青雲路

90後製香師 開班教造手工香

贊助商連結

香的歷史源遠流長,製香更是一門傳統的手工技藝。身為 90後的 Max,對香卻產生了興趣,在大學修讀視覺藝術時,他運用香作為創作媒介,更去到潮州香廠學習製香。他認為製香在香港有一定市場,在畢業後便決心成為製香師,以天然材料製作手工香,推出不同的產品,更開辦手工香興趣班,以吸引一眾愛「香」的人士。

 

 

因為家人點香的習慣,燃起了 Max對香的興趣,為了堅持製香師的道路,他表示食盡了人間煙火,「要諗宣傳、設計,每件產品要計成本,諗定價,要諗點樣維持生活,有時客人會覺得自己嘅產品唔值呢個價,要做一個品牌真係好難。」

採訪當日, Max正在開班教授製作手工香及驅蚊香包,一眾學員對着不同的香粉又聞又搓,反應十分熱烈。「艾草、香茅嘅氣味有驅蚊嘅作用,另外可以加入薄荷、肉桂及菊花等香粉,調配出你哋鍾意嘅氣味。製作步驟首先揀好香粉,然後依比例加水搓勻………」 Max表示參加興趣班的學員以女性為主,每位學員的學費由$300至$600不等,視乎教授的內容而定。
全職製香師
身為全職製香師的 Max,創立手工香品牌 Okapi Studio,推出不同的手工香產品,更開辦興趣班,「𠵱家我哋有塔香、手工香及香包等香類產品,當中有檀香、丁香、沉香及艾草等較傳統嘅香味,仲有鐵觀音、白鼠尾草及柑橘等特別嘅氣味,全部都係以天然植物製成,最近亦推出木香爐及香座等香具。嚟幫襯嘅客人有禮佛、靈修及家居用嘅人士,年齡層由 20至 70歲都有,我哋未有門市,主要透過網站及喺二十幾間賣綠色生活用品嘅店鋪寄賣。」
在讀書期間, Max已對香產生興趣,並運用香做藝術創作,「屋企本身有拜神,媽咪平時上香,都會講啲願望,求神明保佑之類嘅說話。燒香最後只會得到一堆灰燼,我覺得成件事好有趣,自此我開始用香作為創作材料,好似我將一紮紮香綁喺電路板上,模擬城市裏面嘅工廠;大學嘅畢業作品亦以香做主題,期間知道親戚喺潮州開香廠,仲返去學整香,斷斷續續學咗半年。」

三色手工香 10粒裝 $90
混合了肉桂、薑及艾草,燒至不同的顏色時會散發不同的香味。

手工松木製香爐 $850

線香會是 Max將推出的新產品。
拍檔四散
修讀香港浸會大學視覺藝術系的 Max, 15年畢業後與 3位同學創立 Okapi Studio, Max笑言當時是怕失業所以創業,「我哋未諗好畢業後做咩好,喺老師嘅介紹下,知道學校有個創業計劃,於是我哋決定參加試吓創業,成立 Okapi Studio,推出手工香、木製及鋅鐵產品。我哋又諗住接設計 project嚟做,但發現接唔到生意,大家開始諗唔同嘅出路,其他人相繼離開去搵嘢做。我喺呢段時間睇到市面上冇教整手工香嘅興趣班,可能係一個機會,就決定堅持落去。」
認定方向後, Max開始找機構合作,開班教授手工香,「初時搵賣家品、環保產品、手作品牌等唔同嘅店鋪傾合作,搵 20間可能得 1間會理我,但我都堅持做落去。我仲諗用唔同嘅模具及香料去吸引人,前後試咗過百款嘅植物,好多植物燃燒時散發嘅味,同本身嘅香味唔同,好似迷迭香、斑蘭葉、普洱等變成香點燃時,就有好大陣燶味,氣味唔好聞,但估唔到鐵觀音製成香後嘅氣味好清雅。我又推出製作驅蚊香包等功能性嘅興趣班,吸引到唔少女性嚟參加,會多咗人認識到我哋。」

Max開辦手工香興趣班以推廣手工香,很受女士歡迎,現時開手工香興趣班是他主要的收入來源。

手工香興趣班中, Max會教授學員製作塔香,利用不同模具製作手工香及驅蚊香包。
到日本學製印香
為了應對客人的疑問及增加新款產品, Max時常進修有關香的資訊,更遠飛日本學習,「客人會有好多有關香嘅問題,好似點乜嘢香會易瞓着啲,香料有乜嘢功用。但有啲問題會好刁鑽,好似考我咁,例如乜嘢叫合香、大乘佛教及小乘佛教燒嘅香有冇分別,平時要睇多啲有關香及草本植物嘅書。喺上年,我仲飛咗去日本當地學習整印香,之後加開咗印香工作坊,吸引多咗後生嘅客人嚟參加。」
經過年多的努力, Okapi Studio在 Max的打理下漸多人認識,但他表示人力始終有限,要有更大的發展便要尋求合作,「𠵱家會面對產量不足嘅問題,之前有台灣公司話一個星期內要 300盒香,但我做唔切只好推咗佢,好多機會就咁被迫放棄。最近我同聖雅各福群會嘅工場傾合作,我教佢哋整手工香嘅技術,佢哋提供人手,從而擴充生產線,可以推出更多類型嘅產品。嚟緊打算推出線香,以滿足唔同客群嘅需要。」

鐵觀音手工香 12粒裝 $189

把菊花磨成粉後,加入適當的水,就可以製作成手工香。

驅蚊香包 $50

Okapi Studio亦有售賣不同的植物香粉,方便想自家製作手工香的人士購買。
香粉 1盒 60g $80至$180
後記︰老土

Okapi Studio的手工香,大多是以天然的植物製成,如要製作菊花味的手工香, Max要先將菊花風乾,然後用磨粉機打成粉,「要磨 10公斤嘅菊花香粉要磨一個晚上,過程真係幾枯燥。」

在香港做製香師,讀藝術的 Max讓人感覺是一個不切實際的年輕人,但原來他的思想亦有傳統的一面,「一個人喺 studio整香整幾個通宵,搵鋪頭合作時,聽到人話:『整香邊有得做?』、『都唔知做嚟做乜?』令到我有諗過放棄。其實我想屋企人可以早啲退休,想同拍緊拖嘅女友結婚,雖然好老土,但呢啲想法令我一直堅持落去。」聽到這裏,記者不禁想起家人以人工不高來反對記者入行,普遍以賺取金錢的多少來判定份工好不好的香港,要堅持做一些自己喜愛的工作實屬不易,同時也十分羨慕他有家人及女友支持。


學員 阿嘉
喺網上見到 Max嘅報導,知道佢有開整香及香包嘅班,覺得幾得意,就嚟報名。整香嘅過程好有趣,可以親手揀鍾意嘅氣味,仲用天然材料製作。今次我整咗驅蚊香包及手工香,都會帶返屋企用。
Okapi Studio   http://www.okapistudio.org 
點入行?
Max表示現時香港已經沒有製香廠,對於有興趣入行做製香師的人士, Max表示可以手作人做起,「首先要對香、植物及睇書有興趣,因為製香有好多知識需要記,冇興趣就好難記入腦。然後報讀製香嘅興趣班學習製香技巧,除咗可上我嘅班外,亦可以去台灣、內地及日本等比較多手工香嘅地方學習。搵店鋪寄賣貨品及開辦興趣班來增加收入之餘,製香師屬藝術設計嘅範疇,坊間有唔少嘅創業基金可申請,有啲會提供以優惠價格租用工作室,好似我申請咗香港設計中心嘅『設計創業培育計劃』,以優惠租金租緊九龍灣製衣訓練局嘅辦公室嚟做 studio。」現時全職製香師的 Max,月入約$15,000至$20,000。
設計創業培育計劃  http://www.hkdesignincubation.org 
撰文:曾志恒
攝影:林文樂
部分圖片由被訪者提供

文章標籤

創作者介紹
創作者 tvb4life 的頭像
tvb4life

明星八掛大分享★☆

tvb4life 發表在 痞客邦 留言(0) 人氣()