重 1,382kg,比一部 VW Golf GTI仲要輕!
碳纖之外,車廂最常見物料一定係手感同猄皮似到十足嘅 Alcantara,由座位、門飾板、中控台,甚至地毯都用,而且大部分都用雷射刻上 Lamborghini常用嘅花紋,賽車感覺濃烈。
2.9秒破百
一部普通嘅 Huracá n配 610匹馬力、 5.2公升 V10引擎,已可以 3.2秒完成 0-100km/h加速,早早已列入 supercar,然而突破 3秒關口卻非易事,須知強如 Aventador S都要 2.9秒! Performante版本沿用 5.2公升 V10引擎,但馬力輸出增加 30匹,達到 640匹馬力,配合埋特輕車重及新包圍,令佢可以同 Aventador S平起平坐、 2.9秒完成 0-100km/h!成為首款突破 3秒嘅 Huracá n!難怪廠方以 Performante版取代以往 Superleggera版本嘅頂級地位。 Performante版配用 7速 LDF雙離合器自動波及四驅系統,唔理你係車手還是新手,操控一樣輕鬆,要佢快絕對容易,問題係有幾多地方可供佢伸展筋骨?

引擎保持同一規格,但馬力增加 30匹,達到 640匹。

7速波箱表現快速,而且外觀都夠晒有型。

軚盤背嘅+/-撥片都由鍛造碳纖製成,夠晒大塊,夠晒就手。

車頭泵把全新設計,內藏活門可以控制車頭下壓力。

Performante版本車身更有意大利國旗拉花貼紙及中央鎖輪圈。

0-100km/h加速只需 2.9秒!同頂級嘅 Aventador S一樣咁快!

Lamborghini Huracá n  Performante Spec.
引擎: 5,204c.c. V10
馬力: 640ps/8,000rpm
扭力: 61.2kgm/6,500rpm
傳動: 7前速自動、附+/-模式
0-100km/h: 2.9秒
車身: 4,5061,9241,165( mm)
車重: 1,382kg
車價:$4,880,000起
查詢: Lamborghini HK( 2900 6666)
撰文:袁國基
攝影:葉偉豪

文章標籤
創作者介紹

明星八掛大分享★☆

tvb4life 發表在 痞客邦 PIXNET 留言(0) 人氣()