暑假期間,林文龍同郭可盈幾乎日日陪實寶貝女津津。

探熱針

方便皇帝女返學 林文龍郭可盈有兩頭住家

贊助商連結

林文龍同老婆郭可盈的寶貝女林天若(津津)轉眼已經 7歲,為了囡囡入到心儀的學校,揼本在大埔道校網租住月租四萬的爾登華庭。
寶貝女去年成功考入保良局蔡繼有學校升小/,林文龍一家原本住在西貢匡湖居,但為了津津方便返學同上興趣班之間有個地方歇腳,索性繼續住大埔道,在剛過去的暑假,暫時唔使新界、九龍兩邊騰的郭可盈,連日在西貢超市出沒買餸,全程有林文龍兩父女傍到實,睇嚟郭可盈為咗家庭放棄做花旦,明智之選!

 


推 job陪女
林文龍同郭可盈為了寶貝女津津,兩夫妻協議男主外女主內,郭可盈淡出幕前專心湊女,林文龍搵錢養家,適逢今年林文龍重返無綫拍劇集《不懂撒嬌的女人》而人氣急升,大把賺錢機會排住隊搵佢,不過喺啱啱過去的暑假,愛囡如命的林文龍就推掉多個工作,爭取時間共享天倫。

津津掛住發呆,林文龍即主動問阿囡想食咩餸。

津津扎扎跳無時停,郭可盈捉都捉唔實。

郭可盈睇啱買咩即刻拎上手,再問老公意見先扑槌。
共享天倫
林文龍趁住囡囡就快放完暑假,又未出發到深圳為劇集《新創世紀》開工,他們兩公婆幾乎日日陪實囡囡親子樂,早前黃昏一家三口仲現身西貢超市買餸玩煮飯仔,囡囡全程黐實靚媽咪同老豆揀嘢,其間兩公婆一路就「今晚食咩餸」的話題雞啄唔斷,作為老豆的林文龍又主動問囡囡意見,最後佢哋扑槌買咗大量蔬菜同肉類,排隊俾錢期間,眼見有個可愛的外籍小妹妹經過,林文龍竟然趁人哋個工人姐姐擰歪面,即主動出手拍妹妹膊頭撩人 say hello,其冧爆笑容完全流露出父愛,幫老婆放好袋餸,林文龍就急急腳行去攞車唔使兩母女等,的確照顧周到!

睇準時機,林文龍出手撩妹妹玩。

對住人哋個女都充滿父愛,追多個陪津津啦!

林文龍先去攞車,等老婆同囡囡唔使等,認真廿四孝。

林文龍重返無綫拍《不懂撒嬌的女人》,令他人氣再度急升。
兩頭住家
不少父母不惜買樓又搬屋,在心儀校網區插旗,為仔女入學作好部署,好似愛女如命的郭可盈,為咗囡囡將來,被指「虎媽」都在所不計,當年安排女兒同時入讀在九龍塘兩間名牌幼稚園,又為女兒報近十項興趣班,為咗成功登入名校門檻,原本住在西貢的一家,不惜在學校附近的爾登華庭以月租四萬租多個豪宅單位兩邊住,最終囡囡上年就成功考入心儀的保良局蔡繼有學校讀小/,今年愛女升讀小二,為了方便津津返學,所以兩公婆決定繼續大埔道、西貢兩邊住。

為咗寶貝女津津,郭可盈淡出幕前專心湊女,養家重任就交俾林文龍。

有女萬事足的郭可盈,日日同囡囡孖公仔出動。

郭可盈買衞生巾,囡囡都黐到實一齊揀。

可盈喺雪糕櫃前揀雪糕,囡囡即興奮望到實。
日日湊女返學
週一(四日),撞正三號風球,本身在內地開緊戲的林文龍不怕舟車勞頓中、港兩邊走,一早起身做「柴可夫」同老婆湊女返學,到達校門,郭可盈細心為囡囡將水鞋換上皮鞋及整理校服,囡囡入咗學校,可盈繼續依依不捨望實女兒。離開時,對於記者問到是否多頭住家方便囡囡返學,可盈只笑而不語。明嘅,低調啲嘛!

喜歡彈琴的津津三歲已經考獲初級鋼琴證書。

當年郭可盈為囡囡報讀兩間幼稚園,再任由囡囡選擇自己喜好。

週一(四日),林文龍負責做柴可夫,車埋老婆接送囡囡返學。


臨入校門,郭可盈為囡囡整理好校服。

熊黛林同郭可盈胞弟郭可頌結婚後,已經融入郭家, Lynn仲當正津津半邊女咁錫。
虎爸虎媽
圈中不少怪獸家長,為咗下一代可以入到名校,不惜一切,搬屋又買樓,認真大陣仗。
李克勤
住清水灣多年, 12年因大仔 Ryan入讀香港仔加拿大國際學校,為節省搭車,克勤一擲$5,410萬購入壽臣山曉穎花園豪宅,再花多千萬將四千呎大屋重新裝修,令兩個仔可以輕鬆返學兼住得舒適。

蔡少芬
13年,豪擲二千多萬購入九龍站凱旋門及灣仔囍匯單位,於港九兩大名校網插旗,為女兒張楚兒入學作出準備。

張栢芝
15年,張栢芝成功安排兩子入讀位於沙田基督教國際學校,由於返學路途遙遠,栢芝寧願兩個仔多啲時間休息,便由港島中半山世紀大廈搬入大埔康樂園,來回程慳番個幾鐘。

張家輝
12年,張家輝為寶貝女 Brittany升讀小學,放棄貝沙灣風水屋,選擇入住校網更正的跑馬地逸廬,更月花十多萬,請七名碩士生為愛女補習。

 

為仔女淡出
不少藝人婚後放棄女強人生活,做全職媽媽淡出幕前,間中戲癮發作,先復出選擇性接 job。
官恩娜
婚後火速造人的官恩娜,自 15年誕下囝囝 Garbiel後, Ella一直停工專心湊仔,雖然同唱片公司仍有合約,但遲遲未有開工,近日 Ella報喜再度懷孕,似乎未有復出打算。

陳茵媺
三年抱三的陳茵媺先後為陳豪誕下兩仔一女,自 14年拍完電影《開飯啦!》後便冇再接戲,一直相夫教子深居簡出,全職照顧三個小寶貝,闊別幕前一段時間,不少網民紛紛留言希望陳茵媺再拍劇,仔女開始大, Aimee終於放心俾人湊,近日終於復出拍新戲《日月星》。

陳慧珊
96年加入無綫,陳慧珊受大台力捧成為花旦,每年都有代表作; 07年,與丈夫鍾家鴻誕下囡囡 Mira後便淡出幕前,全副精神湊女兼進修碩士學位,直至 14年再度出山,拍無綫劇《女人俱樂部》,以玩票性質工作。

 

撰文、攝影、攝錄:娛樂組

文章標籤
創作者介紹

明星八掛大分享★☆

tvb4life 發表在 痞客邦 PIXNET 留言(0) 人氣()