做「跟得丈夫」的許冠文陪老婆行超市,其間兩人有講有笑。

探熱針

過億磚頭揸手 許冠文超市未俾錢拆餅食

贊助商連結

大半世人拍電影都離不開喜劇的許冠文,今年 5月再次獲肯定,奪得今屆世界傑出華人獎,拍電影有自己一套,投資就更有一手,多年來手上的磚頭已升值過億。
生活無憂,加上早年曳曳斷正,焗住「修心養性」的許冠文主力做「跟得丈夫」,早前孖住老婆鄭潔英金鐘拍拖睇戲,入場前行 supermarket,許冠文都未排隊科水,已經急不及待拆開餅乾同老婆開心「些牙」,有冇咁肚餓呀?

 


超市小學雞
論拍戲、投資,今個月滿 75歲的許冠文是老手,但一轉場去到超級市場,就頓變滿頭問號的小學雞,這天下午四時,許氏伉儷孖咇現身金鐘的 Great,許冠文直衝向蔬菜、生果凍櫃,但俾老婆鄭潔英喝停:「梗係攞架車啦,一陣有嘢買咪唔使拎住!」
兩口子睇完蘋果、茶葉,直落睇埋新款韓式廚具都無收穫,二人轉睇零食、餅乾,畢竟年紀有番咁上下,兩人挑選時都分外謹慎,每每都會熟讀標籤成分,確保成分天然先至會入手,行到去果醬的貨架,許冠文滿頭問號無從入手,老婆隨即好似教仔般話:「睇唔睇到,你自己留意吓啦!」然後許冠文隨手拎起一樽慢慢研究,睇足五分鐘仍然心大心細,最終都係要老婆大人代勞。

老婆有電話入,無事忙的許冠文忍唔住未俾錢就拆餅食。

 

許太對韓式的廚具大感興趣。
猴擒先食
轉個彎,兩人行到餅乾貨架,許冠文一手拎起一盒餅乾,夾啱時間老婆電話響起,許冠文未俾錢就竟然將餅乾拆盒,用口扯開膠袋,將餅乾一分為二,自己食一半,將另一半遞入老婆口中,然後施施然繼續行。
行到去芝士檔口,職員送上試食,鄭潔英忍唔住搭訕話:「我買咗從來都唔識整俾佢食!」從後趕上的許冠文,加入研究埋一份話:「總之整溶咗佢就得啦!」三個人圍住櫃枱傾到沒完沒了,直到許太一聲令下:「好啦,夠鐘!」許冠文先捨得收口走人。

靚女店員力 sell茶葉,老婆無反應,許冠文都唔敢埋去睇。

許冠文拎住果醬研究標籤成分。

同櫃枱職員無限吹水,要老婆拉住,許冠文先捨得離開。

兩公婆轉場拍拖去睇戲。
有眼光
近年處於半退休狀態的許冠文,去年接拍台灣劇情片《一路順風》,憑住老許一角,被睇高一線,有機會問鼎台灣金馬獎,最終被國內的范偉憑《不成問題的問題》爆冷跑出,同金馬影帝擦身而過。今年五月演藝成就再被肯定,奪得第十五屆「世界傑出華人獎」的演藝界代表,七十五歲的許冠文坦言希望事隔十九年後再自導自演,「覺得差自己一部戲,所以依家構思嘅一部都係喜劇!」許冠文說。
拍戲有一手,許冠文投資方面都好有一套,多年來投資的物業十隻手指數得晒,每次入貨都是 all cash,甚少同銀行造按揭,多年來買入的磚頭獲利甚豐,不得不提他七五年以八十萬買入的布思道柏麗園高層連天台複式單位連車位,現時售價超過四千三百萬,升值超過五十倍,名副其實賺到笑!

10年同來自上海的紋眉女作家撐枱腳斷正,對方刻意遮面避鏡頭。

本月初許冠文生日,譚詠麟特別和他合唱慶祝。

去年底主演的《一路順風》在香港首映,兒子許思維(左一)及女兒許思行(右二)特意前往撐場。(《蘋果日報》圖片)

在《一》片擔演的士司機的許冠文,一度被認為是金馬獎影帝的大熱。

今年 5月許冠文獲頒世界傑出華人獎。(《蘋果日報》圖片)
升價五十倍


已經七十五歲的許冠文,投資有眼光,手上持有物業完全冇造按揭,其中 75年手持至今的柏麗園物業,更升值五十多倍,身家以億計。
撰文、攝影、攝錄:娛樂組

文章標籤
創作者介紹

明星八掛大分享★☆

tvb4life 發表在 痞客邦 PIXNET 留言(0) 人氣()