陳雅倫北上開騷真風騷

贊助商連結

「美魔女」陳雅倫上年同吳彥祖表哥Martin拍拖,幾個月之後就分手兼反面。佢除咗鬧爆男方背住自己攬女同大話連篇之餘,仲話喺對方身上使咗唔少錢,佢好豪氣咁同東姑講:「同我拍拖嘅男人,我都肯使錢。佢係冇錢兼冇權,但佢靚仔;我就母愛心態,呵護佢,所以咩都買畀佢!十幾萬嘅電話號碼我都買畀佢,電話費我交埋冇所謂,就算分咗手都冇諗過問佢拎番!」

其實,五十一歲嘅陳雅倫身形同皮膚,點睇都只係似三十幾歲,所以緋聞男友o氹o氹轉,除咗李思捷外,仲有太陽娛樂嘅老闆洗米華等。東姑最近見到呢位美魔女以自己做招牌,喺網上賣美容產品;不過,佢同東姑講,只係想將自己用過好嘅美容產品推介畀大家,唔算係做生意。而鍾意熱鬧同埋唱歌嘅佢,更加唔介意收少啲錢去內地登台同粉絲聚會。

早前,佢就先去咗湛江,然後再坐兩個鐘頭車去茂名一間酒吧登台。為咗冧粉絲,佢準備咗廿張海報,二百張靚相;而當晚個場有成超過五百人捧場,令到成間酒吧座無虛席,老闆仲為咗佢開四面台,似足喺紅館開騷,所以單身都可以好開心,分手又使乜驚呀?

陳雅倫嘅粉絲為咗見偶像一面,一早就買定枱,仲訂定橫額,踴躍支持。

 

為咗答謝班粉絲,陳雅倫一到埗就忙住簽名,準備夜晚送畀粉絲做見面禮。

 

陳雅倫一向出名錫粉絲,所以帶咗好多海報同埋簽名相嚟,多到鋪滿咗酒店嘅客廳。

 

個酒吧專登為咗陳雅倫開四面台,現場座無虛席,似足喺紅館開騷。

 

為咗見粉絲,陳雅倫由湛江再坐兩個鐘車去茂名,雖然長途跋涉,但係佢一啲都唔覺得辛苦。

 

當陳雅倫派簽名相時,所有人蜂擁向前,曾經一度混亂。

文章標籤

創作者介紹
創作者 tvb4life 的頭像
tvb4life

明星八掛大分享★☆

tvb4life 發表在 痞客邦 留言(0) 人氣()