唐詩詠 病貓都識發威

贊助商連結

早前,唐詩詠(Natalie)受到同洪永城分手事件嘅困擾,畀傳媒追住想知更多內情;跟住,又愈爆愈多枝節,好似話澳門賭業大亨洗米華嘅愛將盧啟邦狂追佢咁,搞到Natalie心力交瘁!不過,盧啟邦日前自爆女友有喜,快將做爸爸,「唐盧」嘅緋聞總算告一段落。

而Natalie前排就日日忙住拍新劇《棟仁的時光》,日踩夜踩都幾辛苦,仲試過拍拍吓暈低被送入醫院添,可想而知拍攝嘅緊密程度。不過,佢只係外表睇落弱不禁風,實則佢份人好硬淨吓。

早前,東姑撞見過佢喺筲箕灣開工拍《棟》劇外景,劇入面飾演救護員嘅佢,大熱天時焗喺架救護車入面,搞到大汗叠細汗,仲要場戲真係搬搬抬抬冇得「詐帝」,見佢幫手秤起個坐輪椅嘅病人上救護車,假戲真做堅要出盡「奶力」,絕對唔講得笑,冇得「hea」做o架。

東姑都服咗Natalie嘅意志力咁驚人,啲表現根本完全唔似啱啱暈過病完咁,所以話女人發威,非同小可,尤其是回復單身嘅女人,更加要自強不息嘛!

喺TVB新劇《棟仁的時光》中,Natalie升呢做「女一」,扮演一個救護員,呢場戲就要假戲真做,佢出盡九牛二虎之力,先秤得起個病人上救護車。

 

咪睇佢外表柔弱,其實意志力驚人,為求拍好呢場戲,佢出力出到青筋、手筋都暴現。

 

趁未埋位住,Natalie都走埋一邊唞唞涼,抹下汗。

 

早排,佢曾經因為體力透支,拍戲中途暈倒,睇佢呢個辛苦表情,東姑都得我見猶憐。

創作者介紹

明星八掛大分享★☆

tvb4life 發表在 痞客邦 PIXNET 留言(0) 人氣()