公認有演技的 BabyJohn首次拍劇,在《老表》與欣宜火花四濺,有指監製黃偉聲同祖藍都睇好他率先跑出。

探熱針

落重注 王祖藍貼錢捧 BabyJohn

贊助商連結

離開無綫自立門戶,王祖藍講嘢冇避忌,拍《老表,畢業喇》宣傳片夠薑寸大台製作流。着緊《老表》的他,今鋪押重注在 BabyJohn身上,不惜貼錢力谷。
不過最重注,就必定是對老婆李亞男。近年王祖藍北上吸金賺到盆滿砵滿,早已揸住近二億物業,甘心把最貴的豪宅齋寫老婆名。近日又豪擲千五萬人仔,在北京朝陽區購入商廈,同樣預埋老婆份!

 


貼錢捧 BabyJohn
王祖藍的《老表》惡搞宣傳片,明抄《使徒行者 2》宣傳片,由蔡芯(祖藍角色)扮三哥自白,自插《老表》製作輸有大陸資金的《使徒行者 2》幾十條街:「咁流嘅景,真係除咗香港,仲有邊度會搵到呢?」
《老表》宣傳資源少,祖藍一招自嘲製作,無非為谷新劇。今輯祖藍睇重 BabyJohn,讓他發揮潛能,演活成語亂講兼中英夾雜,明抽鍾樹根同 JM(文詠珊)水的搞笑人物。由於大台製作費甚奀,未能搵高手為一場 BabyJohn和欣宜對 Rap的戲份填詞,老闆祖藍索性自掏腰包。
「 BabyJohn表現好突出,祖藍睇好佢會彈出,所以 BabyJohn同欣宜一場重頭戲,貼咗五位數搵饒舌歌手 MastaMic填詞,希望呢場戲有火花。套劇仲有好多歌,都係祖藍出錢搞。」劇組透露。

蔡少芬撐祖藍兼還劇債,再次返大台拍劇,在《老表》演虎媽,辣味夠搶。

據悉 BabyJohn的角色玩中英夾雜,明抽 JM(文詠珊)水。

近日在網上流出一條 BabyJohn同欣宜對 Rap的重頭戲,有指呢幕是祖藍貼錢搞。

大台宣傳費少,多計的祖藍惟有用心思取勝,先後度出兩條惡搞片,都成網上熱話。
二千呎北京總部
近年將事業重心北移的王祖藍,北京亦買磚頭。繼去年豪擲億二買大埔逸瓏灣,有空中泳池的複式愛巢送給老婆李亞男後,最新的內地物業,亦同老婆兩份持有。
「祖藍喺內地好多工作,之前一有錢就入市,本身已經有成二億物業,包括三個逸瓏灣豪宅同觀塘 office。佢個工作室亦上咗軌道,依家公司有十八個藝人。北京公司嗰班同事,已經同佢合作咗兩年,大家好有默契,佢希望公司好好發展大陸市場,最近仲喺北京朝陽區用千五萬人仔買咗個二千呎嘅 office俾同事用,依家已經裝修好,大陸總部搬咗入去。」知情人說。

呢鋪最神似
雖然今次欣宜在《老表》繼續食老本扮阿媽,但屬最神似的一次。

欣宜多次扮肥姐,早年在賀歲片《 72家租客》以阿媽的上海婆經典造型現身客串,之後在內地節目《我不是明星》都扮過(圖)。


有指《老表,畢業喇》是該系列最後之作,故祖藍花盡心血俾演員發揮潛能,其中岑麗香也是祖藍睇重彈起的一個。

劇中欣宜飾演在外國長大的 ABC,喪母後來港尋父,完全為欣宜度身訂造的角色,劇中不少是她個人感受。
千五萬人仔買北京私竇 落埋老婆名
在微博發現祖藍有指是年初掟千五萬人仔購入的北京朝陽區,二千呎商廈做內地總部。呢嚿內地磚頭據悉老婆李亞男有份持有。

 

買環保飛翼電車
買磚頭當買菜之外,搵到錢當然要掃「玩具」,最近祖藍又買入一部 Tesla Model X環保電動車,成道車門可以升起, Falcon Wing(鷹翼車門)功能型爆。

跑出
「老表!」又嚟嘞,揸弗人王祖藍每集都俾演員發揮潛能,繼第一集王菀之同細細粒彈出,第二集又有震波男張繼聰跟燒衣男蔣志光跑出,有口碑有收視。


細細粒
第一集彈出的二百磅細細粒陳嘉佳,在劇中,以重磅身形加超級港女成網民及廣告商最愛,去年再進身大銀幕,在電影《捉妖記 2》飾演豬妖,跟梁朝偉做對手戲。


王菀之
由王祖藍三顧草廬才肯接拍第一部電視劇《老表!你好嘢》的王菀之,結果不負伯樂所望,憑晴晴一角彈出,發揮她獨有喜劇感,從此開多瓣變影星,被吳君如睇中邀拍《金雞》,去年更在電影《綁架丁丁當》做女一。


張繼聰
第二集《老表!你好 hea》飾演震波男的張繼聰,一招鏡頭前震波令他人氣急升,自此成為大台新寵,坐正男一,劇接劇成搶手演員。


蔣志光
在第二集飾演燒衣男的蔣志光,憑在劇中唱改編歌《相逢何必曾燒衣》成網民最愛,更力撐他開演唱會。同年為台慶表演,接拍廣告,早前更當上舞台劇男主角。

文章標籤
創作者介紹

明星八掛大分享★☆

tvb4life 發表在 痞客邦 PIXNET 留言(0) 人氣()