William做「跟得男友」提早陪女友飛去意大利,苟姑娘冧到暈。 

娛頭

 

意大利求婚 加拿大行禮 苟芸慧陸漢洋搵億元豪宅做愛巢

 

贊助商連結

苟芸慧(苟姑娘)同陸漢洋( William)拍拖大半年,感情突飛猛進,已經去到談婚論嫁階段,陸漢洋仲送埋家傳之寶,誓要將「女神」封盤,據為己有。
有晒共識結婚,最近更有人見到苟姑娘同陸漢洋密密睇豪宅,他們更對西半山過億「天匯」情有獨鍾,上週五( 15日)將要到比利時賽車的陸漢洋特別預早出發,做「跟得男友」陪苟姑娘飛去米蘭出席時裝周,更有消息指今次意國之旅,男方有晒計劃求婚及訂婚儀式,要苟姑娘告別處女黨,正式做「陸太」!

 


意國求婚之旅
賽車手陸漢洋經常出戰世界各地比賽,作為另一半的苟姑娘,一夾到期就做「跟得女友」去打氣,感情一日千里,拍拖未夠一年,陸漢洋已經將母親遺留給他的家傳之寶鑽戒送俾女友,確定「老婆」位置,佢仲公開斬釘截鐵話「娶硬」苟姑娘,無論苟姑娘變得幾肥都好,都會寵她一世,不過口講無憑,最近陸漢洋終於有行動,計劃了多月的求婚之旅正式展開!
適逢本月苟姑娘獲邀到意大利出席時裝周睇騷,撞正男友亦將要到比利時賽車,兩人一早度好晒期會留低喺歐洲繼續「歎世界」。「 William(陸漢洋)喺兩個月前做晒 research,問定好多朋友意見,出發前已經 book好酒店同餐廳,話想製造浪漫求婚及訂婚儀式!不過佢成日驚苟姑娘估到晒冇驚喜,所以個個問親佢婚期,佢都死口話未咁快,但其實佢已經有晒 planning誓要喺今次歐洲之旅娶得美人歸!」陸漢洋身邊人說。

戴住情侶戒指的苟姑娘同 William,十指緊扣入閘。

對「求婚之旅」不容有失的 William不斷問女友有冇帶齊證件,苟姑娘得戚騷出 passport等男友安心。

William推住一車行李去 check in,苟姑娘好輕鬆。

擔心女友撞親, William迅速衝去推開行李車。

細心的 William為女友打點好一切。

William表示賽後必定好辛苦,苟姑娘即刻搭一搭男友膊頭打氣。

William同苟姑娘經常在社交平台打情罵俏,但重點係他 tag了#52099同#652099,意思係 6代表陸漢洋, 520我愛你, 99好明顯就係苟姑娘啦, sweet到爆。
男友陪飛
上週五(十五日)晚上,苟姑娘同陸漢洋現身機場準備出發到意大利,兩個人夾埋帶了四箱行李,對「求婚之旅」不容有失的陸漢洋更「緊張大師」上身,狂問女友有冇帶齊證件同用品,慌死女友冇得出發,苟姑娘隨即喺褲袋拎出 Passport得戚騷俾男友睇,男友滿意笑晒口,繼續開籠雀搞爛 gag氹女友開心, check in期間,陸漢洋細心打點一切,苟姑娘十足公主一樣,企埋一邊乜都唔使操勞,其間陸漢洋擔心行李車撞親女友,於是九秒九衝去推開附近行李車,盡顯廿四孝男友一面!

衫褲鞋襪乜都掃,苟姑娘好豪氣。

William陪實女友苟姑娘 shopping揀戰衣。

William自己揀埋一份,為意國「求婚之旅」置裝。
冇否認意大利結婚
搞完一輪,苟芸慧陸漢洋十指緊扣準備入閘,他們一發現記者都非常大方,有問必答!問到是否去歐洲結婚,陸漢洋遲疑咗陣先話:「唔係唔係唔係!佢去做嘢我去比賽。(會唔會順便影埋結婚相啊?)冇咁多時間喎!睇吓工作如何先啦!(幾時結婚呀?)唔知呀!未定!車隊好忙呀,今站我去比利時,比賽完可能都散晒!」苟姑娘聽到亦心痛男友,出手撘對方膊頭打氣,簡單一個動作勝過千言萬語!最後再問到這次回來,是否能改口叫苟姑娘做「陸太」時,陸漢洋未有否認兼冧住笑大賣關子:「唔知呢?返嚟話你知!」
自從公開戀情,拍拖唔使再避忌,陸漢洋知道女友將會出席時裝周,出發前幾忙都抽時間陪女朋友 shopping試衫,早前二人拖住手出巡揀戰衣,陸漢洋順便都幫自己揀定靚衫,密謀同「準老婆」在意大利影結婚相。

公開戀情後,苟姑娘同 William拍拖唔使再避忌。

作為廿四孝男友, William企定喺更衣室門外俾意見女友。
「除咗影傳統嗰啲婚紗相,佢哋都想有多啲生活化啲嘅相做結婚相,留番最真實、甜蜜嘅一面!難得意大利啲景咁靚, William一早已經喺嗰邊安排好攝影師,到時同茍姑娘影番輯靚相!」陸漢洋身邊人說。
至於正式結婚日期,據知已定在明年初舉行,由於苟姑娘的家人及親戚大部分都在加拿大,所以婚禮其中一站必定會在多倫多舉行,而香港就仍未決定會否大搞,還是開一個 party,招呼一班較 close親友玩一晚,最後決策都係交由「未來老婆」決定。

由於苟姑娘父母在加拿大,陸漢洋當然尊重女友在當地舉行婚禮。

「處女黨」名存實亡,個個有晒着落。
睇豪宅築愛巢
陸漢洋錫到苟姑娘燶,當日苟姑娘患病時,時刻陪伴左右,生活起居照顧周到,為了改善女友生活環境,又安排女友入住貝沙灣豪宅,做他的鄰居,由於結婚一事即將進行,陸漢洋要將最好生活質素俾苟姑娘,有消息指最近陸漢洋睇中西半山過億元頂級豪宅「天匯」!
「知道陸生同苟姑娘最近搵緊樓,陸生指定要半山二千呎以上嘅豪宅,起碼要有四間房,可能諗住結婚生小朋友用啩,佢哋特別鍾意天匯一個高層二千三百幾呎單位,佢哋已經睇過兩次,間屋開價億五,比市值略高,所以佢哋仲考慮緊。」一名地產界人士透露。

同男友戀情穩定,苟姑娘唔介意同 William齊齊出活動搵錢。

 

同男友有共同興趣,熱愛賽車的苟姑娘一夾到時間就陪男友周圍飛打氣。

William斬釘截鐵話「娶硬」苟姑娘,大家好快可以改口叫她做「陸太」。

兩人經常拍住拖同朋友聚會。
外地求婚
圈中不少藝人都鍾意玩驚喜,花盡心思於外地求婚,大部分都成功抱得美人歸。


丁子高 楊千嬅
09年,丁子高與楊千嬅到美國旅行,丁生在拉斯維加斯一個浪漫氣氛下,第三度向千嬅求婚,並揚言陪千嬅走埋下半世,成功打動千嬅,喜極而泣下答應,並即時在當地註冊。


楊愛瑾 郭永淳
15年 2月, Miki生日兼情人節,郭永淳帶女方遊芬蘭及冰島欣賞北極光時,於雪地上跪地向她求婚,並於去年在港搞婚禮。


王菀之  Eric So
15年 4月,王菀之跟 Eric So到韓國工作,王菀之因要出席金像獎頒獎禮提前一日自己回港,男友在送她到機場途中突然遞上戒指求婚,王菀之即激動答應。


梁詠琪  Sergio
11年, Sergio於梁詠琪到巴塞隆拿, Sergio在酒店房的地上用玫瑰花鋪了「 marry me」,並替 Gigi戴上戒指,結果成功得到女方答應。


熊黛林 郭可頌
15年,熊黛林融入郭家,參加男方沖繩家庭之旅,事隔數月, Lynn自爆獲郭可頌送上三卡鑽戒求婚,還於社交網站寫道「我找到我的 Mr Right了」。
「樓王」天匯
被譽為「樓王」的天匯位於西半山干德道, 09年開售共 66伙,單位面積由 2,808呎至 4,038呎,為三房一套及四房雙套間隔,另有半複式特色戶及複式單位,由 6,144呎至 7,622呎,項目頂層則設有連泳池複式天際屋,為區內地標式豪宅。
物業所處地勢較高,中層單位已經可以飽覽開揚維港及港九市區景致,入口大堂的巨型水晶燈飾,由 77.3萬粒名牌水晶組成,發展商曾申請列入健力士世界紀錄大全。
去年,複式單位以 5.95億成交,上月車位更以 451萬元沽出,創車位價新高,連 Angelababy亦以母親董蘭英名義,豪斥 1.28億購入中層單位,被譽為「亞洲一手分層樓王」。

陸漢洋同苟姑娘睇中的天匯高層單位,能飽覽維港景致。

天匯設有會所泳池。

單位面積間隔闊落。
撰文:娛樂組
攝影、攝錄:陳亦龍、李溢敏、瀚鍾、楊紫、蕭敬漁、李玄

文章標籤
創作者介紹

明星八掛大分享★☆

tvb4life 發表在 痞客邦 PIXNET 留言(0) 人氣()