林偉秘睇中醫擺烏龍

贊助商連結

出身模界嘅林偉,入行已經三十年,因有樣有身形,初入行拍過唔少三級片。九三年,佢加入無綫,兩年後就離巢,過咗台灣發展;直到二千年,佢回流加入亞視,結果,兜兜轉轉成廿年,佢喺一三年回歸無綫。早前,佢喺《不懂撒嬌的女人》演嘅CEO「任哥」,再度引起觀眾嘅注意。日前,東姑去咗西貢喫海鮮,咁啱見到林偉同許紹雄拍緊無綫4K新劇《使徒行者2》。當日劇情講述飾演金牌打手嘅林偉,被仇家追斬後受傷倒地,幸好獲飾演歡喜哥嘅許紹雄相救。到正式埋位時,林偉就同三名仇家舞刀互劈,期間,他一度要向後扭腰閃避,不過最後仍被人劈到成個人撻生魚。

事後,林偉就同東姑大爆拍攝時腰患復發,「頭先打完條腰㾓㾓痛!記得九四年聖誕節,我喺清水灣片廠拍嘢,要扮黑衣人,嗰陣我唔識熱身,搞到腰啲筋腱拉傷,到年初一早上先至發作,當時起唔到身,我敷完鐵打就冇理佢,但其實佢有少少移位。後尾,我都有睇脊醫做吓按摩,不過次次拍親打戲,都會好易整到個位㾓。」到正式收工,林偉就嗱嗱臨去咗隔籬睇中醫,之但係,原來間診所係主理陽痿。見慣大場面嘅佢,笑笑口講完唔該,就趕返屋企休息嘞。

拍攝期間,林偉手持道具刀,同多名古惑仔互劈,出身模界嘅佢,竟然打得有板有眼,幾take就拍晒喇!

 

日前,林偉現身西貢為新劇《使徒行者2》拍外景,劇中佢飾演歡喜哥嘅金牌打手,因為被班古惑仔劈到左臂受傷,結果要當街撻生魚,唔小心令腰患復發。

 

期間,佢向東姑展示當年嘅舊患位置,正正位於右邊嘅腰間。

 

一收工,打到腰痛嘅林偉,即嗱嗱臨行去隔籬間中醫診所求診。

 

之後,佢就行咗入去攞卡片問價,不過原來女醫師專醫陽痿,擺晒烏龍添。

創作者介紹

明星八掛大分享★☆

tvb4life 發表在 痞客邦 PIXNET 留言(0) 人氣()