鄧家彪同愛女一齊拍短片,顯示佢好爸爸一面,唔知係咪會有助選情呢。(鄧家彪 facebook截圖)

八卦陣

鄧家彪 鄭泳舜 慈父上身

贊助商連結

青年新政梁頌恆、游蕙禎因宣誓案失去嘅新東同九西議席,將會補選。建制派喺新東相信由工聯會前立法會議員鄧家彪上陣,九西就派民建聯鄭泳舜披甲。佢兩個最近不斷宣傳谷人氣,仲齊齊喺 facebook慈父上身,唔通覺得有助選情?

 

 

鄭泳舜其中一集《老老豆豆》, like嘅人數得百幾人,反應麻麻。(鄭泳舜 facebook截圖)

有三個仔嘅深水埗區議員鄭泳舜,喺 fb搞咗個節目《老老豆豆》,之前同民建聯立法會議員陳恒鑌、張國鈞,分享老豆經同子女教育問題。佢話自己係三個仔嘅「玩伴」,透過玩樂建立親子關係;三個老豆仲喺節目推介週末親子遊好去處。
鄧家彪更加父愛爆棚,上載短片「父女的愛與堅持」,話說個女澄澄要表演粵劇,佢當然去捧個女場,但又要出席工聯會活動,完咗活動趕返去睇個女,成個廿四孝爸爸咁款。
根據鄧家彪 fb預告,鄭泳舜已經同佢以及周浩鼎拍咗集《老老豆豆》。面對選戰,兩個都建立好爸爸形象,幫唔幫到選情就未知。但好似鄭泳舜獲得嘅 like,都係得百零幾個咁上下,網民唔算好 buy囉。
國慶中秋晚會 辣㷫袁海文

袁海文(前左三)見深水埗區議會批咗撥款,俾個一雞兩味嘅國慶中秋晚會,忍唔住引用月餅起義表達不滿。

深水埗區議會上星期批咗撥款,俾「深水埗文藝協會有限公司」搞番個「慶祝國慶 68周年中秋迎月文藝晚會」,搞到《壹》仔𢱑晒頭,到底佢想慶祝國慶定中秋?
會上有區議員都不滿呢個晚會一雞兩味,民主黨袁海文就引用朱元璋嘅月餅起義,話擔心會違反《基本法》第一條,即係「香港特別行政區是中華人民共和國不可分離的部分。」因乜解究講到咁嚴重?
佢喺會議上話:「當年朱元璋為咗推翻元朝,喺月餅攝咗好多紙條落去,我唔知佢點激勵,亦唔知點量化啦,如果你真係慶祝中秋就慶祝中秋,慶祝國慶就慶祝國慶,擺埋一齊我有啲擔心會違反《基本法》第一條。」袁海文講完,就冇乜人回應佢,撥款亦都通過咗。
文藝晚會當日,有冇人派攝咗紙條嘅月餅就冇人知,但係泛民就真係有學朱元璋,上星期派嘅冰皮月餅入面,就攝咗寫住「袁國強下台!」、「反威權十一遊行!」等嘅紙仔。唔知呢批月餅,會唔會好似六百幾年前嗰批咁勁,可以撼動政權?
淨心 BB著旗袍啜爆中佬
大家仲記得愛港行動召集人陳淨心嗎?最近冇乜聲氣嘅佢,喺佐敦街頭巧遇社民連梁國雄(長毛),上前鬧佢「喺中國人嘅地方搞事」,係賤人。不過長毛當場就唔認得佢,事後睇番自己拍嘅片,先認得佢係淨心 BB。
以往經常以烈女形象示人嘅淨心 BB,到論壇踩場手指指、眼超超鬧人,幾年前被本刊影到佢食煙隊啤傾通頂。不過,再兇惡嘅女人,都有溫柔一面。上個月佢搞生日 party, dress code係旗袍,一班師奶著旗袍,紅唇烈焰,佢亦喺 party上啜爆一名中佬,真係睇到都飽晒囉。
嗱,淨心 BB經常歌頌偉大嘅祖國,佢喺 Facebook留言:「中國共產黨一切以人民為本,如果共產黨能在香港執政,絕對是港人之福!」原來佢同屈穎妍都係九月之星,佢同屈小姐切蛋糕齊歡唱同慶賀,簡直係志同道合!

著上旗袍嘅陳淨心喺生日派對上同一名中佬啜嘴。陳淨心 facebook圖片

陳淨心同屈穎妍都係九月生日,仲一齊切蛋糕慶生。陳淨心 facebook圖片
明哥二號 老闆娘派麵惠長者
深水埗明哥陳灼明義贈飯盒幫助基層,善舉令佢家喻戶曉,最近仲獲得嶺南大學頒授榮譽院士名銜。其實同區有另一間車仔麵檔,今年五月都開始派麵,每星期一次,回饋社會。
老闆娘 Gigi話,之前派米發現派完後個人好開朗,原來做善事好開心,覺得可以做得更多。有時佢見到長者經過門口,但因價錢太貴唔捨得食,由於間鋪星期日休息,前一日好多時會賣剩嘢,於是本住唔好嘥嘅心態派麵。至於拎麵都有規矩,一張麵券一定要跟一張長者卡。
有街坊得知後,將好事放上網幫手宣傳,好多善長知道後都支持。 Gigi話:「有時客人食咗三十幾蚊放低五百蚊,有時客人食三十蚊放低二百蚊。」多出嚟嘅捐款,佢會額外買其他食物俾長者。佢仲已經用麵店名義成立義工隊,星期日放假就去做義工添。

一班公公婆婆排隊等拎麵。七十五歲陳婆婆(右圖)仲大讚 Gigi好好人,咁忙都做善事。

 

老闆娘 Gigi話,聽到公公婆婆每次來到都多謝佢,令佢好窩心。
撰文:巫不言
news@nextdigital.com.hk

文章標籤

創作者介紹
創作者 tvb4life 的頭像
tvb4life

明星八掛大分享★☆

tvb4life 發表在 痞客邦 留言(0) 人氣()